الانتقالات في سيوة: 5 طرق  عشان تعرف تتحرك في واحة سيوة.

من الحاجات اللي بتزود تكلفة أي سفرية بشكل كبير هي الانتقالات خاصة إنك مبتقدرش تحسبها كويس، لكن لو عرفت ايه هي الخيارات المتاحة قدامك فده فيخليك تاخد افضل قرار بالاضافة إن في كتير في الأحيان وسيلة المواصلات ممكن تعتبرها تجربة وفقرة في حد ذاتها زي ما هو موجود في سيوة وعشان كده هنتكلم النهاردة عن كل وسائل المواصلات المتاحة في سيوة..

عجلة

من أجمل وألطف الطرق اللي ممكن تتحرك من خلالها في سيوة، خاصة إن سيوة مش كبيرة ومنها طبيعة ومنها رياضة! إيجار العجلة بيكون حوالي 50 جنيه في اليوم، وبتأجرها من عند مدخل مدينة شالي الأثرية في وسط المدينة وقريب جدًا من فندق ومطعم البابنشال


تروسيكل 

هي اكتر وسيلة مواصلات منتشرة في سيوة وبيقولوا عليه " توك توك " سعره كويس ومنتشر في كل مكان تقريبًا، السعر بيكون بالاتفاق برده ولكن المتوسط 20 – 25 جنيه لو المشوار طوله 3-4 كم.. وممكن تتفق مع حد معين يوصلك ويجيبلك بعد فترة وهما محترمين جدًا بصراحة ومواعيدهم مضبوطة.


عربية ملاكي

العربيات الملاكي هناك معظمها دفع رباعي، وهي مريحة وقوية وتشيل عدد كبير على الأقل 6، بس عيبها الوحيد هو سعرها العالي اللي بيتراوح بين 1000 ل 1500 جنيه في اليوم، وده طبعًا لإنها بتكون قادرة تدخل الصحرا.. بس اللطيف ان السعر ده هيتوزع على العدد اللي في العربية فالسعر ممكن يكون افضل شوية.


كاريته 

الكاريته هي العربية اللي بيجرها حمار، ومناسبة جدًا للمسافات أصغر من 2-3  كم وبالتالي فهي مناسبة جدًا لسيوة، ملهاش سعر ثابت وكله بالاتفاق مع الراجل، لكن هيكون من اللطيف انك تجربها ولو لمرة واحدة


ميكروباص 

من الاختيارات اللطيفة لو عددكم 10 أو أكتر وهيوفر عليكم كتير، السعر بيكون على حسب الاتفاق وبيتم اما حسب الوقت او حسب المشوار وبيفرق طبعا اذا كان هينتظر ولا هيوصلكوا ويمشي خلاص 


هدوء وجمال سيوة بيخليها دايمًا وجهه مثالية لمحبي الطبيعة والروقان.. فالمرة الجاية اللي هتسافر فيها سيوة اتأكد إنك تنوع من وسائل انتقالك فيها عشان تعيش التجربة كاملة، ومتنساش ان الاسعار بتتغير كل فترة، فلو فيه سعر مختلف ابعتلنا السعر الجديد