نفسك تعوم مع الدلافين ؟ تعرف علي اسعار رحلة سطايح مرسي علم وافضل مواعيد الزيارة

 

بيت الدولفين أو Dolphin Reef House  هو واحد من أشهر أماكن الغطس في البحر الأحمر والرحلة اللي لازم تعلملها وانت في مرسى علم، بتروح لمارينا حماطة ومن هناك بتاخد مركب أو يخت لحد بيت الدلافين وهو أكبر تجمع للدلافين في البحر الأحمر كله! ويا سلام لما تطلع تاخد الغدا بتاعك وانت على المركب.. هنتكلم بتفاصيل أكتر عن الأسعار وإزاي تروح لمرسى حماطة وأفضل مواعيد الزيارة كمان.. 

 

 

بيت الدولفين هو أكبر مكان تجمع للدلافين في البحر الأحمر  وموجود في منطقة شعاب سطايح في محمية وادي الجمال، والمنطقة فيها أعداد كبيرة جدًا من الدلافين اللي اتعودت كل يوم على إنها تنط بره المياه وتلعب مع الناس! ومن شهرة المكان بيجيله سياح من دول كتير حوالين العالم وبشكل خاص من إيطاليا وفرنسا وألمانيا.. ومن المعروف عن عُمر الشعاب الموجودة في المنطقة إنها موجودة من ملايين السنين ده غير الكائنات البحرية النادرة الموجودة في المنطقة زي الدلافين عروسة البحر والقروش والسلاحف

 

بيت الدولفين موجود في قلب البحر الأحمر، بتروح من مرسى علم لمارينا حماطه  ومن هناك بتتحرك بمركب أو يخت في رحلة بتبدأ من 8 الصبح تقريًبًا لحد بعد العصر.. حماطه نفسها بتبعد عن مرسى علم حوالي 100 كم وبتاخد تقريبا ساعة ونص بالعربية.. ومن القاهرة حوالي 850 كم وتقدر تروحها بالمواصلات عن طريق أي اتوبيس رايح الشلاتين .

 

 

الصيف هناك بيبدأ من نهاية مايو، الجو مشمس وحر جدًا خاصة بالنهار، لكن فيه سحب لطيفة و درجة الحرارة بتكون بين 30°  و 37°. أما في الشتاء فالجو لطيف جدًا، دافي ومشمس بالنهار وبارد شوية بليل والمطر نادر، ودرجة الحرارة بين  24-27°C.

لكن من بداية من شهر مارس وحتى ديسمبر بيكون أعداد الدلافين أكتر بكتير مقارنة بباقي شهور السنة

 

 

 

معظم اللي بيروح سطايح أو بيت الدولفين، بيكون موجود بالفعل في مرسى علم وعشان كده هنتكلم عن أفضل رحلة وأحسن سعر لسطايح من مرسى علم، بيتضمن الانتقالات بميني باص مكيف بياخدك من مكان اقامتك لحد مارينا حماطه ومن هناك بتطلع على المركب اللي هتقضى عليه اليوم كله.. بتنزل في اماكن مختلفة تعمل سنوركلنج وبيتوفرلك كل المعدات اللي هتحتاجها زي الماسك والزعانف غير الغطس في منطقة سطايح نفسها مع 60 – 80 دولفين وأخيرًا فمع المياه والمشروبات هتاخد وجبة الغداء بتاعتك على المركب وترجع آخر اليوم للفندق من تاني .. اليوم بيبدأ من 6 الصبح وبتقضي اليوم كله في البحر وترجع تاني مرسى علم على المغرب تقريبًا واليوم بيكلفك حوالي   من 950 لـــ 1100 جنيه متضمن كل اللي فوق ده.. وتقدر تحجز من هنا .

 

 

وبرغم من إن بيت الدولفين في سطايح بعيد نسبيًا عن القاهرة وكتير مننا مزرهاش قبل كده  لكن ننصحك بشدة إنك تاخد الخطوة وتجربها ولو لمرة واحدة في حياتك عشان تشوف الكنز اللي بيجيله الاجنب من بلاد كتير جدًا حوالين العالم...