بما إن ربنا كرمنا وعرفنا العيد إمتى الحمدلله! محتاجين نعرف هنعمل إيه في العيد غير إننا نقلب في صور الناس اللي مسافرة على إنستجرام؟!
لو لسة فيك حيل بعد المناقصات اللي دخلتها في الكحك وأخيراً خدت قرارك وهتفطر شاي بلبن مع البيتفور! طبعاً مش محتاج أقولك إن اللي سافر سافر، فخلينا إحنا الغلابة نكسر الروتين العيد ده بأي حاجة جديدة

 

تعالوا نشوف ممكن تقضي العيد إزاي في القاهرة:

 

1- الممر وعلاءالدين
خلونا نبدأ بالكلاشيه المرة دي عشان هي فيها تويست حلو بصراحة وممكن تظبط المرة دي. رغم الطوابير المهولة على السينما في العيد إلا إن أغلب الناس اللي يا عيني مابتلحقش تسافر بتتزنق في السينما غصب عنها. الحقيقة مع وجود فيلم عالمي زي علاء الدين بالرغم إن معظم السينمات هتعرضه فترة صباحية بس في العيد إلا إنه إختيار موفق جداً بالذات لو الخروجة عائلية وفيها أعمار صغيرة!
طيب وإحنا فين من الكلام ده؟ طبعاً عندك السنة دي أضخم إنتاج مصري في التاريخ تقريباً في محاولة لتقديم صورة هولودية على الشاشة المصرية، فيلم شريف عرفة الممر أكيد هتكون تجربة لطيفة وهتحب يكون لك رأي فيها!

 

2-  فطار في قلب النيل
مش محتاجين نفكركم إن ده أول فطار في وضح النهار بعد إنقطاع 30 يوم! بعيداً عن الكحك والقهوة والشاي بلبن. محتاجين ناكل بجد كدة عشان نتأكد إننا فعلا مش صايمين، الحقيقة إن الإختيار ده واسع ومتنوع جداً فخلينا نحصره في نوعين بإختصار وكل واحد وذوقه
أ- الفلوكة عندك إختيارات كتير هنا طبعاً زي Fel-Felucca مثلاً أو Cafelucca وهتلاقي غيرهم كتير. ممكن تراجع مقالنا التفصيلي
ب- مطاعم عالنيل مافتكرش إني محتاج أقولك إن الزمالك مسيطرة على كل مطاعم النيل تقريباً ويعتبر المعادي المنافس الوحيد بس بردو تحس إنك لو من المعادي ممكن تنزل عالزمالك مخصوص من كتر الـ varieties  المتاحة يعني بس بردو ماينفعش ننسى جزيرة المعادي اللي بتديلك فرصة تقضي يوم أسري في نص النيل بأقل تكلفة تقريباً وبالشكل اللي إنت عايزه.

3- أدرينالين
طبعاً إحنا نايمين بقالنا 30 يوم ومقضينها زومبي في نفسينا، هنحتاج نصحصح شوية كدة عشان اللي وراه مذاكرة يستعيد الذاكرة واللي وراه شغل يستعيد الفورمة كدة عشان لو تفتكر معايا فيه بلاوي متلتلة متأجلة لبعد العيد! مش هفكرك ترجع لمقالنا بأحسن المغامرات والأنشطة الشبابية في القاهرة
أ - Bungee Jumping طبعاً من كام سنة كنا بنتفرج عليه فيديوهات ونشير بكل إندهاش بالإختراع ده، مع وجوده لمدة 6 سنين في مصر تقريباً ولسة ماجربتوش فإنت فايتك كتير!! تقدر تخوض التجربة دي في مول العرب مع Bungy Egypt

ب - Laser Fight تجربة لطيفة جداً هتخليك تكسر الملل وترجعك فريش كدة عالمفرمة! ممكن تجربها وتعرف عنها أكتر من Adrenaline Park

 

 

 

 

4- مش هنخرج الأولاد ولا إيه؟
مهما حاولت جاهداً إنك تأنتخ يومين العيد عشان بقالك شهر مش عارف تنام فأنا وإنت عارفين إن ماينفعش العيد يعدي من غير ما نخرج الأولاد! مش عايزك تشيل همها دي، إختياراتك كتيرة ومتوفرة.

أ- فجنون: إفصل مع الأولاد في جو ريفي هادي وأنشطة كلها إبداع وتفريغ طاقة زي تشكيل الفخار وخبز العيش والزراعة ده غير الرياضات المختلفة من كرة قدم لحد الخيل! أفتكر كلكوا هتغيروا جو والأولاد هيعيدوا بجد ;)

ج- بيلي بيز وكيدزانيا: مع أكتر من 80 نشاط مختلف في كيدزينيا للتعايش وتنمية مهارات الأطفال، أكيد هيكون يوم مسلي بالنسبة لطفلك. بيلي بيز ممكن يكون الأنسب في العيد لأن كله لعب وزحاليق وكل الحاجات الحلوة اللي فعلاً أولادك بيدوروا عليها.