زهقان من الروتين ونفسك تخرج مع صحابك في مكان جديد وتجرب حاجة مختلفة ، يبقى سيبك من خروجات الاكل والقعدة على الكافيهات ، واكتشف معانا افضل الخروجات الشبابية المختلفة المثيرة وكمان مناسبة لأغلب الاعمار الشبابية عشان تلعب وتنبسط ومتسألش كتير هتخرج فين مع الشلة ؟ 

وبما اننا اتكلمنا فى اكتر من مقال عن اماكن خروج حلوة في القاهرة زي : 

جديد : لمحبي المغامرة استمتع بتجربة مختلفة في النيل علي قارب كاياك 

جرب القاهرة من منظور فريد ، وابعد عن الزحام في مغامرة مائية ممتعة واستكشف الخط الساحلي حول نهر النيل بالزمالك.

سعر الفرد ١٠٠ جنيه فقط  - للحجز اضغط هنا 

 

7 خروجات غير تقليدية واماكن العاب للكبار 

خروجات غير تقليدية مليئة بالاثارة والحركة 

النهاردة هنكمل معاكم باقى اماكن الخروج ونتكلم عن : 

3 خروجات شبابية بعيداً عن روتين خروجات الاكل والكافيهات

Aerodium Egypt

المكان دة للى نفسه يطير ويحلق فى السما الموضوع دلوقتى بقى سهل جدا مش لازم تحجز تذكره طيران او تنط بالباراشوت

دلوقتى هتطير وانت فى الارض ازاى الكلام دة  ؟؟ مع Aerodium Egypt هتعيش تجربة خروج جديدة مجنونة فى مكان من اجمد اماكن الخروج فى مصر للشباب

هتقدر تطير وانت فى أرض الوطن لان المكان ده هو الوكيل الوحيد للعبه دى فى مصر حاجه كده خيال متتوصفش لازم تجربها  ،  كل اللى عليك انك تروح المكان وتدخل تاخد محاضرة ربع ساعه عشان تعرف مبادئ الطيران والامان على ايد مدربين وبتشوف فيديو توضيحى وبعد كده تستلم البدله اللى هتلبسه والخوذة والنضارة وسدادة الأذن عشان ضغط الهواء ويلا انطلق 

بتطلع وبيكون معاك المدرب بيوجهك ويفضل جنبك عشان لو احتجت اى مساعده

اللعبه دى مش بس للصغيرين لاء للكبار والاطفال والشباب والبنات كمان من سن ٤ سنوات ولحد وزن 120 كيلو وعندهم كذا باكدج للعبة تقدره تستمتعو بيهم السعر يبدأ من ٣٣٠ جنيه والسعر ده او اى سعر تانى يتضمن البدلة والخوذة والنضارة وسدادة الأذن يعنى مش هتشترى اى حاجه من برا

الكلام مش هيوصف الاستمتاع والفرحه لازم تجرب بنفسك 

العنوان : كايرو فيستيفال مول عند النافوره الراقصه 
تليفون : 01281327573
01281327371 

 

Aerodium Egypt
 

HintHunt Cairo

تحب تتقمص دور محقق فى جريمة قتل ولا تحارب العدو فى غواصة ؟؟

المكان ده هيحسسك انك بتشغل ١٠٪؜ من مستوى ذكائك بس ويعتبر من احلى اماكن الخروج المطرقعه الموجودة فى القاهرة

فكرة ال Escape Rooms كترت اوى الفترة الأخيرة و اتكلمنا عنها فى كذا مقال قبل كدا بس قليلين منهم اللى عاملين الفكرة صح و مليانة تفاصيل صعبة و حرفياً بتعيشوا تجربة مختلفة و ممتعة قوى و خاصةً لو مع اصحابك و ينفع تلعبوا اللعبة من أول ٣ أفراد و أقصى عدد في ال Room ٦ أفراد

مبدئياً فرعهم الرئيسي فى London و ليهم ٩ فروع على مستوى العالم و الRooms بتاعتهم ترتيبها على TripAdvisor أنها رقم واحد فى إنها من أصعب الRooms على مستوى العالم و فيها ذكاء غير طبيعي و بمجرد ما بتحلوا حاجة بتحسوا إنكم عباقرة 
ديكورات الRooms عظيمة و تفاصيلها كتيرة قوى و طبعاً لازم كـ Team تتعاونوا مع بعض عشان تعرفوا تخرجوا فى خلال ساعة و لو عطلتو فى حاجة هتلاقوا شاشة فى ال Room هيطلعلك عليها HINT و انتو و شطارتكم بقى
و عاملين حاجة حلوة قوى لو روحتو و كانت كل الRooms مش فاضية تقدروا تلعبوا سيجا و طاولة أو شطرنج أو اى لعبة تحبوها لحد ما دوركم يجى المكان مناسب جدا للخروجات الشبابية ممكن تقضوا فيه اطول وقت ممكن تلعبوا وتنبسطوا ومش هتدفعوا كتير 

سعر الفرد ١٣٥ جنيه و ليكو Lockers تشيلوا فيها حاجتكم بمفتاح طبعاً و المفتاح بيبقى معاكم 
العنوان: the district mall - شيراتون
التليفون: ٠١٢٢٠٤٠٨٠٩٠

HintHunt Cairo


المظلة  parachuting - مركز شباب الجزيرة

التجربة دى  للناس اللى محبوسه فى القاهرة ونفسها تجرب خروجة شبابية جديدة وممتعة

‎ طبعا اول ما حد بيعرف انك هتنط من الطياره هيقولك انت اتجننت وازاى هتعمل كده خصوصا لو بنت

‎بس فعلا أحساس المغامرة و الادرينالين من اجمل اللحظات اللى ممكن تجربها وانت بتنط من الطيارة بكامل قواك العقليه من على ارتفاع حوالى 2000 قدم وتشوف المظلة وهى بتفتح وطاير فى السما بعد كده تستعد علشان تنزل على الارض صح .

‎**مكان التدريب: مركز شباب الجزيرة ودى الصفحة بتاعتهم علشان لو حابين تعرفوا حاجه اكتر N.N parachuting team 

‎التدريب: بيقى تلات ايام فى الاسبوع (تلات الساعة 6 بليل -جمعة الساعة 9 الصبح -سبت الساعة 9 الصبح) عباره عن جرى و لياقه و مظلات علشان توصل للمستوى المطلوب للأختبار اللى بيكون عباره عن قفز من برج ارتفاع 10 متر ب Zipline وده بيديك ثقه انك تنط من الطيارة بعد كده

‎نيجى بقى عند شروق يوم العمليه ..بيادتك معاك و اطلع على مطار شرق القاهرة الحربي علشان نستلم المظلة T10B وتلبسها و بعد ما يتمم عليك عشروميت مرة تركب الطياره C130 علشان تروح منطقة الاسقاط اللى فى وادى العواسج قريب من الإسماعيلية كده و اول ما يرن جرس القفز الباب بيتفتح و وهوب دوبل كيك نبتدى نقفز كلنا ورا بعض وتستمتع بلحظة الخروج وفتح المظلة ودفعتك كلها حواليك

‎بعد القفز هيبقى معاك شهاده و كارنيه من الاتحاد المصرى للقفز.

‎- التدريب فى المكان ده بس ببلاش علشان انت مابتدفعش غير رسوم النادى 85 جنيه فى الشهر.
‎- التكلفه بتاعت القفزة ودى اللي بيتم تحديدها من الجيش 1500 + 500 رسوم تسجيل لاتحاد القفز بالمظلات. 
‎- السن من 15 سنة
‎- الوزن من 50 الى 85
‎- المدربين هناك مدنيين بس المعاملة ميري والموضوع ده من أعظم الحاجات اللى بتساعدك تتعامل بعد كدة ف المطار لأننا بنط تبع مطار عسكري وبيفضلوا معاك لحد ماتوصل لمستوى اللياقة المطلوب وبيكونو معك يوم الاختبار و القفزة.

المظلة  parachuting - مركز شباب الجزيرة