فيزا العمرة الإلكترونية
مؤخرا السعودية خدت قرار حلو جدا بخصوص العمرة وهو ان فيزا العمرة أصبحت إلكترونية وبتطلع فى ٢٤ ساعة فقط ومش لازم تتحط على الباسبور ومفتوحة طوال العام فيما عدا موسم الحج.
يعنى اى حد يقدر يسافر فى ٣ أيام لو حابب، والموضوع دة حصل فعلا مع ناس لدرجة انهم مكانوش مصدقين وكان فى احساس ان هيرجعوهم من المطار لكن طبعا دة محصلش . طب ايه المستندات المطلوبة عشان تطلع فيزا العمرة الالكترونيه
متطلبات استخراج فيزا العمرة الإلكترونية
كل المطلوب نسخة من الباسبور تبعتها واتساب او ايميل لأى شركة سياحة تكون شغالة فى رحلات الحج والعمرة، (وحاول تبعد عن الشركات المشهورة لانهم مش بيرضوا يعملوها) و بعد ٢٤ ساعة على الأكثر هتستلم التأشيرة على الإيميل.
تكلفة استخراج تأشيرة العمرة الالكترونية
تكلفة التأشيرة ٢٥٠٠جنيه ومش بتدفع اى حاجة تانى، اطبع التأشيرة، احجز تذكرة الطيران والفنادق بنفسك بالأيام اللى تناسبك، وتوكل على الله وسافر.
تذاكر الطيران من مصر الى السعودية
الطيران السعودي او مصر للطيران انضف وأنسب فى المواعيد والأسعار او لو لاقيت طيران اقتصادى هيبقى ارخص.
واللى ناوى على زيارة المدينة مع مكة، اسأل على الأرخص فى تذاكر الطيران انك توصل مكة الأول وترجع من المدينة والا العكس لان بتفرق فى سعر التذكرة، وتابع الأسعار من على سكاى سكانر
حجز الفندق حسب ميزانيتك
احجز الفنادق من على بوكينج ، شوف الفنادق حسب ميزانيتك واحجز الأنسب لك، هتلاقى فنادق غالية وفنادق رخيصة جداً على حسب وقت السفر والقرب او البعد من الحرم، ودى ميزة انك تبقى طالع مع نفسك مش ملتزم مع شركة تتحكم فيك او تدفعك مبالغ بدون داعي، انت اللى بتحدد حسب راحتك وميزانيتك.
اللى ناوى يعمل عمرة تانية، بياخد باص او تاكسى من عند فندق التوحيد امام الحرم، لمنطقة اسمها التنعيم (١٥ دقيقة تقريباً من الحرم)، هناك يحرم وينوى العمرة ويصلى ركعتين فى مسجد التنعيم ويرجع الحرم يعمل العمرة لنفسه او لحد من أهله وهكذا.
كدا حتى لو حد الميزانية معاه على ادها وحابب يعمل عمرة، يقدر يسافر على مكة، يعمل عمرتين فى ٣ ايّام ويحجز فندق بعيد يكون رخيص او حتى يقعد فى الحرم، ويختار وقت يكون تذاكر الطيران فيه رخيصة طالما بقت مفتوحة طول السنة، يخلص عمرته ويرجع.
الانتقالات بين مكة والمدينة فى ٣ طرق
- القطار الجديد، مدته تقريباً ٣ ساعات لكن غالى شوية ومواعيدة محدودة وطبعاً محتاج تاكسى منه واليه.
- سيارات أجرة مكيفة ومريحة والمدة ٤ ساعات (عند فندق التوحيد جنب الحرم المكى).
- باصات مكيفة لكن بتاخد وقت طويل، ٦ ساعات تقريباً.
مزارات مكة اللى ممكن تشوفها بعد ما تخلص العمرة
بعد العمرة لو عايز تروح المزارات فى مكة، وقف اى تاكسى من عند فندق التوحيد امام الحرم واتفق معاه، بالكتير ١٠٠ او ١٢٠ ريال يوديك كل المزارات زى جبل النور-غار حراء، جبل ثور-غار ثور، منى، المزدلفة، عرفات، ورمى الجمرات. وهناك هتشوف ناس بتطلع جبل النور علشان يدخلوا غار حراء لكن دى اكيد بيكون ليها زيارة مخصوصة.
مزارات المدينة
من عند الفندق بتاعك وقف تاكسى ب ٨٠ ريال يوديك المزارات زى مسجد قباء (اللى يخرج من بيته على وضوء بنية الصلاة فيه وراح صلى فيه ركعتين تحتسب له أجر عمرة)، مسجد القبلتين (اللى اتحولت فيه القبلة ومازالت القبلة القديمة موجودة)، جبل الرماة، جبل احد، مقابر شهداء أحد، مكان معركة الخندق، وطبعاً اخرج من الحرم المدني فى اى وقت زور أهل البقيع.
معلومات سريعه تحص تأشيرة العمرة الالكترونية
- كان في معلومة ان وزارة السياحة ناوية تتدخل وتوقف الموضوع أو تضع له قيود مش عارف ليه، هيبان مع الموسم الجديد في أول محرم وزارة السياحة هتعمل ايه، نتمنى انهم يسيبوا الموضوع ميسر على الناس من غير تعقيد.
- حالياً لا يوجد عمرة لأن موسم الحج بدء بالفعل من 15 شوال وسينتهى فى 15 ذو الحجة. وحسب موقع الحج والعمرة ان هيبدأ استقبال طلبات العمرة من 15 ذو الحجة وبداية استقبال المعتمرين من أول محرم
- لو انت سافرت قبل كدا عمرة فكل اللى هتعمله هتطبع التأشيرة وتسافر لكن لو اول مرة فا موظف الجوازات بياخد بصماتك وصورتك مع ختم الدخول، لكن اللى سافر بصمته بتكون متسجلة على السيستم بالفعل
- طبعاً شرط المحرم لسه موجود لأن دا أمر شرعى، جميع شروط العمرة العادية وأوراقها مازالت كما هى، الأمر فقط تسهيل فى الإجراءات
- مدة الإقامة بتكون شهر داخل السعودية وصلاحية الفيزا 15 يوم
- التأشيرة لازم تتعمل مع شركة مصرية وهى بدورها بتتعامل مع شركة سعودية (كفيل) فمينفعش الأفراد يعملوها لنفسهم من البيت
- هنضطر ننتظر وزارة السياحة هتعمل ايه فى أول محرم بخصوص التأشيرة دى حسب كلام شركات السياحة.
العمرة ممكن تتكلف كام ؟ سؤال بنساله دايما لنفسنا قبل ما نسافر اى بلد
تعالى نحسبها مع بعض كمتوسط : 2500 فيزا + 5000 متوسط تذكرة الطيران يعنى حوالى 7500ج اعمل حسابك عليهم، أما الانتقالات والفنادق إلخ فظبطها حسب ميزانيك ومزاجك.
واخيراً دا لينك الاسئلة الشائعة على موقع الحج والعمرة ممكن يفيدكم http://www.haj.gov.sa/ar/InternalPages/Details/28
والموقع دا يساعد على التأكد من صحة وصلاحية التأشيرة بتاعتك https://www.eserve.com.sa/VVSWeb/_jsp/cvv.jsp
