لعشاق المطبخ السيوي : بالصور والاسعار قائمة بأحلي مطاعم وكافيهات سيوة ننصحك بتجربتها

6 مطاعم في سيوة لازم تجربهم: كل اللي محتاج تعرفه عن المطبخ السيوي!

من أكتر الحاجات المميزة في سيوة هي الأكل والطريقة الفريدة اللي بيتعمل بيها، وعشان كده هنتكلم مخصوص عن المطاعم اللي بتقدم حاجة مختلفة زي الأطباق السيوية اللي مش موجودة في القاهرة وكمان القعدات التحفة اللي تفتح نفسك على الأكل!  يلا بينا

• مطعم عبده 

من المعالم الرئيسية في سيوة، يعني مينفعش تروح سيوة إلا وتجرب الأكل هناك سواء في الغداء أو الفطار، مطعم عبده موجود في ميدان السوق في سيوة.. الخدمة هايلة والمكان دافي ولطيف جدًا، لو هنتكلم على الأكل فأجمد حاجة عنده هي الملوخية السيوي والبانيه، اما الفراخ فبييجي معاها سلاطات وكانز ورز وبطاطس وسعرها أقل من 100 جنيه.. وبعيدًا عن الأكل الجميل هناك  فالناس بتروح مطعم عبده عشان فيه روح سيوة وخاصة الديكور البسيط وجذوع النخل اللي هتعيشك جو سيوة البدائي

• مطعم كنوز سيوة

موجود على بعد 100 متر من وسط الواحة، قاعدته حلوة جدًا وسط النخل، عنده أكلات بيعملها بشكل مميز جدًا زي الفراخ بالزيتون ده غير الملوخية السيوي " ملوخية ناشفة " وسعرها 90 حنيه.. أما الفطار فبترشح مربي الجزر ومربي البرتقان..

• مطعم علي عليوة 

من أجمد الأماكن اللي بتعمل الأكل بطريقة أبو مردم، وبيتنوع بين الفراخ واللحمة والبط  والقعدة على الأرض في أوض خاصة.. الفراخ ب 45 جنيه والبط ب 55 جنيه واللحمة ب 85 جنيه.. مطعم علي عليوة موجود في قلب المدينة ومشهور جدًا هناك، وعليه أكتر من 100 ريفيو على جوجل مابس وتقييمه "4.1" ومتنساش تحبس بعد الأكل بشاي لويزا 

• مطعم البابنشال 

موجود في وسط المدينة فوق فندق البابنشال، أجمد حاجة هناك هي الفيو، اللي بيطل على قلعة شالي الاثرية! الفيو تحفة ويتسحق إنك تجرب تتغدا او تتعشى هناك ولو لمرة واحدة! ولو بتدور على مطاعم رومانسية، فالبابنشال لازم يكون أول مطعم تروحه في سيوة 

• مطعم شهرزاد 

من المطاعم الموجودة برده في وسط الواحة واسعاره في اللطيف وأقل بشوية حلوين من عبده وعلي عليوة، عنده اطباق كتير متنوعة زي المشويات ده غير الاكل السيوي المميز، تقييمه على جوجل مابس "4.2" ..  وفيه ميزه عن باقي المطاعم انه مطعم وكافيه فتقدر تكمل قعدتك هناك وتتفرج على الماتشات هناك وانت بتاكل أو بعد ما تخلص 

• مطعم نور الواحة

موجود على بعد 300 متر تقريبا من ميدان السوق وقاعدته روشة جدًا والنخل بيحاوطك من كل مكان، ولو رايح مش جعان مع صحابك فتأكد إن القعدة الحلوة هتفتح نفسك على الأكل! عنده أكل متنوع زي المشويات ولكن المختلف اللي بيقدمه هو البيتزا.. تقدر تجربها لو قاعد في سيوة كام يوم وحابب تغير المشاوي وتقييم المطعم على جوجل مابس " 4.4 " مع اكتر من 70 ريفيو.. 

سيوة ممتعة لأقصى حد وأكلها وحلاوته ميقلش نهائي عن جمال هدوءها وطبيعتها وناسها، وعشان كده حاولنا نساعدك انك تخطط للمطاعم اللي هتزورها هناك، بألف هنا ومتنساش تبعتلنا صورك وانت هناك .