شرح كامل لكل ما يخص استخراج فيزا بريطانيا ( UK ) ومتطلبات الحصول عليها
فى المقال دة هنحاول نجمعلكم فيه التركات المتعلقة بفيزا بريطانيا و المستندات المطلوبه للحصول عليها وايه مميزاتها وممكن تروح بيها فين غير المملكة المتحده (انجلترا اسكتلندا ايرلندا) وهنعرفك على انواع التأشيرات البريطانيه واسعارها وكمان هنقولك ازاى تتجنب الاسباب اللى بتؤدي لرفض الفيزا
اول حاجه في كام نقطه كدا لازم نتفق عليهم لانهم بشكل كبير بيأثروا على قرار الخارجية تديلك الفيزا ولا لا .... لكن فى كل الاحوال الموضوع مش حتمي بس دا بيزود او بيقلل نسبه حصولك على الفيزا
ازاى تذود فرصة حصولك على فيزا بريطانيا وايه الاجراءات اللى تاخد بالك منها ؟
ان يكون عندك ترافيل هيستوري معقول :
بمعنى تكون روحت 4 او 5 دول في فتره متقاربه يعني يفضل ماتروحش تقدم بباسبور فاضي
الاتش ار ليتر :
حاول بقدر المستطاع ان الصيغه تكون كالاتي انك موظف في وظيفة كذا من تاريخ كذا وراتبك كذا وانك ترغب في قضاء اجازتك السنويه في بريطانيا وان الشركه ليس لديها مانع من ذلك و الشركه تتمنى ان السفاره تساعدك في تحقيق ذلك
الحساب البنكي:
ودا من وجهة نظرنا اهم حاجه في الموضوع كله و معظم اسباب الرفض بتكون عليه فلذلك هنطول شويه في الشرح :
اولا لازم نفهم السفارة بتدور على ايه في حساب البنك لان ناس كتير فاكره ان طالما حاطت رقم محترم في الحساب هو كدا تمام... والكلام دا مش صحيح خالص لان السفاره بتدور على مجموعة حاجات في الحساب
- ان الراتب الموجود في الاتش ار ليتر هو نفسه اللي بينزل في الحساب وبانتظام شهري
- ان الراتب دا بعد خصم نفقات المعيشه اليوميه منه يكون فيه فائض يسمح لك بالترفيه والسفر وبالتالي المبالغ الموجوده في الحساب دي نتيجه ادخار تراكمي من دخلك
- ان المبلغ الموجود دا اساسا يكفي نفقات المده اللي انت كاتب انك هتقضيها في بريطانيا
- مصادر التمويل الإضافي يعني حد بيحول او بيودع في حسابك حتى لو مبالغ صغيره لانهم بيهتموا جدا بالمصادر عشان غسيل الاموال و تمويل الارهاب.... الخ
طيب ايه شكل الحساب النموذجي للسفارة
- بيزل فيه راتب شهري بانتظام
- مش عليه تحويلات او ايداعات... ولو عليه لازم تكون مبرره بمعنى انك بتكتب سبب الايداع او التحويل
- الرقم الموجود يكون متناسب مع دخلك ولو فيه رقم كبير نتيجه لاي سبب تاني لازم توضحه سواء بيع عقار ارث ارباح من شراكة في شركات او اسهم.. الخ
- الرقم مش لازم يكون ضخم بس على الاقل يكون 4 اضعاف المبلغ اللي انت هتصرفه في السفر لان برضه مش منطقي بالنسبه لهم انك تصرف كل اللي حيلتك عشان تتفسح لكن ممكن تصرف 25% منه معقول جدا
- فيه ناس عندها اكثر من حساب وبتقدمهم كلهم ودا برضه مش صح لان الموظف بيتشتت وبيضيع في قصه مصادر الدخل الإضافي وغالبا بتترفض.... الافضل ركز في حساب واحد وحاول طبق الكلام اللي مكتوب فوق عليه
نقطه اخيره خاصه بمده الرحله :
في ناس بتكتب شهر واتنين ودا الحقيقه بيسبب قلق للموظف هل انت فعلا رايح سياحه ؟! بص يا سيدي هيا كدا كدا الفيزا 6 شهور متعدده ف ما تكتبش اكثر من اسبوع او عشر ايام ... اولا عشان حساب التكاليف اللي اتكلمنا عنه ثانيا عشان مايكونش فيه قلق انك هتهرب او تشتغل
طيب ايه الميزه في فيزا بريطانيا
طبعا لاشك ان اغلب الناس تعرف انها واحده من اهم الفيز في العالم ولذلك تبدوا صعبه
- اولا :هي بتديك 6 شهور متعدده من اول مره غير الشنغن مثلا اللي ممكن تديك ايام محدوده اول مره
- ثانيا: هي بتفتحلك مجموعه دول ليس لها علاقه ببريطانيا اساسا بس وجودها على الباسبور بيتيح لك دخول الدول دي سواء بختم عند الوصول او تأشيرة إلكترونية ومنها تركيا جورجيا صربيا مقدونيا الجبل الاسود البانيا (البانيا تشترط انك تكون دخلت بريطانيا اولا)
- ثالثا: بتفتح لك الدخول لمجموعه من دول التاج البريطاني (ماعدا استراليا وكندا ونيوزيلندا) وأقاليم ما وراء البحار ودول حوالي 26 دوله زي جبل طارق و جزيره مان و فيجي و بابوا وجزر سليمان وجزر العذراء و ساوث جورجيا وساوث ساندوتش و فوكلاند وسانت هيلينا...الخ
طيب دلؤقتى خلونا نتعرف على متطلبات فيزا بريطانيا خطوة بخطوة :
قبل ما نتكلم عن المستندات المطلوبة لفيزا UK بالتفصيل اكتر خلونا نتعرف على أنواع التأشيرات الممكنة لدخول بريطانيا عشان تعرف نوع الفيزا اللي هتقدمها عشان تسافر الى المملكة المتحدة.
انواع الفيزا البريطانية :
انواع فيزا بريطانيا كتيرلكن خلينا نقولك على أهمهم والأكثر طلبا من قبل المسافرين والمهاجرين.
- فيزا بريطانيا لزيارة العائلة
- فيزا زيارة عامة
- فيزا زيارة للطفل
- فيزا زيارة بريطانيا للأعمل بما في ذلك دخول الأكاديميين والأطباء وأطباء الأسنان
- فيزا زيارة للرياضيين
- فيزا زيارة للأنشطة الترفيهية ( الفن والسينما )
- فيزا بريطانيا للعلاج
شروط استخراج فيزا سياحية لبريطانيا 2019 :
شروط فيزا بريطانيا سياحة هي نفسها شروط فيزا الزيارة قصيرة الاجل الى بريطانيا.
وزي ما قولنا الزيارة قصيرة الأجل بتبقى لا تتعدي الــ 6 أشهر
ايه هي الوثائق المطلوبة للحصول على تأشيرة بريطانيا ؟
شروط استخراج فيزا بريطانيا سياحة 2019 هي كالتالي:
- جواز السفر ساري لمدة 6 أشهر على الاقل
- يجب أن يحتوي الجواز على صفحة فاضية على الأقل من الوجه والظهر
- كشف حساب بنكي لآخر 6 اشهر
- وثيقة إثبات العمل ( الاتش ار ليتر ) وأن لك راتب شهري
- دخلك الشهري لا يقل عن 20 ألف اذا ما اردت الحصول علي التأشيرة لكن دة مش معناان لو مرتبك اقل هتترفض
- سجل تجاري و بطاقة ضريبية في حالة لو كان شغلك حر
- وثيقة تتعهد فيها بالرجوع الى بلدك بمجرد انتهاء المدة المحددة في الزيارة
- وثيقة إثبات ملكية ما مثل السيارة ، المنزل ، قطعة أرضية
- وثيقة تأمين صحي
- حجز تذكرة طيران ذهابا وعودة
- حجز تذكرة حجز الفندق أو مكان الإستضافة ؛ (لو ليك حد فى بريطانيا ممكن يعملك دعوة زيارة بريطانيا للإعفاء من الفندق) و لكن النقطة دى ممكن تكون سبب في رفض التأشيرة اذا كان ورقك ضعيف فلا بلاش تعمل دعوة
- ورقة تشرح فيها أسباب السفر الى بريطانيا (خطة أو برنامج السفر)
- ورقة تبين المصاريف اللي هتحتاجها خلال السفر؛
- ترجمة كل الوثائق الى اللغة الإنجليزية فى مركز معتمد
واحياناً ممكن يطلبوا منك وثائق تانيه غير متوقعة، عشان كدا لازم تكون مستعد لإي حاجة ، ودة زي مثلا :
- فيش وتشبيه
- تقرير طبي يثبت خلوك من الأمراض وخصوصا مرض السل Tuberculosis وممكن الدخول الى الموقع دة لتتعرف هل ان كنت من دولة تطلب من مواطنيها تحليل مرض السل gov.uk
- شهادة ميلاد والديك ورقم موبايلاتهم وحتى رقم هاتف زوجتك ان كنت متزوج ودة عشان يسهل التواصل مع أهلك في حالة حودث حاجة طارئة لك خلال السفر
- وطبعا كل الوثائق دى لازم تكون مترجمة الى الانجليزية
ما هى رسوم استخراج فيزا بريطانيا ؟
رسوم فيزا بريطانيا القصيرة المدى هي 93 جنيه إسترليني.
أما بالنسبة لأسعار رسوم فيزا بريطانيا الطويلة الأجل فهي تختلف باختلاف عدد السنوات.
- فيزا بريطانيا لمدة سنتان تبلغ 350 جنيه استرليني.
- فيزا بريطانيا لمدة 5 سنوات تبلغ 636 جنيه استرليني.
- فيزا بريطانيا الطويلة الاجل (10 سنوات) فيبلغ ثمنها 798 جنيه استرليني.
ازاى ممكن تقديم طلب الحصول على فيزا بريطانيا ؟
قبل تقديم الطلب وقبل أخذ الموعد لازم تدخل الى الموقع دة وتتسجل فيه من هنا visa4uk.fco.gov.uk
ازاى تملئ استمارة فيزا بريطانيا :
لما تتدخل على الموقع اللى فوق هتلاقي استمارة فيزا بريطانيا ، كل اللى عليك هو أن تقوم بملئها وبعدين بتنزلها وتضيفها الى ملفك.
وعن طريق الموقع دة بردوتقدر تأخذ موعد مع السفارة وتدفع رسوم التأشيرة
ملاحظة : في حالة لم يقبل ملفك مش هتسترجع الأموال اللي دفعتهالهم كرسوم للتأشيرة
ودي كانت أهم الخطوات لطلب فيزا بريطانيا للمصريين او للسعوديين أو طلب فيزا بريطانيا للمغاربة أو لجميع مواطني الدول العربية.
أسباب رفض فيزا بريطانيا :
في بعض الأسباب المحتملة لرفض منح التأشيرة البريطانية لطالبيها واهمها:
- انك لم تقدم لهم الإثباتات المالية الكافية
- لم تقدم لهم وثيقة تأمين صحي صالحة
- لم تقدم لهم اثبات حجز الفندق وتذكرة الطيران
- أو كذبت عليهم في شيء واكتشفوه
- خطأ في المعلومات المقدمة في الطلب
- ووارد جدا أن تشك القنصلية في نوايا الشخص بأنه يفكر في الهجرة أو العمل في بريطانياودة طبعا ممنوع ب الفيزا قصيرة الاجل.
