مرسى مبارك: أجمل مكان للغطس مع الدلافين في البحر الأحمر، الأسعار وأفضل مواعيد الزيارة
مرسى مبارك هو اكتر مكان مناسب في مصر لو نفسك تعوم مع السلاحف البحرية الكبيرة وعروس البحروالدلافين.. والجميل في الموضوع إن كل الكائنات البحرية هناك لطيفة ومتعودة على وجود البني آدمين حواليها وده بيخليها الغطس آمن بشكل كبير، لو عاوز تقضى يوم مختلف في قلب البحر الأحمر وقريب من مرسى علم والغردقة فهنتكلم بتفاصيل أكتر عن الأسعار وإزاي تروح لمرسى مبارك وأفضل مواعيد الزيارة كمان..
-
ايه هو مرسى مبارك
مرسى مبارك هو أكبر تجمع للسلاحف البحرية وعروس البحر " الدوجونج " في البحر الأحمر كله وده سبب سبب شهرة المكان حوالين العالم! المميز في المنطقة دي واللي خلت الحيوانات دي تعيش هناك من مئات السنين هو التربة الرملية اللي الحشائش البحرية بتنمو فيها وده الغداء الرئيسي للسلاحف وعروس البحر، أهم حاجة إنك تنزل تستمع بالغطس في بيئتهم بدون ما تلمسهم أو تأكلهم او حتى تقطع خط سباحتهم لإن ده هيخلي الكائنات دي تغير مسار سباحتها وده مع الوقت هيخليها تسيب المكان وتدور على أماكن جديدة تعيش فيها..
-
موقعها فين بالظبط
مرسى مبارك موجودة على البحر الأحمر وقريبة جدًا من بورتو غالب وحوالي 13 كم من مطار مرسى علم، اما لو جاى من مدينة مرسى علم نفسها هتكون حوالي 60 كم ودي مسافة ممتازة مقارنة بباقي رحلات اليوم الواحد اللي هتقدر تعملها هناك وبتاخد ساعة تقريبًا بالعربية، ولو جاي من القاهرة فالمسافة حوالي 680 كم وتقدر تروحها بالمواصلات عن طريق أي اتوبيس رايح مرسى علم وبتنزل على الطريق قدام المرسى
-
احسن وقت لزيارة مرسى مبارك
الصيف هناك بيبدأ من نهاية مايو، الجو مشمس وحر جدًا خاصة بالنهار، لكن فيه سحب لطيفة و درجة الحرارة بتكون بين 30° و 37°. أما في الشتاء فالجو لطيف جدًا، دافي ومشمس بالنهار وبارد شوية بليل والمطر نادر، ودرجة الحرارة بين 24-27°C.
-
أسعار زيارة مرسى مبارك
معظم اللي بيروح مرسى مبارك بيكون موجود بالفعل في مرسى علم وعشان كده هنتكلم عن أفضل رحلة وأحسن سعر لرحلات مرسى مبارك من مرسى علم، بيتضمن الانتقالات بميني باص مكيف بياخدك من مكان اقامتك لحد المرسى وتكلفة دخول المرسى نفسها ومن هناك بتطلع على المركب اللي هتقضى عليه اليوم كله.. وبتنزل تعمل سنوركلنج وبيتوفرلك كل المعدات اللي هتحتاجها زي الماسك والزعانف وأخيرًا فمع المياه والمشروبات هتاخد وجبة الغداء بتاعتك على المركب وترجع آخر اليوم للفندق من تاني .. اليوم بيبدأ من 8 الصبح وبتقضي اليوم كله في البحر وترجع تاني مرسى علم على المغرب تقريبًا واليوم بيكلفك حوالي 750 جنيه متضمن كل اللي فوق ده.. وتقدر تحجز من هنا
مرسى مبارك رحلة مينفعش تفوتها لو موجود في مرسى علم، سعرها حلو جدًا وقريبة وهتشوف فيها حاجات مش موجودة في العالم كله إلا عندنا احنا بس وعشان كده بيجيلها الاجانب من بلاد كتير جدًا حوالين العالم.. ومتنساش تبعتلنا صورك مع السلاحف لما تروح هناك .
