جبر البنت : استمتع بسحر الاعماق في أجمل مكان للدايفينج والاسنوركلنج في دهب

 

معظمنا بيروح دهب مرة واحدة على الأقل في السنة، لكن اللي يعرف عن "قبر البنت" قليل جدًا مقارنة بأماكن تانية مشهورة زي الثري بولز او أبو جالوم مثلًا وده غريب جدًا لإنها واحدة من أجمل أماكن الغطس والسنوركلنج في دهب كلها ده غير إنها قريبة من المدينة والتنوع الكبير اللي فيها بيخليها في أولوية الأماكن اللي بيزوها الأجانب في دهب، وعشان كده هنتكلم بتفاصيل اكتر عن الاسعار وازاي تروح قبر البنت وافضل مواعيد الزيارة وليه اتسمت بالإسم ده!

 

 

• سبب تسمية قبر البنت

مفيش حد عنده رواية أكيده، لكن الإسطورة بتقول إن فيه بنت من أهالي دهب وقعت في حب اجنبي في وقت كان دهب مقفولة على نفسها وبيمنعوا البنات تخرج بعد سن ال12، حتى كان عندهم مقولة مشهورة "بناتنا زي الجواهر مابتظهرش"  وعشان كده أهلها قرووا يعاقبوها والبنت خافت وهربت منهم ورمت نفسها في المياة في المنقطة دي وعشان كده اتسمت ب " قبر البنت " .. وإن كان محدش يعرف حقيقة الرواية دي من عدمها إلا إن إسمها المختلف خلى ناس كتير تروح هناك وتهتم بإستكشاف المنطقة دي..

 

 

 

قبر البنت موجود جنوب دهب بحوالي 20 كم وقريب جدًا من الثري بوولز ووادي جني.. وتقدر تروح هناك من خلال أي عربية ربع نقل – وسيلة المواصلات الرئيسية في دهب –  والطريق بياخد نص ساعة تقريبًا، ويعتبر موقعها مميز جدًا لقربه من دهب وده بيخليه مكان عظيم لرحلات اليوم الواحد عشان هتقضي اليوم كله هناك مش هتاخد نص اليوم في الطريق لوحده. 

 

 

الصيف في دهب بيبدأ من نهاية مايو، الجو مشمس وحر خاصة بالنهار و درجة الحرارة بتكون بين  30°  و 35°. أما في الشتاء فالجو لطيف جدًا، دافي ومشمس بالنهار وبارد بليل، ودرجة الحرارة بين  15 و25 °C.  والمطر نادر جدًا، أقل من 5 أيام في السنة كلها.. وبالتالي فأحسن وقت تروح فيه قبر البنت من بداية أكتوبر ولحد نهاية أبريل.

 

 

معظم اللي بيروح قبر البنت بيكون موجود بالفعل في دهب وعشان كده هنتكلم عن افضل رحلة واحسن سعر لرحلة اليوم الواحد لقبر البنت من دهب وده بيتضمن الانتقالات.. بياخدك من مكان إقامتك او فندقك في دهب الساعة 7:30 صباحًا وبيوديك لحد منطقة قبر البنت وهناك بتطلع على المركب اللي هتقضى عليه اليوم كله.. بتبدأ بالفطار وبعدين بتنزل تعمل سنوركلنج وبيتوفرلك كل المعدات اللي هتحتاجها زي الماسك والزعانف وأخيرًا فمع المياه والمشروبات هتاخد وجبة الغداء بتاعتك على المركب وترجع آخر اليوم للفندق من تاني .. اليوم بيبدأ من 8 الصبح وبتقضي اليوم في البحر وترجع تاني دهب على بعد العصر تقريبًا الساعة 4 م واليوم بيكلفك حوالي 400 جنيه متضمن كل اللي فوق ده.. وتقدر تحجز من هنا  

 

 

قبر البنت من الأماكن اللي برغم شهرتها عند الاجانب اللي بييجوا دهب إلا إن معظمنا ميعرفهاش حتى لو راح دهب اكتر من مرة، وعشان كده بنشجعك إنك لازم تحطها في أولوياتك المرة الجاية لإن سعرها عظيم حقيقي ده غير إنه مكان رائع ومختلف للغطس في دهب... ومتنساش تبعتلنا صور لما تروح