عين كليوباترا عين مياه تزين واحة سيوة : تعرف علي تاريخ العين وسبب التسمية وأفضل مواعيد الزيارة

عين كليوباترا: أساطير وتراث وعلاج في مكان واحد!  تاريخ العين وسبب التسمية وأفضل مواعيد الزيارة

أشهر العيون الموجودة في الواحات المصرية كلها، وشاهدة على كتير من تراث واحة سيوة ده غير مساحتها الكبيرة جدًا واللي بيخليها حمام سباحة طبيعي ودرجة حرارتها الدافية في الشتاء وباردة في الصيف، كل دي أسباب هتخلينا نتكلم النهاردة بتفاصيل أكتر عن عين كليوباترا والأسماء التانية المشهورة بيها وإزاي توصل لها والتكلفة وأفضل مواعيد الزيارة..

عين كليوباترا عباره عن ايه؟

من أكبر عيون المياه الطبيعية اللي هتشوفها في مصر، قطرها 40م وعمقها حوالي 10م مع تدفق قوي جدًا للمياه، العين فيها سر غريب وهو إن مياهها دافية جدًا في الشتا وبارده ولطيفة في عز الصيف! والعين تعتبر المصدر الرئيسي للمياه لأكتر من 840 كم مربع من الأراضي الزراعية في سيوة وهي محاطة بالأشجار والنخل من كل الإتجاهات وتم بناء سور حواليه عشان يحافظوا على العين من الردم بسبب عوامل البيئة..

سبب تسمية عين كليوباترا في سيوة 

للعين أسماء كتير أشهرهم عين "كليوباترا" وده بسبب الإعتقاد بإن الملكة كليوباترا سبحت فيها عند زيارتها للواحة، ولكن كتير من المؤرخين نفوا زيارتها دي وإن سبب التسمية بيرجع للشبه بين العين السيوية وبين حمام كليوباترا في مطروح، ومن أسمائها برده عين "جوبا" ومعناها بالأمازيغية عين الملك ويقال إن ده بسبب إن الأسكندر الأكبر اغتسل فيها وهو في طريقه لإعلانه ابن للإله آمون، ده غير اسم "عين الشمس" وده الوصف اللي قاله المؤرخ هيرودوت عنها في القرن ال15 قبل الميلاد..

عين كليوباترا شاهدة على عادات أهل سيوة 

من الحكايات المعروفة عن العين دي بالذات إن البنات زمان كانوا بيستحموا فيها في ليلة فرح أي واحدة من صحبتاهم وتغسل وشها بمياه العين وعشان كده كانت بتتسمى أحيانًا بعين "الحمّام" ولكن العادة دي أختفت وأصبح إستخدام العين في السياحة بس من خلال شهرتها كمزار فريد من نوعه، التقليد الوحيد الباقي هو إن أهل سيوة بيتجمعوا سنويًا عشان ينظفوا عيون الواحة كلها بما فيها عين كليوباترا.

موقعها فين بالظبط

عين كليوباترا قريبة جدًا من وسط واحة سيوة على بعد 3 كم بس، تقدر تاخدها مشي في نص ساعة تقريبًا أو ب تروسيكل " توك توك" في حوالي 10 دقايق أو أقل.. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا.

احسن وقت لزيارة عين كليوباترا في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C. 

أسعار زيارة عين كليوباترا في سيوة

العين تقدر تزورها في أي وقت، وعشان تروحها من وسط الواحة إما تتمشي و تاخد تروسيكل – توك توك – وتكلفته هتكون حوالي 15- 20 جنيه، أما العين نفسها فهي بدون أي تذاكر او تكلفة لنزولها.. ولو حابب تستريح وتستمتع بالمنظر حوالين العين في أي كافيتيريا من الموجودين فالمشروبات بتبدأ من 10 جنيه وانت طالع..

مع جبل الدكرور وجبل الموتى فعين كليوباترا من الأماكن اللي مينفعش تروح سيوة ومتزورهاش ولو لمرة واحدة على الأقل.. جمّد قلبك وخد مايوهك واستمتع بالمكان التاريخي اللي هتعوم فيه!