8 مغامرات تقدر تستمتع بيها في النيل وانت في القاهرة!

مفيش أجمل من إنك تلعب رياضة وانت في وسط النيل والجو منعش وجميل حتى في عز الصيف! وعشان كده عملنا حصر لكل المغامرات اللي ممكن تعملهم  سواء لوحدك او مع صحابك في نيل القاهرة، جهّز شورتك ويلّا بينا..
 

1- نايل بايك – Nile Bike

واحدة من أجدد وأروش المغامرات اللي ممكن تعملها في النيل، ركوب العجل مبقاش مقتصر بس على الطرق والشوارع، ومجرد تخيٌّل إنك بتبدّل والمياه حواليك من كل الإتجاهات كافي إنه يبسطك! 
المواعيد من 9 الصبح ل 4 العصر في الزمالك شغّال والعجل بيتحمّل لحد 120 كجم كحد أقصى والجولة مدتها نص ساعة وسعرها 100 جنيه للمصريين أو للأجانب.  
 
nile bike
 

2- كاياك – Kayaking

أشهر رياضة بتتلعب في النيل حاليّا عشان مش بتتطلب أي لياقة بدنية أو تمرين ده غير إنها آمنة وممتعة جدًا جدًا. 
اللفّة بتبدي من الزمالك وبتوصل للدقي وترجع الزمالك تاني في حوالي ساعة أو أكتر والسعر 100 جنيه سواء مصري أو غير مصري، والقارب بيتحمّل كحد أقصى 100 كجم مع العلم إن أقل سن للأطفال هو 10 سنين
مواعيد الكاياك بتبدي من 8 الصبح لحد 4 العصر ولازم تروح قبلها ب20 دقيقة عشان تتدرب على طريقة التجديف وإجراءات السلامة، وتقدر تعرف معلومات أكتر وتحجز من هنا 
 
الكاياك
 

3- ركوب الأمواج – Windsurfing

من أكتر المغامرات المائية شهرة في العالم، ومعروف عنها إنها بتتلعب في المياه المفتوحة زي مياه البحر، لكنها مش معروفة خاصة في القاهرة وده لإنها بتعتمد في المقام الأول على الرياح وقوتها، فكل ما كانت قوية كل ما المغامرة أكبر.. 
ومن سنتين للأسف توقفت كل المبادرات اللي بتشجع ال Windsurfing  في القاهرة، بس لحد النهاردة فيه ناس لسه بتلعبها في النيل، فلو معاك القارب بتاعك والهوا سرعته قوية تقدر تنزل النيل من خلال أي مبادرة تانية ليها انشطة مائية زي الكاياك أو الدراجون بوت أو غيرهم عشان تأمينك وسلامتك.
 
ركوب الامواج
 

4- دراجون بوت - Dragon Boat 

منتشرة جدًا في الصين وباقي دول شرق آسيا ومعمولها مهرجان سنوي خاص بيها ابتدى من اكتر من 300 سنة قبل الميلاد.
الدراجون بوت أو قارب التنين هي لعبة جماعية والقارب حد أقصى 16 فرد، فلو بتدوّر على مغامرة حقيقية  انت وصحابك فالترشيح الأول أكيد هو الدراجون بوت! 
بتبدأ الجولة من الدقي وبتستمر ل3 ساعات كاملة، وسعر الفرد بيكون حوالي 130 جنيه، والمواعيد يوميا من 10 الصبح لحد 5 المغرب مع العلم إن أقل سن هو 16 سنة  . 
 
دراجون بوت
 

5- ستاند اب -  Stand up Paddling

قليل أوي اللي يعرف عن اللعبة دي عشان هي ميكس بين الكاياك وال Windsurfing  فمن ناحية بتكون واقف ومن ناحية فانت اللي بتبدّل! الموضوع أصعب شوية بس المتعة والإحساس بالمغامرة أعلى بكتير.
الجولة بتبدأها من الزمالك ومدتها ساعة ولمسافة 2 كم أو أكتر والسعر 150 جنيه سواء مصري أو اجنبي، والحد الأقصى للوزن 100 كجم وأقل سن للأطفال هو 10 سنين
المواعيد بتبدي من 8 الصبح لحد 4 العصر كل يوم ولازم تروح قبلها بنص ساعة عشان تتدرب على طريقة التجديف ومحاضرة إجراءات السلامة، وتقدر تعرف معلومات أكتر عن الحجز من هنا 
 
Stand up Paddling
 

6- التزلج على الماء - Wakeboarding   

الرياضة الوحيدة اللي لازم تكون بتعرف تعوم عشان تلعبها، ال wakeboarding  عبارة عن قارب بيسحبك بسرعة كبيرة ومن خلال الأمواج اللي بيعملها القارب هتقدر تركب الأمواج حرفيًا وتعمل اكروبات في الهوا كمان!  
المغامرة دي بتكون لمدة ساعة وبتبدي من المنيل لحد كوبري الجامعة ومتنساش طبعًا تجيب معاك هدوم تانية لإنك هتتغرق هتتغرق..
Wakeboarding
 

7- التجديف – Rowing

من أقدم وأعرق الألعاب المائية اللي بتتمارس على نطاق واسع جدًا حوالين العالم، ممكن تتلعب بشكل فردي أو جماعي وليها كمان بطولات خاصة بيها بينظمها إتحاد خاص باللعبة
مواعيد التمرين بتكون الساعة 6 الصبح يوم الجمعة والسبت من كل اسبوع في النادي المصري للتجديف في الدقي .
 
التجديف في النيل بالقاهرة
 

8- الفلوكة – Sailing

 
أما بقى لو ملكش في كل الفرهدة والتنطيط اللي فوق دول وعاوز تروّق بالك وتستمع بالنيل وجماله بدون أي مجهود فبنرشحلك إنك تاخد فلوكة خاصة وقت الغروب
الفلوكة بتتحرك من على كورنيش عند كوبري قصر النيل وسعر الساعة بيكون حوالي 300 جنيه لحد 10 أفراد وبيقدر يوفرلك عليها أي مشروبات سخنة أو ساقعة ده غير إنها بتكون مناسبة جدًا لأعياد الميلاد أو أي احتفالات صغيرةَ. وتقدر تعرف معلومات أكتر عن الحجز من هنا 
 
الفلوكة
 
 
دي كانت اهم المغامرات والرياضات اللي ممكن تلعبها في النيل في محافظة القاهرة، قولنا لو تعرف رياضات تانية تقدر تمارسها أو لو انت من محافظة تانية غير القاهرة قولنا بتعملوا ايه عندكم في النيل! 

لو عاوز تشوف كل الجديد عندنا او تحجز مغامرة من دول شوف اللينك دة واحجــــز كل الانشطة الترفيهية فى القاهرة من هنــــا