المقال ده هيكون مفيد للناس اللى بيجيلها اوفرز وعروض شغل في السعودية هنتكلم شوية عن المعيشة و المصاريف هناك وتحديداً في الرياض.
متوسط تكاليف المعيشة والسفر الى الرياض - السعودية
اولا فيزا دخول السعودية :
أول ما بتدخل البلد بتدخل بفيزا من 2 :
- زيارة و دي بتكون 3 شهور أو شهر و بتنزل مصر تكسر الفيزا و ترجع و ممكن تيجي تجدد الفيزا تتأخر أو يحصل مشاكل بس اجراءاتها سريعة و مش بتحتاج كشف طبي.
- تأشيرة عمل أو إقامة دي بتدخل البلد فيها لمدة 90 يوم و بعدها بيطلع لك إقامة بناءاً عليها و بتبقي مقيم فى البلد.
ثانيا الكفالة والاقامة في الرياض :
إقامتك بتكون علي كفيل معين الكفيل دا ممكن يكون شركة أو مؤسسة أو فرد.
مش مسموح لك تشتغل عند حد مش كفيلك و لو اتقفشت تترحل-طبعا بخلاف الأوت سورس.
كفيلك المسئول عن كل ورقك و اجراءاتك واصدار كل تأشيرتاتك و تأمينك الطبي.
مش هتعرف تخرج من البلد الا بورقة أو تأشيرة من كفيلك اسمها تأشيرة خروج وعودة مش هتعدي من المطار بدونها -اعتبرها تصريح السفر بتاع الجيش فى مصر
لو عليك مخالفة أو عامل مصيبة التأشيرة مش هتطلع وهتفضل محبوس فى البلد.
نقل الكفالة هي إجراء انك تتنقل من شركة لشركة .. يعني لو جالك أوفر من شركة تانية و مضيت معاهم العقد ووافقت وكله تمام.. لازم كفالتك أو اقامتك تتنقل عليهم بموافقة كفيلك الحالي لو موافقش مفيش قدامك حل الا انك تنزل مصر نهائي و تجيب فيزا ثانية وترجع عليها.
ثالثا اسعار السكن في الرياض :
لو هتسكن لوحدك:
غرفة نضيفة مشاركة مع عزاب في شمال ووسط الرياض بــ ٥٠٠ - ٧٠٠ ﷼ شهري - لو في الجنوب : بــ ٣٠٠ - ٤٠٠ ريال شهري - لو استوديو لوحدك ١٠ - ١٣ الف ريال سنوي
لو اسرة: متوسط الشقة في الشمال ١٨ الف ريال سنوي - في جنوب الرياض الشقة ممكن ١٢ الف ريال سنوي
اشهر احياء الشمال :
المرسلات - المصيف -غرناطة -اشبيلية -التعاون -الورود -الوادي -القدس -النفل
اشهر احياء الجنوب :
البطحة و المنفوحة و دول شبه مصر في الزحمة
عشان توصل من الشمال للجنوب ممكن ٤٥ دقيقة لو الطريق سالك.
رابعاً مصاريف السكن فى السعودية - الرياض :
باقة الموبايل ممكن ٥٠-١٠٠ ﷼
متوسط باقة النت المنزلي ١٥٠-٢٠٠ شهري
كهربا ٤٠٠ شهري
مياة ٥٠٠ ﷼ سنويا.
الانترنت والكهرباء والمياه هتتقسم على الموجودين في الشقة لو مشاركة ولو اسرة هتشيلها لوحدك.
خامساً الأنتقالات والمواصلات فى السعودية ومتوسط اسعارها
بما ان مفيش مواصلات عامة في السعودية و كله مواصلات خاصة او برايفت بالتالي تكلفة المواصلات كالتالي:
٥٠٠ - ٧٠٠ ريال شهري اوبر او كريم
لو هتشتري عربية جديدة قسطها هيبقي ٨٠٠ - ١٢٠٠ ريال شهري
و لو هتشتري عربية مستعملة سعرها من ١٥- ٢٥ الف ريال
و لو هتأجر عربية ايجارها الشهري ١٥٠٠ - ٢٠٠٠ ﷼
و البنزين اللتر ب ١.٣ ﷼ تقريباً
العربية الصغيرة بتملي التانك فول ب ٥٠ ﷼ تقريباً و الكبيرة بـ ١٠٠ ﷼
يعني متوسط بنزينك الشهري ٢٥٠ - ٣٠٠ ﷼.
المسافات في السعودية كبيرة يعني ١٠٠ كمـ دي مشوار صغير و يستغرق مسافة ساعة فقط و دي أقرب مسافة بين مدينتين مثلاً.
التأمين على العربية اجباري سنوي ب١٠٠٠﷼ تقريباً لو ضد الغير و شركات التأمين بتدفع فعلياً و بتعوض فورياً مش زي مصر.
عشان تسوق لازم يكون معاك رخصة سعودية و عشان تطلعها لازم يكون معاك اقامة و بتدخل مدرسة اسبوعين اجباري و تمتحن وممكن حوار الرخصة ياخد منك شهرين على الأقل.
لو زيارة مسموح له تسوق لو مطلع رخصة دولية او لو معاك رخصة دول التعاون الخليجي بس تأجر فقط مش هتشتري عربية.
سادساً اسعار الاكل و الشرب فى الرياض - السعودية :
متوسط سعر وجبة الغداء ٢٠- ٢٥ ريال ولو لحمة ٥٠ - ٧٠ ﷼
كيلو اللحمة ٤٠﷼ تقريبا - الفرخة ٢٠﷼ - الرز و المكرونة ٥ ﷼ الكيلو تقريبا - الخضروات و الفواكه الكليو ٦-١٠ ﷼ - المية للشرب ١٠٠ ريال شهري
سابعاً الخدمات الطبية في السعودية:
مفيش في السعودية عيادات تقريباً كلها مستشفيات و كله شغال بالتأمين الطبي لو مش معاك تأمين طبي ممكن أقل كشف ٥٠٠ ﷼ لو عندك كحة و حشو الضرس ٥٠٠ ﷼ بس طبعا التأمين بيشيل.
ثامناً اماكن الترفيه والخروج في الرياض :
-اماكن الخروج فى الرياض ١٠-١٥ مكان تقريباً.
-معظم الخروجات بتكون للمولات و خروجات في الصحراء و الخضرة.
-الرياض مش ساحلية و فيها بحيرات صغيرة بسبب الأمطار زي وادي نمار ووادي حنيفة.
-المدن الساحلية في السعودية ( الدمام و الخبر تبعد عن الرياض ٤٠٠ كم - جدة دي تبعد عن الرياض ١٠٠٠كم )
-لعب الكورة الملاعب كتيرة وناس كتير بتحجز يومياً و بتلعب ممكن تدفع ٢٥-٣٠ ﷼ يكون دا نصيبك من ايجار ساعتين في الملعب.
-صالات الچيم منتشرة ومتطورة جداً اشتراكها الشهري من ٢٠٠-٥٠٠ ريال شهرياً
تاسعاً الخدمات الحكومية في السعودية :
-بيكون لك اكونت على موقع حكومة اسمه #ابشر و دا مربوط بيه كل شئ خروجك و دخولك البلد و تأشيرتاتك و بيانات اسرتك و مخالفاتك المرورية و كل حاجة
و رقم موبايلك ورخصتك و جوازك وحسابك البنكي وعنوان بيتك المسجل عند الدولة و كلهم مربوطين ببعض.
عاشراً الجو في السعودية :
الجو دايماً صيفي حار درجة الحرارة لا تقل عن ٣٥ درجة و ساعات بتوصل ٥٠ في شهر ٦ و ٧.
الشتاء ٥ شهور نوفمبر ديسمبر و يناير و فبراير ومارس و بيكون جو دافي نهاراً و بليل سقعة و فيه سيول بس الجو دافي.
بالتالي لبسك كله يكون صيفي و تشتري چاكت واحد للشتاء.
ملحوظات:
المقال دا من خبرة شخصية محدودة و الارقام دي كلها متوسط. فأنت احسبها وشوف هتصرف كام و هتحوش كام
فيه ناس بتيجي تعيش هنا عشان انضف والخدمات احسن شوية و استخير و استعن بالله و خد قرار.
