شاطيء النيزك: حمام سباحة في قلب البحر الأحمر، الأسعار وسبب التسمية وأفضل مواعيد الزيارة
واحد من أجمل الأماكن وأغربها اللي ممكن تزورها في مرسى علم، حمام سباحة طبيعي بيجيله الناس اللي تعرف قيمة الجمال وقيمه السباحة في مكان فريد زي ده! النيزك عبارة عن مجموعة صخور كونت حاجة شبه البحيرة طولها 9م ، وموجود علي مقربة من محمية صمداي – حوالي 5 دقايق - اللي تقدر تشوف هناك الدلافين والشعب المرجانية! كل دي أسباب تخلينا نتكلم بتفاصيل أكتر عن الشاطيء وسبب التسمية والأسعار وايه افضل مواعيد الزياره كمان..
سبب التسمية بشاطيء النيزك؟
فيه قصص وحكايات كتير بتقول إن السبب في التسمية هو سقوط نيزك في المنطقة دي وهو اللي سبب الحفرة الكبيرة جدًا دي واللي عمقها من 8م ل 10م، ومع إن علماء الجيولوجيا نفوا إن ده السبب الحقيقي، إلا إن اسم المكان وجماله بيجذب ناس كتير حوالين العالم إنها تزور الشاطيء وتستمع بالسباحة والغطس فيه!
موقع شاطئ النيزك فين بالظبط؟
شاطيء النيزك موجود على البحر الأحمر داخل نطاق محمية وادي الجمال وقريب جدًا من مدينة مرسى علم اللي بيبعد عنها حوالي 13 كم وبتاخد تلت ساعة بالعربية، ومن مميزات موقع شاطيء النيزك انه في طريقك لو رايح شاطيء حنكوراب أو القلعان فتقدر تخليهم كلهم في يوم واحد، تبدأ من النيزك وتاخد لفة في حنكوراب وتقضي ليلتك في القلعان! أما لو جاي من بورت غالب المسافة حوالي 75 كم وتقدر تاخدها في ساعة تقريبًا.
احسن وقت لزيارة شاطيء النيرك
الصيف هناك بيبدأ من نهاية مايو، الجو مشمس وحر جدًا خاصة بالنهار، لكن فيه سحب لطيفة و درجة الحرارة بتكون بين 30° و 37°. أما في الشتاء فالجو لطيف جدًا، دافي ومشمس بالنهار وبارد شوية بليل والمطر نادر، ودرجة الحرارة بين 24-27°C. لكن بشكل عام بنرشحلك إن تروح ما بين الخريف والربيع لإن مشكلة الصيف بتكون في الرطوبة العالية جدًا أكبر منها إرتفاع درجة الحرارة.
أسعار زيارة النيزك في مرسى علم
معظم اللي بيروح النيزك بيكون موجود بالفعل في مرسى علم ومبيروحهاش لوحدها، لإنك هتضي هناك ساعة او اتنين بالكتير ولكن هتكمل على الطريق للجنوب وتقدر تزور شاطيء حنكوراب وتعمل سنوركلنج هناك وتختم بالقلعان وتبات هناك سواء في الكامب أو حتى تخيّم! عامةً النيزك ملوش أي مصاريف لدخول الشاطيء ومش هتحتاج معاك دليل او مرشد، كل الحكاية هتكون تكلفة المواصلات واللي بتتراوح بين 500 جنيه وحتى 1000 جنيه بداية من مرسى علم وحتى نهاية يومك في قلعان وانت وشطارتك بقى ولو حابب تشوف الرحلات الداخلية في مرسي علم تقدر تعرف كل التفاصيل _ وتحجزها من هنا
مرسى مبارك رحلة مينفعش تفوتها لو موجود في مرسى علم، سعرها حلو جدًا وقريبة وهتشوف فيها حاجات مش موجودة في العالم كله إلا عندنا احنا بس وعشان كده بيجيلها الاجانب من بلاد كتير جدًا حوالين العالم.. ومتنساش تبعتلنا صورك مع السلاحف لما تروح هناك
