لمحبي الاستجمام: قرية القلعان متعة الهدوء والروقان علي ساحل البحر الاحمر ، تعرف كل التفاصيل والاسعار

 

محبي الروقان والهدوء والطبيعة غالبًا ما بيهربوا لمرسى علم أو لسينا عموماً، فلو كنت من المحظوظين اللي بيخططوا يروحوا مرسى علم قريب، فالمكان المناسب هيكون قرية القلعان، وهي أول قرية شغالة بالطاقة المستدامة بالكامل! وأهلها من قبائل العبابدة والبشارية هما الطف واطيب ناس ممكن تقابلهم في سفرية.. طبيعة قلعان المختلفة وهدوءها الرهيب ووجود اشجار المنجروف هناك في وسط المياة بشكل مدهش بيخلي الناس من كل العالم تيجي تشوفها، كل دي أسباب تخلينا نتكلم عن المكان أكتر وإزاي تروح هناك وأسعار الخدمات المتاحة هناك وأخيرًا افضل مواعيد الزيارة..

 

 

 

القلعان موجودة على البحر الأحمر داخل نطاق محمية وادي الجمال على بُعد 100 كم من مدينة مرسى علم وبتاخد من ساعة لساعة وربع بالعربية، ودي تعتبر ميزة كبيرة للقلعان إنك تزورها لو انت في مرسى علم بعكس الغردقة اللي بتبعد عنها حوالي 380 كم – 4 ساعات تقريبًا – فهتكون بعيدة شوية! ومن مميزات موقع القلعان برده إنه قريب جدًا من شاطيء حنكوراب أو شرم اللولي فتقدر تروحهم في يوم واحد، أما بقى لو جاي من بورت غالب فالمسافة حوالي 160  كم وتقدر تاخدها في ساعتين تقريبًا بالعربية. 

 

 

الصيف هناك بيبدأ من نهاية مايو، الجو مشمس وحر جدًا خاصة بالنهار، لكن فيه سحب لطيفة و درجة الحرارة بتكون بين 30°  و 37°. أما في الشتاء فالجو لطيف جدًا، دافي ومشمس بالنهار وبارد شوية بليل والمطر نادر، ودرجة الحرارة بين  24-27°C. لكن بشكل عام بنرشحلك إن تروح ما بين الخريف والربيع لإن مشكلة الصيف بتكون في الرطوبة العالية جدًا أكبر منها إرتفاع درجة الحرارة

 

 

 

معظم اللي بيروح قلعان بيكون موجود بالفعل في مرسى علم ومبيروحهاش لوحدها، لإن في طريقك ليها هتعدي الأول على النيزك وحنكوراب  فتقدر تروحهم كلهم في يوم واحد! عامًة القلعان ملهاش مصاريف للدخول ومش هتحتاج معاك دليل او مرشد، كل الحكاية هتكون تكلفة الانتقالات واللي بتتراوح بين 500 جنيه وحتى 1000 جنيه بداية من مرسى علم وحتى نهاية يومك في قلعان وانت وشطارتك بقى.. وفي حنكوراب نفسها تقدر تشرب جَبَنة ( قهوة ) أو شاي أو اي مشروبات تانية في الخيمة وتكلفتها عادية، وكذلك لو عاوز تخيّم فالناس هناك ودودة جدًا وفيه خدمات زي دورات مياه كويسة جدًا والمياه والكهرباء متوفرين معظم الوقت، ده بس لازم تاخد بالك إن ده بيتطلب تصريح من حرس الحدود في مرسي علم وبيتكلف تقريبًا 50 جنيه لليلة الواحدة.. وأخيرًا تكلفة الإقامة هناك وبتختلف بين إنك معاك خيمتك أو هتنزل في الغرف الموجودة هناك – وهي مقبولة وأقل من جيدة – والسعر عامة بيتراوح بين 50 جنيه ل 150 جنيه في الليلة الواحدة..

 

 

 

من بين عشرات الأماكن الروشة والرايقة اللي زورناها إلا إن قلعان حقيقي مميزة وفيها خدمات شبه متكاملة ومش هتحتاج حاجة أكتر من اللي موجود، ده غير الأسعار المعقولة اللي مش هتلاقيها في مكان بالجمال ده.. كل دي أسباب تخلي سفريتك الجاية لمرسى علم على الأقل تقضي يوم فيها في القلعان، ومتنساش تبعتلنا صورتك مع شجر المنجروف  ولو حابب تحجز الرحلات الداخلية في مرسي علم تقدر تشوف اللينك دة من هنـــــــــــا