تمتع بمزيج من الطبيعة والصحراء في جزيرة طغاغين بسيوة وتعرف علي الاسعار وافضل مواعيد الزيارة

جزيرة طغاغين: الكنز المخفي في سيوة!  الأسعار وأفضل مواعيد الزيارة وازاى تروحها 

مفيش حد فينا مبيحلمش إنه يكون على جزيرة لوحده لكن بنشوف ده حلم صعب التحقيق إما لإننا منعرفش هل ده متاح في مصر ولا لأ أو للتكلفة العالية اللي بيتطلبها تحقيق الحلم ده، جزيرة طغاغين هي جنة حقيقية موجودة في سيوة.. هدوء، طبيعة، مياه، جبال وغيره.. كل ما هو جميل بيحاوطك وبيحضنك! وعشان كده هنتكلم النهاردة بالتفصيل عن المكان ده وبدأ امتى وإزاي تروح هناك والأسعار وأفضل مواعيد الزيارة

الجزيرة عبارة عن ايه؟

جزيرة طغاغين موجودة غرب واحة سيوة على مساحة 38 ألف متر داخل بحيرة سيوة العظيمة، موجودة من 2003 بعد 5 سنين إنشاءات متواصلة لحد ما وصلت على شكلها الحالي الرائع.. والمميز فيها إن معمول لها طريق خاص بطول 2 كم داخل البحيرة! الجزيرة عليها 20 كوخ جاهزين بيطلوا على البحيرة والجبل جاهزين للإقامة، وجميع مباني الجزيرة مبنية من مواد صديقة للبيئة والديكورات بسيطة ومستوحاة من تراث وثقافة سيوة ده غير عين المياه الرهيبة الموجودة هناك "عين طغاغين" واللي بتعبر نسخة فريدة من حمامات السباحة اللي مش هتلاقي زيها في أي مكان تاني.. 

موقعها فين بالظبط

جزيرة طغاغين موجودة في قلب بحيرة سيوة على بعد 12 كم من مركز المدينة، وبتاخد 20-25 دقيقة بالعربية.. ولو هتروح مواصلات فأنسب حاجة تِروح بتروسيكل " توك توك " وهتاخد نص ساعة والسعر حوالي 50 جنيه.. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا

احسن وقت لزيارة جزيرة طغاغين في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر وجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد شوية بليل ودرجة الحرارة بين  10 و25 °C.  

أسعار زيارة جزيرة طغاغين في سيوة

طغاغين ريزورت هو واحد من أجمل التجارب اللي ممكن تعملها في سيوة، مجرد تخيل فكرة  الإقامة في جزيرة منفصلة خاصة بيك مع خدمة متميزة هو شيء رائع فما بالك إن ده على بعد 750 كم بس من القاهرة! بتبدأ اسعار الإقامة ب 350 جنيه للغرف المفردة و600 جنيه للغرف المزدوجة، ده غير إن فيه أوبشن التخييم هناك وبيتراوح بين 50 – 100 جنيه حسب معاك خيمتك أو لأ، أو لو حابب تقضي اليوم بس هناك لحد المغرب فالتكلفة حوالي 50 جنيه وبيتضمن مشروب سخن او ساقع حسب اختيارك.. 

ولو حابب تعرف اكتر عن الرحلات المتاحة في سيوة تقدر تشوف كل التفاصيل وتحجزها من هنـــــــــــــا 

ماينفعش تكون بتحب السفر والترحال ومتكونش روحت طغاغين قبل كده، تجربتنا لزيارة الجزيرة مدهشة وحقيقي بنرشحها لإي حد عاوز ينبسط! سفريتك الجاية لسيوة لازم تتضمن يوم على الأقل تقضيه في طغاغين ده إن مكانش هتقضي السفرية كلها هناك.. ومتنساش تبعتلنا صورك لما تروح