التقرير الكامل بخصوص فيزا " الشنغن " من سفارة اليونان
ملحوظة : "بداخل المقال لينكات لفيزا تركيا وكرواتيا "
-------------------------------------------------
لو عاوز تعرف ما هى الشنغن ؟ وما الفرق بين اعضاء الشنغن واعضاء الاتحاد الأوروبي ؟ ممكن تاخد لفة فى المقال ده
فيزا الشنغن للمصريين وكيفية الحصول عليها
طيب بعد ما عرفت معلومات عن اتفاقية الشنغن والدول الأعضاء من خلال المقال فيه سؤال مهم لازم نجاوب عليه
لو انا لو معايا فيزا شنغن اقدر ادخل دول اية غير دول الشنغن ؟
طبعا وجود فيزا الشنغن فى الباسبور بتسهل اى فيزا ثانية وفي دول تقدر تدخلها لو معاك شنجن سواء بفيزا من المطار او بختم بس لازم يكون فى شرطين اساسين
1- تكون فى وقت سريان الفيزا الشنجن
2- تكون فيزا متعددة الدخول MULTIPLE ENTRY
لازم تكلم اي سفارة قبل السفر تتأكد لو في شروط إضافية مطلوبة لدخول بلادهم بتأشيرة الشنغن
والدول دي هى
١- جورجيا
٢- تركيا ( تاشيرة عند الوصول ب20 يورو)ا او فيزا الكترونية
( بخصوص فيزا تركيا راجع المقال دة )
٣- بلغاريا
٤- رومانيا
٥- كرواتيا
( بخصوص فيزا كرواتيا واهم الاماكن اللى ممكن تزورها راجع المقال دة )
٦ – البوسنة والهرسك
٧- البانيا
٨- صربيا
٩- الجبل الاسود
١٠- مقدونيا
١١- كوسوفو
===============
بعد المعلومات دى نتكلم بقى عن
1- حجز الميعاد و مكان التقديم
2- الاوراق المطلوبة والفرق بين السفارات
3- المصاريف الخاصة بالفيزا
4- اخطاء ممكن تضيع عليك الفيزا وبعض النصائح
5- فى حالة الرفض ازاى تعمل تظلم
=====================================
1- حجز الميعاد
بيكون عن طريق موقع المكتب vls التابع للسفارة فى مصر ودة الموقع الالكترونى
او كلمهم على تليفوناتهم لو الموقع واقع او مش عارف تحجز الميعاد من الساعه 08:30 حتي 16:30 من الأحد إلى الخميس باستثناء العطلات الرسمية
2 - الاوراق المطلوبة لاستخراج فيزا الشنغن من سفارة اليونان والفرق بين السفارات
هنا فى ملحوظتين
- بيختلف من سفارة للتانية بس لازم نعرف ان بغض النظر عن الاجراءات والورق المطلوب مافيش سفارة اسهل من التانية لكن فى سفارة اسهل فى الاجراءات فقط لكن القرار شبة واحد والدول الصغيرة اصعب نسبيا عن الدول الكبيرة
- كل نوع فيزا لية الاجراءات والورق المطلوب ( الفيزا الزيارة غير الفيزا السياحة غير الدراسة غير العمل )
- الاوراق الخاصة بفيزا قصيرة المدة (سياحة او زيارة ....الخ )
----------------------------------------------------------------
أ - نموذج طلب التأشيرة
وممكن تقدمة بالانجليزى فى اى سفارة اوبلغة البلد ( حملة من هنا خاص بسفارة اليونان فقط )
ب- عدد (٢) صورة شخصية تكون متاخدة فى اقل من 6 شهور ومستوفية الشروط
( لمعرفة الشروط حمل الملف دة لكل السفارات )
ج - جواز سفر ساري
بحيث لا يرجع تاريخ إصداره إلى أكثر من عشر سنوات ويكون صالح لمدة ثلاثة أشهر على الأقل بعد انتهاء صلاحية التأشيرة المطلوبة، وبه على الأقل صفحتين فارغتين ( وجواز السفر السابق إن وجد وصور ضوئية من جميع صفحات جوازي السفر ) باستثناء الصفحات الخالية ( على أن يحتوى جواز السفر على إمضاء حامله قبل التقدم بطلب الحصول على التأشيرة) .
وصورة من كل صفحات الباسبور اللى فيها اختام وفيزا (فرنسا بتطلب اول صفحتين بس اللى فيهم بياناتك بس )
د - وثيقة تأمين صحى سارية بالنسبة لكافة الدول الأعضاء فى اتفاقية الشنجن ، على ألا تقل مدة سريانها عن فترة الإقامة المطلوبة
تأمين صحّي دولي لمدة الإقامة يغطي لغاية 30000 يورو (ملاحظة: لا تبلغ تكلفة التأمين 30000 يورو ! بل على الأغلب سيتكلف التأمين حوالى 200 جنية للمدد القصيرة. وإنما على التأمين أن يعهد تغطية تكاليف معالجة صحية حتى مبلغ 30000 يورو. بمعنى، إن لا سمح الله، حصل أي مكروه للمسافر، أن يكون هناك تأمين مسبق يضمن تكلفة المستشفى أو ما شابه
وانا بنصح تعملوا فى شركة مشهورة زى اليانز أو مصر للتأمين ويكون التأمين المتوسط وياريت يكون فرست كلاس احسن
( ممكن تعملة من هنا اونلاين تبع شركة أليانز )
و - شهادة التحركات
( لو اول مرة هتقدم على الشنجن اغلب السفارات بتطلب شهادة تحركات بتطلعها من مجمع التحرير بالقاهرة )
ز - اثبات محل الاقامة
حجز فندق مدفوع مؤكد وترفق ايصال الدفع مع الحجز او عقد ايجار او لو زيارة يبان فى الدعوة ان اللى هيستضيفك هيسكنك عندة فى البيت موضح طبعا العنوان ورقم التليفونات للفندق او المستضيف
ح- حجز الطيران ذهاب وعودة
وعادى لو مبدئى بس يفضل لو مؤكد ( فرنسا لا تحتاج الى حجز طيران )
ممكن تعمل> حجز طيران مبدأى من هنا الطيران التركى ( وتختار فى الاخر الدفع لاحقا )
ط - مستندات بنكية حديثة باللغة الإنجليزية ( يتضح منها حركة الحساب في الأشهر الستة الأخيرة، دفتر توفير، ثروات أخرى)
يفضل انك يكون عندك حساب بنكي يغطي عن كل يوم فى منطقة الشنجن 70 يورو على الأقل
ي - لو شغال محتاج HR Letter
شهادة من جهة العمل تفيد وجود علاقة عمل قائمة بينها وبين طالب التأشيرة مع ذكر تاريخ بدء العمل وذكر الوظيفة التى يشغلها طالب التأشيرة ودخله الشهرى وكذلك مدة الإجازة المصرح له بها مع ذكر موعد بدايتها ونهايتها ( طبعا بالانجليزى او بلغة الدولة ) وكمان لازم تكتب فى الجواب الرقم التأمينى فى التأمينات الاجتماعية لو مش متأمن عليك لازم الشركة توضح دة فى الخطاب
لو صاحب شغل
يبقى صورة السجل والبطاقة الضريبية وتاخد الأصل معاك عشان هيطلعوا علية
لو طالب
يبقى بيان من الجامعة او المدرسة انك مازلت طالب فيها
ك - ورقة فيها خطتك كاملة " ودى اهم نقطة "
لازم تكتبها بوضوح كامل بالتواريخ ( حمل النموذج من هنا )
ملحوظة لازم كل الاوراق تكون بالانجليزى او بلغة البلد اللي مقدم فيها
3- مصاريف الفيزا
60 € للبالغين
إعفاء الأطفال أقل من ٦ سنوات من رسوم التأشيرة. أما رسوم التأشيرة للأطفال بين ٦ و ١٢ سنة فتبلغ ٣٥ يورو. تفحص السفارة وحدها أية استثناءات في هذا الصدد .
كله بيتم تسديدة بالجنية المصرى
الرّسوم غيرمستردّة إذارُفض طلب استخراج تأشيرة الشنغن.
الفلوس دى غير شاملة مصاريف المكتب ولا مصاريف توصيل الباسبور البيت
4- اخطاء ممكن تضيع عليك الفيزا وبعض النصائح
1- لازم حجز الفندق مدفوع وارفق الإيصال
2- لازم تثبت انك شغال ومرتبك كويس " خلى ورقة HR كويسة " وما تنساش رقم التأمينات مهم جدا فى الخطاب
أما لو عاطل اثبت انك معاك فلوس كتيرة
3- بخصوص الحساب البنكي
لازم يكون بيغطى عن كل يوم هتقعده فى دول الشنغن 70 يورو أو اكتر ولازم مايكونش عدى علية اسبوع من استخراجه
كمان ياريت تكون حركاتك كتير على الحساب خلال ال 6 شهور الاخيرة
4- ياريت يكون فى ربط بين الراتب اللى كاتبة والحساب البنكى مينفعش مثلا تكون بتقبض 10 الاف دولار فى الشهر وحسابك فية 5 الاف جنية مثلا
او مثلا طول حركاتك فى الحساب سحب 50 جنية و تحطهم تانى وفجأه عملت ايداع ب 50 الف جنيه قبل اما تقدم
لازم تظبط الايداعات والسحب بمنطقية مع الراتب كل شهر
5- بلاش حجز وهمي للفندق او للطيران
احجز من على بوكينج فندق تقدر تكنسلة ببلاش والطيران ممكن تحجزه مبدئى من turkish airlines او احجز حجز فعلى من مصر للطيران وقلهم للفيزا ولو ماخدتهاش هتسترد المبلغ كامل
وطبعا افضل انك تحجز فعلى لو معاك فلوس
6- لازم تقدم فى السفارة الصح
يعنى مش رايح تقعد فى المانيا اسبوع وتروح تقدم فى فرنسا عشان هتقعد فيها يومين مثلا
( قدم فى السفارة البلد اللى هتقعد فيها أطول مدة )
7- لازم الباسبور يكون صالح لمدة 3 شهور عند الرجوع لبلدك يعنى لو هترجع على مصر شهر 3 لازم يكون بسابورك سارى على الاقل لحد شهر 6 على الأقل
8- لازم تحسس السفارة انك مش ناوى تهرب هناك وان الوطن احلى حاجة فى الدنيا انك راجع راجع
لازم توريهم انك عندك شغلة كويسة ومرتبك كويس
عندك دراسة لو عندك ملكية لحاجة قدمها مترجمة عشان يحسوا انك لازم ترجع
9- لازم خطتك في السفر تكون واضحة جدا ومنطقية ومتناسقة مع حجز الطيران والفنادق
مش مثلا تكتب انك هتقعد فى مدينة صغيرة مافهاش حاجة 10 ايام ومدينة كبيرة كلها سياحة يوم واحد ومواعيد الفنادق مختلفة عن مواعيد الطيران وهكذا
10- مش محتاج اقولك متغلطش فى اسمك او رقم الباسبور او اى بيانات وروح فى ميعادك مظبوط
5- فى حالة الرفض
بتقدم تظلم فى السفارة سواء عن طريق المكتب او عن طريق الايميل حسب السفارة وبتبعت جواب فيه رد على أسباب الرفض
وممكن تشوف شرح لشكل الجواب كمثال لدة وفيه الرد على أشهر الاسباب رفض 2 و 9 و 8 من هنا
اسباب رفض فيزا الشنغن
أو تشوف المقال دة : شرح مبسط لجواب التظلم على فيزا الشنغن المرفوضة
