11 رحلة تقدر تعملها في يوم واحد في البحر الأحمر! الاسعار وأفضل مواعيد الزيارة
مدن البحر الأحمر كلها من أهم وجهات المسافرين حوالين العالم وده بسبب تعدد الأنشطة اللي يقدروا يعملوها واشهرهم الغطس والسنوركلنج وعشان كده عملنا تجميعة لــ 11 رحلة من رحلات اليوم الواحد لازم تخليهم في بالك لما تخطط للسفرية الجاية!
مرسى مبارك – مرسى علم
من أشهر مناطق الغطس في مرسى علم بسبب وجود السلاحف البحرية الكبيرة وعروس البحر " الدوجنج" والدلافين فيها، مرسى مبارك ، المكان موجود على بعد 60 كم من مرسى علم، وافضل وقت لزيارة مرسى علم بين الخريف والربيع وخصوصاً في ابريل وفيه رحلات بتطلع من مرسى علم مخصوص لهناك وبتتضمن الانتقالات من فندقك وتكلفة دخول المرسى والمركب اللي هتقضي عليه اليوم كله ومعدات السنوركلنج والغداء ومشروبات خفيفة وبتتكلف حوالي 750 جنيه.. ولتفاصيل اكتر عن زيارة مرسى مبارك من هنــــــــا
وادي الوشواش – نويبع
هو وادي موجود في قلب الصحرا بيتكون من تساقط السيول في الشتاء بين الجبال وبيتكون من 3 عيون مياه عذبة وعمقه حوالي 8م وموجود على بعد 20 كم من نويبع و90 كم من دهب .. افضل وقت لزيارة وادي الوشواش بين اكتوبر وابريل ومفيش تكلفة لزيارته لو جاي من دهب غير مواصلاتك والدليل البدوي وبتتكلف حوالي 400 جنيه.. ولتفاصيل اكتر عن زيارة وادي الوشواش من هنـــــــــا
القلعان – مرسي علم
أشهر صور لمرسى علم موجودة في القلعان وهي صور شجر المنجروف، بنرشحها لمحبي الروقان والهدوء والصحبة الحلوة من أهل قبائل العبابدة والبشارية، القلعان هي أول قرية في مصر شغالة بالكامل عن طريق الطاقة المستدامة وهي على بعد 100 كم من مرسى علم وقربها من شاطيء حنكوراب ميزة كبيرة انك تزورهم سوا.. افضل وقت لزيارة القلعان بين اكتوبر وابريل ومفيش تكلفة لزيارتها غير مواصلاتك من مرسى علم حسب العربية اللي هتتفق معاها وتصريح الجيش – 50 جنيه - لليلة لو هتبات هناك.. ولتفاصيل اكتر عن زيارة القلعان من هنـــــــــا
راس محمد – شرم الشيخ
من أهم المحميات الطبيعية في مصر كلها وده للتنوع الكبير فيها في الحياة البرية والمائية وأهمهم وجود أكتر من 150 نوع من الشعاب المرجانية وشجر المنجروف النادر وغيرهم كتير! محمية راس محمد موجودة على بعد 12 كم من شرم الشيخ وافضل وقت لزيارتها بين بداية الخريف لنهاية الربيع، وفيه رحلات بتطلع من شرم مخصوص للمحمية وبتتضمن الانتقالات من فندقك وتكلفة دخول المحمية وبتتكلف حوالي 500 جنيه.. ولتفاصيل اكتر عن زيارة محمية رأس محمد من هنـــــــــا
سطايح – مرسى علم
من أجمل مناطق الغطس والسنوركلنج في مرسى علم وده لإنها أكبر مكان لتجمع الدلافين في البحر الاحمر كله! سطايح موجودة جوه البحر وبتروح هناك بمركب من حماطة وبتبعد عن مرسى علم حوالي 100 كم، وافضل وقت لزيارة سطايح بين مارس وديسمبر لإنه أكتر وقت فيه تجمعات للدلافين طول السنة.. وفيه رحلات بتطلع من مرسى علم مخصوص لهناك وبتتضمن الانتقالات من فندقك وتكلفة دخول المرسى والمركب اللي هتقضي عليه اليوم كله ومعدات السنوركلنج والغداء ومشروبات خفيفة وبتتكلف حوالي 1100 جنيه.. ولتفاصيل اكتر عن زيارة شعاب سطايح من هنـــــــــا
النيزك – مرسى علم
فيه حكايات كتير بتقول إن سبب وجود المنقطة دي هو سقوط نيزك فيها، لكن الأهم إنه مكان لطيف جدًا لمحبي الغطس عشان عمقه من 8 م ل 10 م وميزته الكبيرة هي قربه من مرسى علم – على بعد 15 دقيقية – من المدينة، ده غير قربة الشديد من محمية صمداي اللي تقدر تزورهم الاتنين في يوم واحد.. افضل وقت لزيارة شاطيء النيزك بين اكتوبر وابريل ولتفاصيل اكتر عن النيزك من هنـــــــــا
چانجل اكوا بارك - الغردقة
هي أكبر اكوا بارك في الغردقة والبحر الأحمر كله وفيها ملاعب كرة قدم وتنس وميني جولف غير مطاعم مختلفة ومتنوعة من مطابخ كتير حوالين العالم! موجودة على بعد 20 كم من وسط الغردقة ، وافضل وقت لزيارتها بين الخريف والربيع. وفيه رحلات بتطلع من الغردقة مخصوص لهناك وبتتضمن الانتقالات من فندقك وتكلفة دخول الاكوا بارك والغداء ومشروبات خفيفة وغير منطقة الالعاب المائية اللي عبارة عن 14 حمام سباحة و35 Water slides عملاقة وبتتكلف حوالي 650 جنيه.. ولتفاصيل اكتر عن چانجل اكوا بارك من هنـــــــــا
محمية صمداي – مرسي علم
من أهم أماكن الغطس في مرسي علم وده بسبب وجود الدلافين اللي بتعيش في مجموعات كبيرة جدًا وميزته الكبيرة هي قربه الشديد من مرسى علم – على بعد 15 دقيقية – من المدينة، ده غير قربة من شاطيء النيزك اللي تقدر تزورهم الاتنين في يوم واحد، والمواعيد المسموح فيها بالغطس من 9 الصبح ل 3 العصر .. افضل وقت لزيارة بيت الدولفين في صمداي هو بين مارس وديسمبر عشان اعداد الدلافين بتكون أكتر بكتير بالمقارنة بباقي السنة ولتفاصيل اكتر عن زيارة محمية صمداي من هنـــــــــا
حنكوراب – مرسى علم
من أشهر وأهم الشوطيء في مرسى علم وبيتصدر كتير من تصنيفات أفضل الشواطيء على مستوى العالم وده بسبب الرمل الناعم جدًا فيه ووجود شعاب مرجانية مختلفة ومميزة جدًا هناك، حنكوراب أو شرم اللولي حسب الإسم البدوي له موجود على بعد 70 كم من مرسى علم، وقربه النسبي من قرية القلعان ميزة كبيرة عشان تقدر تزورهم سوا.. افضل وقت لزيارة حنكورب بين اكتوبر وابريل ومفيش تكلفة لزيارتها غير مواصلاتك من مرسى علم حسب العربية اللي هتتفق معاها وتصريح الجيش – 50 جنيه - لليلة لو هتبات هناك.. ولتفاصيل اكتر عن زيارة شاطيء حنكورب من هنـــــــــا
قبر البنت – دهب
هو واحد من أجمل مناطق الغطس والسنوركلنج في دهب، قبر البنت على بعد 20 كم من دهب وقريب جدًا من الثري بوولز، وافضل وقت لزيارة المنطقة بين اكتوبر وابريل وفيه رحلات بتطلع من دهب مخصوص لهناك وبتتضمن الانتقالات والفطار والغداء ومعدات الغطس وبتتكلف حوالي 400 جنيه.. ولتفاصيل اكتر عن زيارة قبر البنت من هنـــــــــا
حماطه – مرسى علم
من الأماكن المشهورة جدًا في البحر الأحمر كله في الصيد والغطس! مرسى حماطه موجود على بعد 100 كم من مرسى علم، وافضل وقت لزيارة حماطه بين الخريف والربيع.. وفيه رحلات بتطلع من مرسى علم مخصوص لهناك وبتتضمن الانتقالات من فندقك وتكلفة دخول المرسى والمركب اللي هتقضي عليه اليوم كله ومعدات السنوركلنج والغداء ومشروبات خفيفة وبتتكلف حوالي 850 جنيه.. ولتفاصيل اكتر عن زيارة حماطة من هنـــــــــا
.jpg)
وأخير متنساش تقولنا ايه اكتر مكان اتحمست تروحه؟ وهتسافرله امتى!
