غامر في النيل: كل ما تحتاج معرفته عن الكاياك في مصر، الأسعار والأماكن والمواعيد

 
الكاياك أو " التجديف " هو واحد من أكتر المغامرات المائية شهرة في العالم كله، لإنه مناسب جدًا للمبتدئين والهواة ومبيحتاجش تمرين أو أي خبرة سابقة. وكلمة كاياك نفسها يعني " Hunter’s boat  " أو قارب الصياد وده عشان تم استخدامه لأول مرة من شعوب "الإنويت" في مناطق القطب الشمالي عشان يصطادوا ويتحركوا في المياه بسهولة وبتحكم كبير.
والكاياك عبارة عن قارب صغير بتركبه وتمدّد فيه رجلك بالكامل والتجديف بمجداف واحد بإيديك الاتنين وبالرغم من قِدم الرياضة دي في العالم إلا إنها ابتدت في مصر سنة 2006م بس، لكنها انتشرت بشكل كبير جدًا في السنوات الأخيرة وبقى فيه أكتر من مكان تقدر تمارس فيه اللعبة دي!
 
كاياك
 

  • أماكن ممارسة الكاياك في مصر

القاهرة دلوقتي فيها أماكن كتير تقدر دلوقتي تعمل المغامرة دي زي الزمالك والدقي والمنيل والمعادي.. وإن كنّا بنرشح الزمالك عشان بتديك فيو هايل بيبدأ من عند ساقية الصاوي ونادي الزمالك النهري لحد كوبري الجلاء في الدقي وبتلف وترجع تاني مع التيار لحد الزمالك والمسافة تقريبًا 2 كم بتاخدهم في حوالي ساعة.  
 
كاياك كايرو
 

  • أسعار الكاياك في مصر

بتختلف الأسعار حسب المكان والخدمات اللي بيقدمها، لكن أفضل سعر لقيناه كان 100 جنيه للمصريين او لغير المصريين وده للساعة الواحدة أو للفة الصغيرة – Short ride  والسعر ده بيتضمن إيجار القارب، لايف جاكت، محاضرة قبل ما تنزل المياه عن ازاي تجدّف وإجراءات السلامة، التصوير وأكيد بينزل معاك المياه كابتن محترف عشان لو احتاجت اي مساعدة.
ولو حابب تاخد الجولة الأكبر – Long ride   فبتكون حوالين جزيرة الزمالك كلها  لمسافة 9 كم وبتكون لمدة ساعتين ونص تقريبًا وسعرها بيكون 250 جنيه متضمن برده كل الحاجات اللي فوق دي. 
وتقدر تحجز معانا مغامرة الكاياك من هنا
 
kayak
 

  • مواعيد الكاياك في مصر 

تقدر تحجز في أي يوم يناسبك لإنهم شغالين كل أيام الاسبوع.. والمواعيد بتكون كل ساعتين بداية من 8 الصبح يعني تقدر تحجز في أي معاد من دول 8 ص، 10 ص، 12 ظ، 2 ظ، وآخر معاد 4 العصر ووبخصوص الجولة الكبيرة فليها معاد واحد يوميًا وهو من 6 ل 8 ونص الصبح
 
kayaking
 

  • معايير السلامة الخاصة بالكاياك

أهم حاجة في الرياضات المائية هو التأكد من معايير السلامة وإنها مفيهاش غلطة، وعشان كده بيكون معاك كابتن محترف قبل ما تركب الكاياك بيقولك كل التعليمات وإزاي تلبس اللايف جاكت وبينزل معاك المياه كمان عشان لو احتاجت أي مساعدة ولو فيه طواريء بيستدعي اللانش السريع اللي بيوصلك في أقل من دقيقة، حاجة تانية مهمة وهي إن أصغر سن لركوب الكاياك هو 14 سنة، فبتضمن ان كل الناس اللي حواليك كبيرة ومسئولة مع العلم إن الحد الأقصى للوزن هو 100 كجم مع إن الكاياك نفسه بيتحمل حتى 120 كم.. بس الإحتياط  واجب
 
kayak egypt
 
وأخيرًا: لو بتدور على مغامرة حقيقيّة وفي قلب القاهرة وتقدر تعملها مع صحابك ومبيفرقش معاك شتاء من صيف ومش هتحتاج أي لياقة بدنية وآمنة بنسبة 100%.. فالكاياك هو الحاجة اللي بتدور عليها لو عاوز تعرف اكتر عن مغامرة الكاياك تقدر تشوف كل التفاصيل وتحجز من هنــــــــــــــــــا