تعرف على موعد افتتاح معرض الزهور بحديقة الاورمان بالجيزة وقائمة بأفضل النباتات التى يمكنك شرائها

اللى من القاهره وعايز يحضر ايفنت جميل مبيتعملش الا مرة واحدة خلال السنه وكمان يستمتع بالمناظر الخلابة ويعمل احلي سيشن في مكان مريح نفسيا  ومبهج جدا في الوانه

معرض زهور الربيع بحديقة الاورمان بالجيــزة 2019

 
موعد افتتاح معرض الزهور 2019 ومواعيد الدخول

المعرض هيبتدى يوم 21 مارس لحد 3 مايو والمعرض بيفتح ابوابه للزائرين من الساعه ٩ صباحا ل ١٠ مساء
 

ازاى تروح معرض الزهور 

اقرب محطة مترو هي الدقي بعد سمسمة أو جامعة القاهرة هتنزل وتمشي شويه

اسعار تذاكر دخول المعرض

تذكرة الدخول ب 2 جنيه بس ولو هتدخل بعربيتك هتدفع 20 جنيه  لكن أحنا منرشحش الفكرة دى لانك هتتعذب فى الخروج من الركنة   وتكلفة دخول الكاميرا البروفيشنال 50 جنية

تعمل ايه في معرض الزهور وازاي تشتري انسب النباتات وبأرخص سعر

اول ما تدخل المعرض هتدخل يمين من البوابة وتلف وأنت معاك ورقة وقلم لانك هتحتاجهم جدا جدا ..لو عجبتك شكل زرعه او وردة معينة أسأل على اسمها بعد كدة أسأل عليها عند كل العارضين لأنك هتلاقى تفاوت فى السعر مش بعيد اوي  بس ممكن فى الاخر تلاقى نفسك موفر لك بتاع 50 جنية .. وهناك هتلاقى حاجات بتبدأ من 5 جنية وبتوصل لــ 3000 جنية  ، أه في زهور سعرها كدة على فكرة ودى بتبقي حاجات نادرة جدا ..

بس الدارج اللى هو الفل والياسمين والريحان وهتلاقى الحاجات دى بحوالى 15 جنيه

فى كمان نباتات ظل دي تنفع تتحط جوة البيت يعنى مبتحتجش شمس لو حابب تزين بيتك زى حاجة اسمها السلكمان و دى فى منها 8 ألوان حلوة جدا الواحدة ب 40 جنية تقريبا وهنتكلم عنهم بالتفصيل في اخر جزء من مقالنا ..
 
والفكرة الجميلة بقى لو انت معندكش جنينة أنك ممكن تفرش بلكونتك نجيل صناعى وتجبلها شوية زرع صدقنى مش هتتنقل من البلكونه وهتبقى خروجتك ومتر النجيلة ب 130 تقريبا ..
 
خلاص خلصت واشتريت اللى عاوزه هتلاقى ناس بعربيات يدوية دول ممكن يوصلوا الحاجة اللي اشتريتها لغاية البوابة وتراضيه ب 10 جنية يبقى حلو اوى أو تكون متفق مع عربية بقى لو هتنقل حاجات كتير
 
وحديقة الاورمان فيها منطقة ألعاب صغيرة و ببلاش يعنى مش هتكلفك غير الــ 2 جنية بس 
 

واخيراً دي قائمة بسيطة بأفضل النباتات هتساعدك لو بتفكر تشتري نباتات ظل  لجوة البيت او شمس للبلكونه و الجنينه 

اولا : ( نباتات الظل ) والزينة لجوه البيت :

كالاثيا ، شفليرا ، دراسينا مارجيناتا ، ابصال الهياسنت ، أبصال التوليب . الاجلونيما ، العصاريات ، بوتس ، كلانشو ، كروتون ، السانسفيرا ، سنجونيوم ، البامبو ، انتوريوم ، بنت القنصل . فلانجيوم . يوكا . الكالا . بنت القنصل . بيجونيا . فيكس مطاط . فيكس ليراتا ،،،
كل دووول نباتات ضَل اهم حاجه ليهم الإضاءة القوية جوه البيت مش اقل من 8 ساعات يوميا ، الري القليل أو المعتدل ..
 
ثانيا : ( نباتات البلكونة او نباتات الشمس) :

جازانيا ، جارونيا ، قطيفه ، البتونيا . دراسينا كوردلينا ، كاليوس ، ايفوربيا ، لانتانا ، أقحوان ، نعناع ، ريحان ، مسك الليل ، سُرو لمون ، فل ، ياسمين بلدي ، عطرشان . ياسمين هندى . ونكا . بريمولا ،،،
كل دول اهم حاجه ليهم الشمس المباشرة مش اقل من ٤ ساعات يوميا و ري معتدل او غزير في الحر الشديد ..
 
ملحوظة / فى زرعه تنفع ظل وشمس فى نفس الوقت زى السانسفيرا و الشفليرا والكاليتوس واليوكا والدراسينا 

ودلؤقتى نسيبكم مع مجوعة صور من المعرض: