ناس كتير بتسأل ازاى اطلع فيزا جورجيا سياحة من السفارة و امتى اقدر اطلعها ألكترونى ؟ و ازاى اطلع التصريح الامنى و ايه الاوراق المطلوبة فى الحالتين ؟

 جورجيا بلد سياحية جميلة و بسيطة ومش مكلفة لو قارنتها بدول كتير تانية .. يكفى لها 7 الى 10 ايام .. بلد بتجمع بين الحضارة و التراث و الطبيعة جبال و شواطئ و انهار , هنتكلم فى المقال دة عن كل ما يخص التقديم على الفيزا الى جورجيا ..

 

1️⃣️ أولا التقديم للفيزا عن طريق السفارة الجورجية  : ( الاوراق المطلوبة - خطوات التقديم - عنوان السفارة ) 

- الاوراق المطلوبة :

جواز سفر ساري - كشف حساب بنكي لاخر 3 شهور فيه مبلغ مش اقل من 10.000 جنيه عليه عمليات سحب وايداع مش معاك المبلغ بس حسابك عليه سحب و ايداع تقدر تخلى والدك يحولك المبلغ على حسابك و بعدين تطلع كشف الحساب و بعدها رجع فلوس والدك تانى لحسابوا بعد استلام كشف الحساب من البنك.. و أيوة ينفع حساب الوالد أو الوالدة او دفتر توفير تقدموا - خطاب من العمل "لو انت طالب بتجيب شهادة قيد من الجامعة" - حجز طيران وفندق مبدئي - تأمين طبي - صورتين شخصية خلفية بيضاء 4x5 - الأبليكيشن اللى هتعمله من موقع السفارة + تحديد الميعاد فى السفارة) كل الأوراق تكون مترجمة للإنجليزية .

 

- خطوات التقديم :

1- هتدخل موقع السفارة ده https://www.geoconsul.gov.ge/en

2- هتملئ الأبليكيشن من الموقع وتكتب كل بياناتك وتواريخ الذهاب والعودة وبعدين تطبعه وتوقع علي آخر صفحة وترفع الأبليكيشن تاني على الموقع بعد التوقيع.

3- أيداع 20$ فى حساب السفارة الجورجية فى بنك CIB 

4- تحميل ايصال البنك بالإيداع - جواز السفر - حجز الفندق المبدئي - حجز الطيران المبدئي

5- تحميل صورة شخصية مقاس 4*5 خلفية بيضاء حديثة

6- تحميل كشف حساب لاخر 3 شهور برصيد لا يقل عن 10 ألاف جنيه مصري.

7- تحميل التأمين الطبي ويكون على قد المدة اللى هتقضيها فى جورجيا.

8- تحدد موعد لتقديم الأوراق فى السفارة .. وهتطبع كل الأوراق وتروح السفارة فى الميعاد المحدد.

 

- عنوان السفارة الجورجية

11 ميدان اسوان، المهندسين ، الجيزة، مصر .. رقم التليفون: 0020233044768

 

** لازم الأبليكيشن والحجوزات والتأمين الطبي تكون كلها بنفس المدة اللي هتقصيها فى جورجيا لأن الفيزا بتطلع بعدد الأيام اللى كاتبها فى الأبليكيشن

 

2️⃣️ ثانيا التقديم على الموافقة الأمنية للسفر لجورجيا ( التصريح الامنى ) : ( خطوات استخراج الموافقة الامنية ) 

كل فترة بيمشوا على شروط جديدة .

 

- خطوات استخراج الموافقة الأمنية:

1- بعد استلام الفيزا من السفارة بتروح مجمع التحرير وتصور الفيزا والباسبور (لازم تكون عارف اسم والدك خماسي وتاريخ ميلاده لأنهم بيطلبوهم منك هناك)

2- الموافقة الأمنية بتستلمها بعد 4 أيام .. صلاحيتها شهرين من تاريخ الإستلام.

- العنوان :

مكتب رقم 15 - مكتب ظابط الإتصال - الدور الأول - مجمع التحرير- ميدان التحرير ,

مواعيد العمل من السبت للخميس من 8 صباحا لـ 1 ظهراً

 

3️⃣️ ثالثا فيزا جورجيا الألكترونية : خطوات التقديم علي فيزا جورجيا الالكترونية

لو مسافر من بره مصر الموضوع سهل جداااااا انسى كل الخطوات الى فوق .. تقدر تقدم علي الفيزا الالكتروينة و توصلك عالايميل بعد 5 أيام عمل و بتكون صالحة أقل من90 يوم .

 

- خطوات التقديم ل فيزا ألكترونية :

1- هتملئ البيانات المطلوبة على الموقع الإلكتروني ده : https://www.evisa.gov.ge/GeoVisa/en/VisaApp

( حروف الاسم كابيتال ذى الباسبور لتجنب الرفض )  ثم طباعتها والتوقيع باليد على اخر صفحة واعادة تحميلها على الموقع مرة اخرى بالتوقيع .

2- تحميل صورة جواز السفر (سكان ملونة واضحة ) + صورة شخصية 4 فى 5 خلفية بيضاء حديثة (لازم تكون الصورة مطابقة للمواصفات وإلا هتاخد رفض)  + تحميل ايصال البنك بالايداع + تحميل حجز مبدئى طيران + تحميل حجز مبدئى فندق + تحميل كشف حساب لاخر 3 أشهر لا يقل عن 20 ألف جنيه + تحميل شهادة التأمين السياحى خلال فترة البقاء بجورجيا.

تقدر تعرف مواصفات الصورة من هنا : https://videos.mfa.gov.ge/geoconsul/ka/photos.pdf

3- الدفع عن طريق الإنترنت ( 20$ ) فى حساب السفارة ببنك CIB حساب رقم 5360300106  .

4- طبع الفيزا الالكترونية و حجز تذاكر الطيران و الفندق ( لازم تكون معاك نسخة من حجز الفندق او الهوستيل او الجيست هاوس و انت مسافر عشان بيشوفوه هو و الفيزا الالكترونية قبل ما يختم على باسبورك ختم الدخول ) 

وللتوثيق على الشهادات :

• يتم التوثيق على الشهادات اولا من وزارة الخارجية المصرية
• ثم يتم كل الخطوات السابقة ماعدا حجز الفندق والتذكرة وكشف الحساب والتأمين 
• يتم ايداع بـمبلغ 15 $ عن كل مستند بحساب البنك المذكور اعلاه .

 

4️⃣️ حالات لا تحتاج التقديم فيها الى فيزا لجورجيا لا ملصقة ولا ألكترونية :

- اصحاب جنسيات دول مجلس التعاون و اصحاب الاقامات فيها (قطر، السعودية ،سلطنة عمان، البحرين والكويت ) باستثناء بعض الدول و تقدر تعرف اكتر من السفارة نفسها .. 

- اصحاب الجنسية الروسية و ايضا الولايات المتحدة الأمريكية، جمهورية ليتوانيا، الاتحاد السويسري، ألمانيا الاتحادية، كوريا، التشيك، هنغاريا، بولندا، سلوفينيا، الدنمارك، النرويج،السويد، إسبانيا، بلغاريا، سلوفاكيا، رومانيا، أستونيا ولاتفيا الأوروبية،

- مواطنى الدول الأعضاء في الاتحاد الأوروبي بيدخولوا جورجيا ببطاقة الهوية فقط

-مالكى وثائق سفر وصلاحيات من منظمة اليو أن UN 

- السوريين والعراقيين لا يحق لهم دخول جورجيا إلا إذا كان معاهم إقامة بإحدى دول الخليج ذى ما ذكرت فوق .

 

المصدر : صفحة Traveller experience

 

ولو حابب تعرف معلومات عن التصريح الامنى والاوراق المطلوبة فيه ممكن تقرأ المقال دة هيفيدك :

خطوات عمل التصريح الامني وكيفية استخراج اذن السفر