جيبنالكوا تقرير كامل عن مدينة الثلج بسيتى ستارز 

مبدئيا اللعب في المدينة مش طول اليوم زى مول مصر لأ محكوم بمدة محددة واسعار الباقات تختلف بحسب المدة ويمكن عشان كده المدينة رايقه بس لأنها لسه جديدة وناس كتير مسمعتش عنها دة اولا ، وثانيا لانها محكومة بمدة محددة فالناس بتخرج وناس غيرهم يدخلوا ودا بيقلل الزحمة. ولكن السعر في كل الباقات يشمل الجوانتى والجوارب مجانا بتاخدهم معاك وانت ماشي.والاسعار كلها اللى موجوده فى المدينة غير شاملة 14 % الضريبة بتتفاجىء بيها عند الكاونتر فأحنا هنحطلكم الأسعار بعد حساب الضريبة عشان تروحوا عارفين هتدفعوا كام.

- بالنسبة لباقات الاسعار فى مدينة الثلج :

  1. باقة 285 ج لمدة ساعتين بتلعب جميع الألعاب الموجودة بالمنطقة ماعدا : سيارات التصادم ودراجات الثلج الباقة بتديك تلعب بيهم مرة واحدة ولو عايز تلعب تانى لازم تشترى تذكرة اضافيه كل مرة اضافية تلعب بيها السيارات او الموتوسيكلات بتدفع حوالى 50 ج اضافية لكل واحدة منهم( 40 ج + 14 % ضريبه).
  2. باقة 350 نفس الباقة السابقة ولكن زودوا المدة بدل ساعتين أصبحت  ثلاث ساعات .
  3. باقة رجل الثلج ب 400 ج نفس باقة ال 350 ج لمدة ثلاث ساعات برضه ولكن اضافوا لها درس تزلج لمدة ساعة.

ملحوظات هامة: دروس التزلج لا ينصح بها لمرضى الظهر والرقبه لأن هناك مش بيقولوا للناس وهي بتقطع التيكيت.

- صندوق الامانات : ب 40 جنيه
- ممكن تيجوا تاخدوا دروس للتزلج ب 175 ج الدرس بعد إضافة الضريبة.
وفيه خصم عائلى : يعني لو 5 أشخاص أو أكثر هتحصلوا على خصم 20%
- لعبة الموتوسيكلات ماتنفعش غير لمن لا يزيد وزنه عن 50 كيلو وطوله عن 150 سم تقريبا يعنى من الاخر للاطفال وكذلك لعبة الطاحونة الثلجية للاطفال فقط.
- كل الالعاب تقريبا ماعدا لعبة او لعبتين شغالين بالكارت اللى هتدخل بيه اللى متحدد بمدة اول ما المدة تخلص الكارت مش هيشتغل وبالتالي مش هتعرف تلعب الالعاب اللى جوه المنطقة.


-الالعاب الموجودة فى مدينة التلج بسيتى ستارز :

مجموعة العاب في الطبيعة الثلجية مبهرة وممتعة وهتشوف هناك العاب زى .. 

  • (زورب بول _ Zorb Ball) ودي كرة عملاقة بتدخل جواها و تنزل علي منحدر تلجي .. تقدر تعمل لايف وفيديوهات وانت جواها وتتصور .. 
  • (ايس بامبر كار _Ice Bumper Car) ودي عربيات تصادمية ولكن في الثلج بقي يعني انت واصحابك وعيلتك تقدروا تلعبوا بشكل مختلف وفي مكان كمان مختلف .. 
  • ( اسكاتينج _ Skating ) هتتزحلق علي الثلج بأدوات تزحلق رياضية كانك في روسيا او ايسلاند .. وكمان فيه مدرسه جوا المكان تقدر تعلمك ازاي تتزحلق على الثلج علي ايد خبراء 
  • (تيوبينج _Tubing ) ودي بقي لعشاق المغامرة .. عاملة زى مسار منحدر متعرج بتقعد فيه علي زلاجه علي الارض وتاخد الطريق المنحدر المتعرج دا 
  • (منطقة الالعاب _ Playing Zone) ودا مكان مفتوح مليان ثلج تقدر تستمتع فية انت ولو معاك ااطفال يقدروا يعملوا نشاطات كتير وينبسطوا .
  • (البيت الخشبي _ Wooden House) ودا مكان خشبي تقدر تتصور فيه انت و صحابك وعيلتك من مكان مرتفع بانوراما تقدر تتصور فيه مع كل مكان انت لعبت فيه وتعمل فيديوهات بشكل مختلف

- مايميزهم عن مول مصر انهم عاملين منطقة للبس الملابس للسيدات ومنطقة للرجال وعدم الزحمة جوة المنطقة واضافتهم للعبتى الموتوسيكلات وسيارات التسابق لكن غير كدا هما متشابهين حتى فى الالعاب اللى بتتلعب فى مول مصر وفى باكدج الاسعار الدخول ولكن ما يميز مول مصر وجود مناطق كثيرة  للراحة يعنى لو ثلجت ممكن تطلع تقعد شويه فى اماكن للجلوس كثيرة وترجع تكمل تانى غير كدا مول مصر لديهم عرض البطاريق اللى مش موجود فى سيتى ستارز وكمان الاسعار عندهم بتقدر تقعد تلعب طول اليوم بس المنطقة بتكون ازدحمت ممكن تقعد ربع ساعه او اكثر فى طابور للعبة. وفى الاخر طبعا مدينة الثلج بسيتى ستارز قريبة لسكان مصر الجديدة ومدينة نصر ووسط البلد والمقطم والتجمع الخامس ومدينة الثلج بمول مصر قريبة من سكان 6 اكتوبر والشيخ زايد والهرم وفيصل والمناطق المجاورة. 
 

العنوان : 

الدور الثامن والتاسع في مول سيتي ستارز . مدينة نصر