شاهد جمال واحة سيوة من اعلي جبل الموتي تعرف علي اسعار دخول جبل الموتي وازاي تروحه بسهولة

جبل الموتى: خلية نحل لدفن الأموات في واحة سيوة!  تاريخ الجبل والأسعار وأفضل مواعيد الزيارة

موجود في قلب واحة سيوة، ارتفاعه صغير وسهل الطلوع للقمة بتاعته وبالتالي فرصة جميلة إنك تشوف منظر بديع للواحة كلها من عليه، ده غير تاريخه اللي يمتد لآلاف السنين والمقابر الملونة اللي موجودة فيه واللي خلته كنز حقيقي من كنوز الصحراء الغربية، وعشان كده هنتكلم النهاردة بالتفصيل عن جبل الموتى وتاريخ إستخدامه كمقبرة وإزاي توصل له وتكلفة زيارته دة غير أفضل مواعيد الزيارة.. 

جبل الموتى عبارة عن ايه؟

الجبل تم اكتشافه سنة 1944 عن طريق الصدفة، وده لما هرب أهالى الواحة من قصف الطيران الألماني وقت الحرب العالمية التانية واحتموا بالجبل، عشان يكتشفوا ألاف المقابر المنحوتة في الجبل على شكل خلايا نحل بشكل هندسي منتظم ورائع وفي نفس الوقت يشبه الشكل الهندسي للواحة القديمة.. أما عن شكل الجبل هو جبل مخروطي وارتفاعه 50 متر تقريبًا.

تاريخ جبل الموتى

جبل الموتي كان الجبانة أو المقبرة الرئيسية في واحة سيوة خلال العصور القديمة واللي بدأت من عصر الأسرة ال 26 الفرعونية واستمر استخدامها كمقبرة حتى العصر الروماني والبطلمي ( العصر البيزنطي ) وعشان كده هتلاقي تصميم المقابر بتجمع بين الفن المصري القديم والفن اليوناني، وعن أهم المقابر اللي موجود في الجبل هي المقابر الملونة الأربعة مقبرة باحتب، مقبرة التمساح، مقبرة ميسو ايزيس، وأخيرًا مقبرة سي آمون واللي بتعتبر الأجمل في كل مقابر الصحراء الغربية في مصر وهي مقبرة بتبعود لشخص إغريقي ثري ولكنه كان بيتبع الديانة المصرية القديمة واستقر في سيوة لحد ما مات واتدفن فيها.. 

موقعه فين بالظبط

جبل الموتى قريب جدًا من وسط واحة سيوة على بعد 2 كم بس، تقدر تاخدها مشي في تلت ساعة تقريبًا أو ب تروسيكل " توك توك" في أقل من 5 دقايق.. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا.

احسن وقت لزيارة جبل الموتى في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر وجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C.  

أسعار زيارة جبل الموتى في سيوة

الجبل مواعيد زيارته بتبدأ من الساعة 9 الصبح ولحد 5 المغرب، وعشان تروح من وسط الواحة إما تتمشي وهتاخد تقريبًا تلت ساعة أو تاخد تروسيكل – توك توك – وتكلفته هتكون حوالي 10 – 15 جنيه، ده غير تذاكر الجبل نفسه واللي سعرها 20 جنيه للمصري و5 جنيه للطلبة، أما الأجانب فالفرد 100 جنيه والطالب 50 جنيه.. 

على قايمة زياراتك في سفريتك الجاية لسيوة لازم يكون فيها زيارة جبل الموتي، قريب من وسط المدينة، ومختلف وفيه حكايات وتاريخ غير الصورة البانورامية الهايلة اللي هتشوفها لواحة سيوة كلها من فوق!