دهب مكان مفيش زيه في العالم من اجمل بقاع جنوب سيناء
اجمل حاجه في دهب ان متعتها مش في فنادق خمس نجوم تقعد فيها ، دهب متعتها في الكامب والكوخ والقعده على شط اللاجونا بالليل .
النهارده هنتكلم معاكم على مدينة دهب و نرشح لكم احسن اماكن الخروج والكافيهات والمطاعم وايه الاماكن اللى ممكن تروحها في دهب اللى هتخلى رحلتك ماتتنسيش طول العمر ودة من خلال 3 اجزاء
جديد : نفسك تسافر دهب تستجم وتجرب كل حاجة هناك ؟
الحق أحجز معانا الرحلات والانشطة فى دهب واعرف اخر العروض اللى هتظبط مزاجك - شوف اجدد الرحلات واحجزها من هنا
اولا : اماكن الخروج والسهر في دهب وافضل الانشطة والرحلات اللى ممكن تعملها هناك
- البلو هول من احسن الاماكن اللى ممكن تروحها في دهب وتعمل فيها سنوركلينج لانها فعلا مصنفة عالميا بالشعب المرجانية
- محمية ابو جالوم بلو لاجون و دى رحله باللانشات بتطلع من البلو هول بتوصل أبو جالوم بتقعد في كامبات على البحر هناك ، بتنزل تعمل السنوركلنج هناك وفعلا فيها اجمل الشعب المرجانيه اللى ممكن تشوفها في حياتك عشان كدا اسمها ( محمية )
- جبل الطويلات دي بقى منطقة تروحها مع حبيبتك أو صحابك ومن اجمل اماكن السهر في دهب تقدر تعمل سهرة بدوية وتتعشى هناك وكمان بيبقى فى حفله D.J و Fire Show وتنورة وحفله جامده جدا وتعيش احلى السهرات اللي في دهب
- الثري بولز 3Pools دي بقى خروجه عظيمة عبارة عن حمامات سباحة طبيعية من مية البحر اتعملت من الشعب المرجانية، تنزل فيها وتنسى كل مشاكلك في الحياة الماية هناك عظيمة وتعمل احلى سنوركلينج و دايفنج هناك
- وادى جنى دي منطقة رحلات سفاري هتقعد وسط الصحراء، قريبة من جبل الطويلات، والمكان كمان ممتع جدًا.
- سفارى الــ Beach Buggy احلى رحله سفارى ممكن تعملها بتبقى فى وادى جنى بتبقى من ساعه لساعه ونص مع احلى شاى بدوى بتشربوه في الواحه
- منطقة الكيفز هناك هتعمل سنوركلينج وتدخل تشوف الكهوف اللي تحت الشط ومليانة عدد كبير من الأسماك المتنوعة والشعب المرجانية وحاجة اخر جمال .
- شاطئ اللاجونا شاطئ رملي تشوي على البحر بليل وتنام لحد الشروق
- اللايت هاوس شاطئ في قلب البلد مليان كافيهات وتعمل تان وتستمتع بجمال وسحر البلد وقدامك جبال السعودية
- الممشى السياحى في دهب وده هتلاقى فيه احلى كافيهات على البحر واحلى مطاعم واحلى شغل HandMade واحلى صور ممكن تتصورها في حياتك
ثانيا: احلي المطاعم الموجودة في دهب
تعالو بقا نشوف مطاعم دهب
- مطعم King Chicken :- ودا احسن مطعم مشويات في دهب هو مشكلته الوحيده انه قعدته في الشارع بس اكله حلو جدا واسعاره معقولة مش غالية اوى
- مطعم Yum Yum :- دا مينفعش تبقى ف دهب ومتفطرش هناك ، عنده احلى فول وطعمية وبطاطس وكل الاكلات الشعبيه
- مطعم Nemo :- من احلى المطاعم الموجوده ع البحر في دهب بيعمل مشويات ، بيتزا ، سي فود ، وكل حاجه
- مطعم عروس البحر :- لو عاوز تاكل سمك يبقى اطلع علي هناك
- مطعم قشطه وعسل :- من احسن الاماكن الى ممكن تاكل عندها حلويات
ثالثا : أفضل الكافيهات والاماكن اللى ممكن تاخد عندها احلى صور في دهب
- كافيه EveryDay والمرجيحه
- كافيه Same Same
- البيت النوبي
- كافيه بيانولا
- كافيه الخان
- باب الحياه
- Why Not
دى تقريبا اهم الاماكن اللى مينفعش تروح دهب وماتروحهاش ، دهب مش مجرد مكان بنروحه مرة ولا بنعدي عليها من شرم الشيخ وخلاص دى فعلا بيتك التانى اللى لازم تروحه باستمرار
ودي مجموعة مقالات بتتكلم عن كل حاجة فى دهب بالتفصيل هتلاقي فيها كل حاجة عاوزها :
كل شئ يخص السفر الى دهب واهم المزارات والانشطة الموجودة بها بالتفصيل
برنامج سياحي مميز لشرم الشيخ ودهب
قائمة بأفضل مطاعم وكافيهات دهب
أفضل فنادق وكامبات دهب واسعارها
