شاطيء حنكوراب: أهم شواطيء مرسى علم، الأسعار وأفضل مواعيد الزيارة
في كتير من التصنيفات اللي بتتكلم عن أفضل الشواطيء في العالم وفي الشرق الأوسط هتلاقيهم بيتكلموا عن شاطي حنكوراب أو " شرم اللولي " وهو الإسم اللي بيستخدمه البدو والسكان المحليين هناك، الشاطي رملي والمميز فيه إن الرمل ناعم جدًا ده غير لونه الفاتح اللي هيخليك للوهلة الأولى تفتكر إن لونه أبيض! بالأضافة لوجود شعاب مرجانية مميزة ومختلفة جدًا خلت من الشاطيء ده بالتحديد مكان رائع للغطس والسنوركلنج... وعشان كده هنتكلم أكتر عن إزاي تروح هناك وأسعار الخدمات المتاحة هناك وأخيرًا افضل مواعيد الزيارة.
موقع شاطيء حنكوراب
شاطيء حنكوراب موجود على البحر الأحمر داخل نطاق محمية وادي الجمال على بُعد 70 كم من مدينة مرسى علم وبتاخد من 50 ل 60 دقيقة بالعربية، ودي تعتبر ميزة كبيرة لحنكوراب إنك تزورها لو انت في مرسى علم بعكس الغردقة اللي بتبعد عنها حوالي 350 كم – 4 ساعات تقريبًا – فهتكون بعيدة شوية! ومن مميزات موقع شاطيء حنكوراب برده إنه في طريقك لو رايح القلعان فتقدر تروحهم في يوم واحد، أما بقى لو جاي من بورت غالب فالمسافة حوالي 130 كم وتقدر تاخدها في ساعة ونص تقريبًا.
احسن وقت لزيارة شاطيء حنكوراب
الصيف هناك بيبدأ من نهاية مايو، الجو مشمس وحر جدًا خاصة بالنهار، لكن فيه سحب لطيفة و درجة الحرارة بتكون بين 30° و 37°. أما في الشتاء فالجو لطيف جدًا، دافي ومشمس بالنهار وبارد شوية بليل والمطر نادر، ودرجة الحرارة بين 24-27°C. لكن بشكل عام بنرشحلك إن تروح ما بين الخريف والربيع لإن مشكلة الصيف بتكون في الرطوبة العالية جدًا أكبر منها إرتفاع درجة الحرارة
.jpg)
أسعار زيارة شاطيء حنكوراب في مرسى علم
معظم اللي بيروح حنكوراب بيكون موجود بالفعل في مرسى علم ومبيروحهاش لوحدها، لإنك هتقضي هناك ساعتين تلاتة بالكتير ولكن تقدر تكمل لحد القلعان! عامةً حنكوراب ملوش أي مصاريف لدخول الشاطيء ومش هتحتاج معاك دليل او مرشد، كل الحكاية هتكون تكلفة الانتقالات واللي بتتراوح بين 500 جنيه وحتى 1000 جنيه بداية من مرسى علم وحتى نهاية يومك في قلعان وانت وشطارتك بقى.. وفي حنكوراب نفسها تقدر تشرب جَبَنة ( قهوة ) أو شاي أو اي مشروبات تانية وتكلفتها عادية، وكذلك لو عاوز تخيّم فالناس هناك ودودة جدًا ومعندهاش مشكلة وبدون أي تكلفة وإن كنّا مبنفضّلش ده لإن المنقطة مفيهاش خدمات زي دورات المياه أو حتى مياه، ده غير إنه بيتطلب تصريح من حرس الحدود في مرسي علم وبيتكلف تقريبًا 50 جنيه لليلة الواحدة.
شاطيء حنكوراب هو تقريبًا أشهر وأجمل شاطيء في مرسى علم كلها ودايمًا بيدخل في تصنيف أفضل الشواطيء في العالم، وهتشوف بنفسك لما تروح كمية الأجانب اللي جايين مخصوص عشان يعملوا هناك سنوركلنج، فلو مرسى علم في خططك الفترة الجاية، لازم تخصص يوم تزور فيه حنكوراب والقلعان..
