النهاردة هنكلمكم على يوم جميل اوى لازم تجربوه  قبل رمضان.لان الدنيا بتبقى متزينه بشكل حلو اوى.. 

هناخدك فى رحلة كامله للقاهره الفاطميه رحله فيها كل عبق الزمن الجميل

أنه شارع  المعز لدين الله الفاطمي 

 

اين يقع شارع المعز لدين الله الفاطمي وازاي توصله 


شارع المعز كبير جدا (تخيل كده انه 1000 متر تقريبا) بيبدأ من باب الفتوح مرورا بمنطقة النحاسين وخان الخليلى وبعدين يقطعه شارعين رايح جاى (شارع جوهر القائد اللى هو الموسكى وشارع الأزهر)عند الغوريه والفحامين وبعد كده تكمل على الصاغه وزقاق المدق والسكريه لحد باب زويله 

لو هتيجى بالعربيه أفضل حاجه تركنها عند باب الفتوح (بتاع الباركن ياخد 5 جنيه زى الفل ) ودى البدايه

ماهو باب الفتوح 

باب الفتوح واحد من بوابات القاهره الفاطميه بيتكون من برجين وبينهم باب عملاق مزين بالزخارف النباتيه والهندسيه
او ما تعدى البوابه بتلاقى على شمالك مسجد "الحاكم بأمر الله" اللى بتحس براحه غريبه جدا جواه يمكن علشان الجامع مفتوح وبتلاقى مكان الوضوء بيضاوى فى نص صحن الجامع بس ننصحك متفوتش قبل صلاة المغرب بحوالى ساعه فى المكان ده لان الجو

بيبقى رائع بتشوف غروب الشمس مع العصافير والحمام اللى فى المكان (خد كاميرا علشان هتحتاجها اوى)
بعد كده بقى نخش على مكان ممكن يكون معظمك مجربوش لكنه تجربه جديده ومكان جديد للناس اللى بتشتكى من الروتين 

""بيت السحيمى""

اللى بيقدم العديد من الانشطه الثقافيه والادبيه فى جو أكثر من رائع..

كمل في حارة الدرب الأصفر على طول

هـ تلاقي أمامك "مسجد الظاهر بيبرس أجمل حاجة فيه، السكينة اللي بـ تشعر بها والحمام اللي بـ يبقى على أرض وأعلى سور المسجد (ده علشان سقفه مفتوح)، لأن المهتمين به دائمًا بـ يحطوا لهم حبوب يأكلوها. لو رحت المسجد ده هـ تنسى أي جمال شوفته قبل كده وتتمنى تفضل قاعد جنب العصافير تأَكلهم بس.


هـ تخرج من حارة الدرب الأصفر تلاقي "جامع الأقمر" على أيدك الشمال بـ تنزل له سلمتين صغيرين، وبـ يتميز بالكتابة الكوفية المزخرفة على الأعمدة الرخامية.
وأخيرًا "جامع السلطان برقوق" هـ تلاقيه أمام سبيل المياه بعد ما تمشي شوية من جامع الأقمر، واللي بناه السلطان الظاهر أبو سعيد برقوق أول حاكم لمصر من المماليك الجراكسة 1286م– 788 هـ، هـ تستمتع في الجامع ده جدًا بالزخرفة والفنون الهندسية بالذات لو زرته بالليل.

 

نيجى بقى لاهم حاجه الأكل والشرب ..

لو عاوز تعرف تأكل وتشرب إيه هناك، نحب نقولك أن كل حاجة رخيصة جدًا، ده غير أن طعمها حلو ولذيذ وبـ يدخلك في جو القاهرة الفاطمية.

أشهر مطاعم شارع المعز لدين الله الفاطمي واماكنها

تخرج من جامع الأقمر وتمشي على طول هـ تلاقي محل "الكيلاني" على يمينك، واللي بـ يقدم كل العصائر المعروفة من تمر وخروب ومانجو وسوبيا وبرتقال،. وعنده ساندويتشات كمان بس إحنا بـ ننصحك لو معدتك بـ تتعب من أكل عربيات الشارع بلاش أحسن، فيه بعديه محل فطير حلو ونضيف اسمه "الشيف". وبعده بحبة حلوين محل تاني عنده فطير وبيتزا اسمه "شيخ العرب"

كمان هـ تلاقي محل "أسماك" اللي بـ يبيع ساندويتش الجمبري و ساندويتش السمك و ساندويش السبيط (كاليماري)
بعد محل "أسماك" هـ تلاقي التجربة اللي بجد مختلفة عند "الضامن" على أيدك اليمين، بـ يعمل كبده ومخ بالسمسم بس خرافة،) وبرضوا بالسلطات والعيش، وممكن تأخد أقل من كيلو لو عاوز..

بعد كده المحلات اللى ممكن تشترى منها ومتستغلكش..

أكتر محل محترم "مكتبة حسام عبد الظاهر" واللي بـ تقدم نوع فريد من رسم اللوح بالخط العربي لكلمات عربية أو بيوت شعر جميلة، وكمان دفاتر كتابة عليها نفس الكلمات وبيوت الشعر، زي حب، سعادة، علم، وحلم. الأسعار بـ تبدأ فيه (من 35 جنيه لـ 105 جنيه) للدفاتر. (ومن 60 جنيه لـ 290 جنيه) للوحات الفنية.


كمان "محل أ. عاطف عيد" اللي عنده لوحات نحاس (شغل يدوي) رائعة الجمال لشارع المعز وغيره من المناطق الأثرية، واللي بـ تبدأ أسعاره (من 35 جنيه لـ 175 جنيه).
وفيه بازار "السلطان برقوق" اللي عنده أنتيكات من كل العصور بأسعار معقولة، كل قطعة فيه تأخدك لعصر مختلف عن التاني مش بس القاهرة الفاطمية، لأ هتلاقي عنده تحف فرنسية ويابانية كمان.
كمان بازار "جوهرة المعز" عنده علب صدف بأحجام مختلفة وأذواق عديدة، وبـ يكون سعرها (من 20 جنيه لـ 150 جنيه).


نيجي للمحلات اللي من غير اسم، فيه محل جنب بازار السلطان برقوق بـ يبيع كل الحاجات القديمة زي الجرامافون والراديو بتاع زمان وأسعاره معقولة لمحبي التحف. وفيه كمان عربيات لكل الاكسسوارات اللي تتخيلها بالأحجار الكريمة وبأحجار عادية وبأسعار أقل كتير من أي مكان تاني.
بعد كده هـ تلاقي أمامك "حي الصاغة" المعروف بمحلات الذهب والفضة اللي فيه، وكمان محلات عطارة كبيرة هـ تلاقي فيها أي حاجة أنت كنت بـ تدور عليها في محلات العطارة العادية ومش لاقيها، وبـ تخرج على شارع الأزهر اللي بـ يقطع شارع المعز لدين الله، وفي الناحية التانية هـ تلاقي الغورية (منطقة معروفة ببيع الأقمشة)، ووكالة الغوري، وجامع المؤيد، وباب زويلة.
وبكده تبقى انتهيت رحلتنا في شارع المعز الافضل الصبح بدري جدًا أو قبل المغرب بساعة، استمتع بالتصوير.

المصدر : صفحة افضل اماكن الفسحة والخروج فى القاهرة