برنامج سياحى 7 ايام فى القاهرة .. جدول تفصيلى + نصائح عامة

دليل كامل لزيارة القاهرة - مصر ( برنامج سياحي 7 أيام في القاهرة ) 

مفيش شك كلنا لما بنبقى مسافرين بنفضل نذاكر البلد وندور ونعمل برنامج قبل ما نسافر وعلشان مش دايما الدنيا بتمشي 100% زي ما بنخططلها ومن هنا بنحاول دايما نقترح عليكم برامج سياحية تقدروا تعملوها لو هتزور اى مكان وبنراعي فى البرنامج ان الاماكن اللي هتزورها تبقى قريبة من بعض عشان وقتك وخصوصا لو البرنامج دة في القاهرة فالدنيا في مصر زحمة لوحده او وقت كتير ممكن يضيع في الطريق للمكان اللي انت عايزة لو مش مخطط لبرنامجك صح 
في البداية هنقولك الايام وانت ترتبها بعد كده زي ما تحب يعني ممكن تبتدي باليوم التالت وبعدها الخامس وترجع للأول براحتك

جديد : ابعد عن الخروجات التقليدية، احجز وادفع أونلاين كل اللي نفسك فيه وانت قاعد مكانك . 

1. اكتشف جمال النيل و احجز من هنا  فلوكة بتكفي لحد 5 افراد بــ 300 جنيه بس في الساعة .
2. استمتع بالموتور بوت واللي بتكفي لحد 20 فرد بأسعار تبدأ من 555 جنيه للساعة للحجز اضغط هنا . 
3. بــ 99 جنيه بس هتشوف القاهرة بمنظور تاني علي قارب كاياك في قلب النيل احجز دلوقتى من هنا . 

ولمزيد من الخروجات والمغامرات في القاهرة اضغط هنــــا عشان تشوف كل جديد 

 
اليوم الاول زيارة القاهرة الفاطمية ( قاهرة المعز او القاهرة القديمة)

ممكن تروح على شارع الازهر، وكالة الغوري،، الصاغة، شارع المعز اللي عمره اكتر من الف سنة واللي هتشوف فيه اثار كتير اسلامية جوامع ومدارس بس خلي بالك ان اخر الاثار اللي في شارع المعز لحد الساعة خمسه بس عشان تقدر تدخل ماعدا كام جامع زي جامع الحاكم بأمر الله ده مفتوح في الخمس صلوات ، طبعا وانت في اول المعز تقدر تدخل خان الخليلي وتشتري الهدايا اللي تعجبك ، تروح بيت السحيمي وممكن تختم اليوم على قهوة من قهاوي الحسين (طبعا السهر في رمضان يجنن في المكان ده)، في مطاعم كتير هناك من أشهرها فرحات ده لو بتحب اللحمة المشوية والحمام، كمان في المالكي للرز بلبن والبليلة والحلويات.

اليوم التاني اسكشاف منطقة الجيزة

ابدأ اليوم ده بركوب الأتوبيس النهري من قدام منطقة ماسبيرو في التحرير لمدة عشرين دقيقة هتوصل لقدام جنينة الحيوانات والتذكرة ب 3 جنيه  تقريبا الأتوبيس النهري ، ادخل جنينة الحيوانات وسعر تذكرتها 5 جنيه ، أمامها هتلاقي حديقة الأورمان التذكرة ب2 جنيه  اللي بيتعمل فيها معرض الزهور فترة الربيع يعني طول شهر ابريل، ممكن بعد كده تروح قصر الأمير محمد علي بالمنيل تقدر مواعيد الزيارة من تسعه صباحا لخمسة ، سعر التذكرة للمصريين والعرب 20ج والتصوير 50ج
بعد كده تقدر تركب لكوبري قصر النيل وتتصور مع الأسدين وبعدها دار الأوبرا وممكن تقعد فى الجنينة بتاعتها وممكن تعرف مواعيد الحفلات في دار الاوبرا وتحضرها ، بعدها ممكن تزور برج القاهرة وتتفرج على القاهرة كلها من فوق وفي مطعم هناك ممكن تاكل فيه بس الاكل مش أحسن حاجة هناك بس المنظر من فوق يجنن كمان ممكن تزور قصر عائشه فهمي بالزمالك والدخول مجانا متاح حتى 27 أبريل

اليوم التالت التجول فى وسط البلد

- ممكن تبدأ يومك بزيارة مجمع الأديان والكنيسة المعلقة والمتحف القبطي في منطقة مصر القديمة (اقرب محطة مترو مار جرجس) بعدها خد المترو لحد السيدة زينب زور مسجد السيدة زينب وبعدها اركب عربية توديك عند مسجد احمد ابن طولون بعدها اطلع على قلعة صلاح الدين الايوبي ( سعر تذكرة الدخول 20 للمصريين و 100 للاجانب ) وجامع الرفاعي بعدها ممكن تروح تقضي باقي اليوم في حديقة الازهر بارك سعر التذكرة يبدأ من 10- 15ج على حسب اليوم اللي هتروح فيه وممكن بعدها لو تحب تزور مسجد السيدة عائشة وقريب منه مسجد السيدة نفيسة

اليوم الرابع أهرامات الجيزة

- طبعا محتاج تنزل من الصبح قبل الحر عشان تعرف تستمتع بالاهرامات وركوب الخيل والجمال دخول هرم خوفو 200 للأجانب الدخول من 8 ص لحد  5م الدخول لهرم خفرع سعر التذكرة  40 جنيه والدخول لهرم منقرع 40 جنيه وطبعا زيارة تمثال أبو الهول ، ممكن تلحق تزور القرية الفرعونية بالبحر الاعظم واللي سعر التذكرة فيها مختلف على حسب البرنامج بيبدأ من  100جنيه المواعيد من 9 ص حتى  7م في الصيف

- او تطلع على بركة الملك فاروق اللي يبعد ساعة تقريبا عن الجيزة وفيه هتشوف اهرامات تانية زي الهرم الأحمر و الهرم المنحني والهرم الاسود وبركة الملك فاروق اللي كان بيصطاد عندها الطيور مكان ساحر وينفع يتعمل فيه داي يوز بس لازم تاخد اكل وماء معاك عشان مفيش خدمات ويستحسن ما تتأخرش هناك وطبعا الافضل يتراح كمجموعة

اليوم الخامس جولة ترفيهية وألعاب للأطفال
 

لو معاك اطفال ممكن تاخدهم كيدزانيا يقضوا اليوم هناك وبعدها ممكن تطلع بقى على كايرو فستيفال ، الداون تاون وشارع التسعين اللي هتحس فيه انك في دبي مش القاهرة كله كافيهات ومطاعم
اختيار تاني : ممكن تروح دريم بارك في 6 أكتوبر وهناك انت والاطفال ممكن تلعبوا طول اليوم في الملاهي و تستمتعوا جدا من 10 صباحا لحد  8م وفي الصيف بتفتح لوقت متأخر عن كده سعر التذكرة يبدأ من 130 جنيه وتختلف على حسب الفئة اللي مختارها وكم الالعاب اللي هتلعبها بعدها ممكن تطلع على مول العرب او مول مصر في 6 اكتوبر تتمشى وتعمل شوبينج و تأكل وتلعب بردو او تتزحلق على الجليد في سكيب ماكس اكبر صالة تزلج في مصر في مول سيتي سكيب  6 اكتوبر الاسعار بتبدا من  30 جنيه

اليوم السادس محمية وادي دجلة بالمعادي

- محمية طبيعية بمنطقة المعادي ممكن تركب المترو وتنزل محطة المعادي وبعدها تاخد ميكروباص لاقرب منطقة أو اوبر هناك ممكن تعمل تخييم، باربكيو، ركوب دراجات وصعوب جبال وطبعا الاستمتاع بالطبيعة الرائعة ووجود حيوانات ونباتات مختلفة هناك بعدها ممكن تنزل على شارع 9 في المعادي اللي مليان مطاعم وبعدها تاخد راحة على النيل في جزيرة المعادي الدخول فيها ب 20 ج كلها حدائق على النيل وفيها مطاعم لان ممنوع دخول المأكولات ومكان عظيم للصور
- او ممكن تروح اي من الاماكن على كورنيش المعادي زي مثلا ذا بلاتفورم كافيهات كلها على النيل

اليوم السابع ميدان التحرير وقصر عابدين

بالمترو ممكن توصل لميدان التحرير وزور المتحف المصري بعدها اتمشى في شارع محمد محمود لحد ما توصل لقصرعابدين وادخل المتاحف بتاعته لان القصر غير متاح للجمهور حاليا بعدها ممكن تاخد جولة تمشية في شوارع وسط البلد شارع 26 يوليو، سليمان باشا، طلعت حرب، عماد الدين، وممكن تقعد على قهوة من قهاوي التوفيقية ومتنساش تاكل ايس كريم من قويدر او العبد كمان ممكن تجرب حلويات إيتوال ، في وسط البلد محلات ملابس واحذية كتير باسعار متوسطه بعد كده ممكن تطلع على الزمالك شارع أبو الفدا على النيل هتلاقي كافيهات ومطاعم كتير ممكن تقعد قعدة حلوة على النيل وممكن تروح ساقية الصاوي في الزمالك بيقدموا عروض يومية في كل المجالات الفنية من مسرح، حفلات، ندوات ، شعر هي مكان ثقافي على النيل هتستمتع فيها جدا

 
ملاحظات :

1. ابعد عن الاتوبيسات، الميني باص (البنات) ، والتاكسي الابيض ممكن لو حابب تستخدم مواصلات يبقى المترو او اقصاها الميكروباصات والافضل طبعا اوبر وكريم
2. ماتشيلش فلوس كتير معاك وانت نازل
3. القاهرة صاحية 24 ساعة في اليوم بس يفضل البنات ما تتأخرش برة الفندق عن الساعة 10-11م لو لوحدها
4. المطاعم والدليفري متاحة على مدار اليوم
5. القعده على النيل والتمشية على الكورنيش متاح طول اليوم
6. فاصل في السعر خاصة في الاماكن السياحية زي الهرم واوصل للنص
7. ماتشتريش من اول واحد يقابلك لف واسأل خاصة لو في مكان زي خان الخليلي
8. افضل الاماكن اللي ممكن تحجز فيها فنادق عشان تبقى قريب من كل حاجة احجز في مناطق وسط البلد، الدقي، العجوزة، المهندسين، الزمالك
9. افضل المولات للتسوق كايرو فيستيفال التجمع الخامس، سيتي ستارز مدينة نصر، مول العرب ومول مصر في مدينه 6 اكتوبر
10. افضل حدائق في مصر الازهر بارك في الدراسة ، جزيرة المعادي على كورنيش المعادي والقعده على النيل واسعار الدخول مبتزدش عن   40 جنيه لكل واحد فيهم
11. اقرب محافظات ممكن تروحها وترجع في نفس اليوم و مواصلات سهلة وهتنبسط فيها (الفيوم، اسكندرية ، العين السخنة ، بورسعيد ) بس دول عايزين لهم بوست لوحده 
12. من المدن اللي ممكن تزورها في مصر كمان مرسى علم، الأقصر ، أسوان ، النوبة، دهب ، شرم الشيخ، الغردقة، سهل حشيش بس كل حاجة من دول على الأقل تقضي فيهم 3 ايام عشان تقدر تستمتع بيهم

طبعا دي اهم الحاجات اللي ممكن تشوفها في اسبوع لكن في حاجات تانية لسه كتير في القاهرة لوحدها تحتاج لها وقت اكبر اتمنى يكون المقال ده مفيد لكل الناس اللي بتخطط تزور مصر الفترة الجاية أو لو حد جاى القاهرة من اى محافظة تانيه

جديد : ابعد عن الخروجات التقليدية، احجز وادفع أونلاين كل اللي نفسك فيه وانت قاعد مكانك . 

1. اكتشف جمال النيل و احجز من هنا  فلوكة بتكفي لحد 5 افراد بــ 300 جنيه بس في الساعة .
2. استمتع بالموتور بوت واللي بتكفي لحد 20 فرد بأسعار تبدأ من 555 جنيه للساعة للحجز اضغط هنا . 
3. بــ 99 جنيه بس هتشوف القاهرة بمنظور تاني علي قارب كاياك في قلب النيل احجز دلوقتى من هنا . 

ولمزيد من الخروجات والمغامرات في القاهرة اضغط هنــــا عشان تشوف كل جديد