لمحبي رياضة الغوص : تعرف على اجمل اماكن الغوص فى البحر الاحمر - دهب

أجمل مناطق الغوص فى العالم فى اعماق البحر الأحمر فى دهب : 

1. Ras Abo Galum.
2. The Canyon.
3. Blue Hale - El Bells.
4. Eel Gardens.
5. Lighthouse.
6. Southern Oasis.
7. Umm Sid.
8. The Caves.
9. Three pools

 راس ابو جالوم  Ras Abo Galum.

محمية " أبو جالوم "  جنوب سيناء.
بترجع تسميتها لنوع من النباتات النادرة " القالوم " اللي بينتشر في المنطقة و بيستخدمه البدو كاعشاب علاجية للجروح ده غير 165 نوع من النباتات النادرة منها 44 مش موجودين غير في المحمية .

و بتتميز المحمية بطبوغرافية مميزة جدا لاقتراب الجبال من شاطئ خليج العقبة لدرجة صعوبة الوصول للمحمية الا عن طريق المشي او بالجِمَال لمسافة 7 كم شمال منطقة البلوهول بالقرب من دهب في مدق ضيق بين الجبل و البحر و ممكن الوصول لها من الجهة الشمالية بسيارات الدفع الرباعي خلال الوديان الجبلية بالقرب من نويبع .
وانعزالها ده حافظ على طبيعة الحياة البحرية و الشعب المرجانية في المنطقة اللي يتتميز بكثرة الكهوف المرجانية اللي لسة بكر اللي بيدي متعة كبيرة في السنوركلينج و الغطس في اكتر من مكان في المحمية .

الكانيون The Canyon.

ايه هوا الكانيون وفين مكانه ؟
الكانيون ده في مدينه دهب وهوا Dive site مميز جدا وواحد من احلى اماكن الغطس في دهب
المكان عباره عن شق فى الارض بتبتدي تشوفه على عمق 18 متر , تشوف شق ضلمة تماما كده جوا الارض والمدخل فوق وتبتدي تدخل جواه

لو مش معايا رخصه ممكن انزل الكانيون ؟
عشان تنزل غطسه الكانيون ده لازم تبقى  certified diver  ، ومعاك رخصه غوص على الاقل advanced or star 2
لان مدخل الكانيون المشهور على عمق 18 متر واول عمق فيه حوالي 30 متر

عمقه قد ايه ؟
الكانيون عموما ليه مدخلين اشهر واحد على عمق 18 متر والتاني على عمق 12 متر , وبرضو ليه مخرجين الاول على 48 متر والثاني على 55 متر
اول مره هتغطس فيه هتحس بهيبه المكان عشان انت نازل ف اللامعلوم  مكان شايفه من فوق ضلمة وشق جوا قاع البحر على عمق كبير.
بس واحده من امتع واحلى الغطسات خصوصا لما تجربها free fall من الـ 18 متر لحد الـ 30 تسيب نفسك تنزل كده كأنك نازل ببراشوت 

البلو هول Blue hole 

البلو هول مجرى مائي عميق على شكل حفرة طوله 90 متر وعمقه 100 متر وقطره 50 متر يشبه الشارع الصغير وموجود وسط الشعاب المرجانية المغطاة بالمياه وما بيبعدش الشاطئ إلا بمسافة صغير جدا لدرجة أن الغواصين يقدروا يوصلوا إليها سيرا على الأقدام أو بالسباحة لمسافة قصيرة جدا 
والمعروف عن البلو هول انه بيحظى بشعبية كبيرة بين الغواصين نتيجة لوجود تشكيلات مرجانية رائعة به وأعداد كبيرة جدا من الأسماك والأحياء المائية.

آيل جاردن Eel Garden:

إيل جاردن واحد من شواطئ دهب الاكتر من روعة والموجود في الشمال ، المكان تحسة لوحة فنية ودة لما فيه من اعداد رهيبه من الاسماك النادرة التي تشكل تكتلات رائعة  .الايل جاردن هوا المكان المُفضل لعشاق رياضة الغوص ومراقبة أسراب لا حصر لها من الأسماك النادرة والملونة الرائعة الي بتغطي قاع البحر في مجموعات هائلة تتناغم مع بعضها بصورة مذهلة. واللي لما بتنزل الماية بتبقى بتعوم وسط الكم دة من الكائنات البحرية

الايل جارد مش بس للغوص والاسنوركينج لانو كمان المكان المفضل للي بيمارسوا الرياضات المائية زي التزلج على الماء وركوب الامواج أو الرياضات المغامرات الجوية زي الطيران بالبراشوت في جولة جوية ممتعة.

لايت هاوس Light house : 

اللايت هاوس هو  موقع غوص مشهور في دهب. والمكان المثالى لتعلم الغوص من جميع مستوياته.  لما تجرب تنزل المياه هناك هتلاقى نفسك فى  منطقة رملية وتبدأ تتجه تدرجيا الى منحدر عشبي كبير وهتبدأ تشوف انواع من الاسماك النادرة والكائنات البحرية المذهلة والشعاب المرجانية اللى مش هتشوف زيها غير فى دهب .

منطقة Southern Oasis

المنطقة دى هي مزيج بين حدائق المرجان والمناطق الرملية على شكل منحدر. وهناك هتشوف تجمعات مرجانية غزيرة.واعداد من المحارات العملاقة . وتستمر فى السباحة الى الجنوب لحوالي 10 دقائق من نقطة الدخول الى عمق  22 متر أسفل منحدر من الرمال والشعاب المرجانية ، وهناك أخاديد وأودية صغيرة ممكن تشوفها لحد عمق  اكتر من 30 متر. 
ولما تبدأ فى الصعود والعودة نحو الشاطئ ، هتشوف كمية غير محدودة من المرجان الحجري ، بما في ذلك الويفر الأصفر والشعاب المرجانية وشقائق النعمان ويعتبر ال Southern Oasis مكانً رائع لبدء تجربة غوص ممتعه لا تٌنسي .

Three pools الثري بولز 

منطقة الثري بولز تكونت فيها 3 حمامات للسباحة في قلب البحر من الشعاب المرجانية،المكان عبارة عن لوحة من الجمال ومكان مميز جدآ للاسنوركلينج ومناسب للناس اللي بتخاف من الاعماق لان عمقه حوالي ١٠ متر ، المسافه بين الممشى السياحي والثري بولز 18 كيلو ذهاب وعوده

الكيفز The caves

منطقة الكيفز تقع على بعد خمس دقايق من الثري بولز والمميز فيها وجود الشعاب المرجانية تحت الشاطئ مباشرةً وسميت بال Caves لأن الشعب المرجانية كونت شبه كهوف تحت الماء . والمنطقه دى من الاماكن المميزة جدا فى دهب للاسنوركلينج والغطس