كل ما تريد معرفته عن جبل الدكرور في سيوة: الاسعار افضل مواعيد الزيارة وازاي تروحله بسهولة

جبل الدكرور: الإحتفال والعلاج في مكان واحد!  تاريخ الجبل والأسعار وأفضل مواعيد الزيارة

هو أشهر جبال واحة سيوة وده لإن بيقام عليه إحتفالات عيد الصلح كل سنة ده غير تكوينته الفريدة واللي بتساهم في العلاج من الكتير من الأمراض عن طريق الردم، جبل الدكرور أو جبل "ادرارمبريق" باللغة الأمازيغية له قمتين اسمهم نادرة وناصرة وانت عليهم هتشوف صورة تحفة للواحة كلها، وعشان كده هنتكلم النهاردة بتفصيل أكتر عن جبل الدكرور وأهم الحاجات اللي بتحصل عليه سواء عيد الصلح أو الحصاد وإستخدامه في السياحة العلاجية وإزاي توصل له وأفضل مواعيد الزيارة..

عيد الصلح على جبل الدكرور

من أشهر الأحداث اللي بتحصل على جبل الدكرور وهو إحياء العيد السنوي الخاص بالواحة "إسياحت" وهي كلمة أمازيغية معناها السياحة في حب الله واللي بيمتد ل 3 أيام متواصلة وهي الليالي القمرية في شهر اكتوبر بعد موسم حصاد البلح  والزيتون وعشان كده بيتسمى عيد الحصاد برده، وفي العيد ده بيسيب الرجالة بيوتهم ويقيموا على الجبل سواء في البيوت القديمة الموجودة فيه او في الخيام عشان يصفوا جميع الخلافات اللي بينهم مهما كانت حجمها بعد الصلح الكبير بين الشرقيين والغريبين من أكتر من 200 سنة وده بيفسر تسميته ب "عيد الصلح" 

السياحة العلاجية على جبل الدكرور

جبل الدكرور من أبرز أماكن السياحة العلاجية في مصر وده بسبب تركيبة الرمال فيه وسخونتها وبيستمر الموسم العلاجي خلال شهور الصيف من يونيو وحتى سبتمبر، وبتبدأ مراحل العلاج بالردم في الرمال عن طريق حفرة أفقية بطول المريض عشان يتغطى جسمه كله بالرمل وبينتظر من 10 ل 15 دقيقة في الحفرة وتتكرر العملية كذا مرة حسب تحمل كل شخص.. الدفن بيستمر من 3 ل 7 أيام حسب نوع المرض لكن الحاجة المشتركة إن المريض بيتلف ببطانية صوف ويشرب حلبة سخنة ويدهن جسمه بزيت الزيتون وميتعرضش أبدًا لأي تيارات هواء أو يشرب مياه ساقعة، ولازم يتأكدوا في البداية إن المريض غير مصاب بأمراض القلب أو الضغط أو السكر لإنهم بيتعارضوا مع فكرة العلاج بالردم اللي بيفقد الجسم الكتير من الوزن والعرق والدهون.. 

موقعه فين بالظبط

جبل الدكرور قريب جدًا من وسط واحة سيوة على بعد 4 كم بس، تقدر تاخدها مشي في ساعة إالا ربع ساعة تقريبًا أو ب تروسيكل " توك توك" في حوالي 10 دقايق .. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا

احسن وقت لزيارة جبل الدكرور في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C.  

أسعار زيارة جبل الدكرور في سيوة

الجبل تقدر تزوره في أي وقت، وعشان تروحه من وسط الواحة إما تتمشي و تاخد تروسيكل – توك توك – وتكلفته هتكون حوالي 20 – 30 جنيه، أما الجبل نفسه فهو بدون أي تذاكر او تكلفة لطلوعه.. أما لو هتروح للسياحة العلاجية، فتكلفة اليوم في المتوسط 300 - 500 جنيه وبتكون متضمنة الإقامة والأكل والعلاج والتدليك والمتابعة وكشف الطبيب الرسمي والوجبات الغذائية.

هتروح سيوة لأي سبب فانت أكيد رايح جبل الدكرور، بس لو هتروح لغرض سياحي فلازم على الأقل مرة واحدة في حياتك تروح وقت عيد الصلح، عشان هتنبسط وتتفاجأ وتحب سيوة أكتر..