شعاب صمداي: الغطس مع الدلافين في مرسي علم،  كل اللي محتاج تعرفه عن محمية صمداي وأفضل مواعيد الزيارة

بيت الدولفين أو  Sha’ab Samadai Reef هو أشهر مكان للغطس في مرسي علم،  ميزته الكبيرة هو قربة الشديد من المنطقة وسهولة الوصول له، ده بالإضافة للشعاب المرجانية اللي تعتبر بيت الدلافين هناك وده بيخليها مكان مثالي للسنوركلنج أو الغطس وعشان كده هنتكلم عن محمية صمداي بتفاصيل أكتر وموقعها وأفضل مواعيد الزيارة..
 
محمية صمداي
 

ايه هي محمية صمداي  

هي واحدة من أهم المحميات الموجودة على البحر الأحمر وده بسبب وجود شعاب مرجانية نادرة بتاخد شكل حدوة الحصان عرضها 500م وطولها 900م وده خلاها بيئة خصبة جدًا لوجود الدلافين اللي بتعيش وتتحرك هناك في مجموعات كبيرة جدًا.. والمنطقة هناك متقسمة ل4 أجزاء.. الأول: منطقة مخصصة للدلافين بس وممنوع فيها أي انشطة والتانية: مسموح فيها بالسباحة بس أما التالتة: فهمي مخصصة لانتظار اللنشات السياحية وأخيرًا الرابعة: فهي مسموح فيها بجميع الأنشطة... واتسمت المحمية بالإسم ده تيمنًا بطائر " الصمد " اللي كان بيزور المنطقة في موسم هجرته !
 
محمية صمداي بمرسي علم
 

موقعها فين بالظبط

بيت الدولفين موجود في قلب البحر الأحمر على بعد 7 كم من الشاطيء، قريب جدًا من مرسى علم حوالي 10 -15 دقيقة بالعربية ودي ميزة كبيرة جدًا عكس بيت الدولفين اللي موجود في حماطة مثلًا ويبعد حوالي 100 كم من مرسى علم.. أما لو جاي من الغردقة فالمسافة حوالي 290 كم وتاخدهم بالعربية في 3 ساعات ونص تقريبًا.. 
 
صمداي مرسي علم
 

احسن وقت لزيارة بيت الدولفين في صمداي 

الصيف هناك بيبدأ من نهاية مايو، الجو مشمس وحر جدًا خاصة بالنهار، لكن فيه سحب لطيفة و درجة الحرارة بتكون بين 30°  و 37°. أما في الشتاء فالجو لطيف جدًا، دافي ومشمس بالنهار وبارد شوية بليل والمطر نادر، ودرجة الحرارة بين  24-27°C.
لكن من بداية من شهر مارس وحتى ديسمبر بيكون أعداد الدلافين أكتر بكتير مقارنة بباقي شهور السنة..
 
محمية صمداي
 

اتنين في واحد 

بننصح دايمًا إنك تروح شاطيء النيزك في نفس اليوم اللي هتعمل فيه سنوركلنج او تغطس في شعاب صمداي وده لإنهم قريبين جدًا من بعض، ممكن تبدأ بالنيزك وهناك هتقضي ساعة أو اتنين بالكتير وبعدين تتحرك على محمية صمداي ولو حابب تعرف معلومات أكتر عن شاطيء النيزك  شوف اللينك دة من هنا.. مع العلم إن المواعيد المسموح بيها لنزول المياه  في صمداي بتبدأ من 9 الصبح  لحد 3 العصر.. 
 
صمداي بيت الدلاقين مرسي علم
 
محمية صمداي من الأماكن اللي مش واخده حقها للأسف في الدعاية، ولكن ده مينفعش إنها تجربة مدهشة ! يكفي إنك تكون بعيد عن العالم كله وبتعوم مع مئات الدلافين.. المرة الجاية اللي هتسافر فيها لمرسى علم متنساش تحط محمية صمداي في قائمة الرحلات والانشطة اللي هتعملها وابعتلنا صورتك مع الدلافين