تقرير شامل عن متحف ركن فاروق بحلوان واسعار تذاكر دخول المتحف

ايه رايك تخرج في مكان على النيل و تعيش عيشة الملك فاروق ب 5 جنية بس

متحف ركن الملك فاروق

الاستراحة الشتوية للملك فاروق على النيل في كورنيش حلوان، من أول ما بتلاقي رمز التاج وكرسي عرش مصر و فخامة المكان، لا اراديا بتقول الملك ملك بردو

قصة المكان دا إنه كان مجرد "كشك شاي" بس كدة!

و كان تابع لفندق و الملك اشتراه ب 2000 جنيه "كان ملبغ ضخم وقتها" و تحولت من كشك شاي لاستراحة شتوية للملك ..

مكان الاستراحة على كورنيش حلوان و يطل على النيل بشكل مباشر ، حتى في 5 مراسي خاصة بيخت الملك ، يعني ممكن الوصول للاستراحة من النيل على طول او من الكورنيش "دا بالنسبة للملك فاروق طبعا مش لينا أحنا" لكن دلوقتي الدخول من بوابة المتحف على طريق كورنيش حلوان والمكان ينفع خروجة حلوة جدا وخصوصا ان المكان جميل جدا 

معلومات سريعة عن المتحف 

مساحة المتحف 1600 متر و مبنى الاستراحة نفسه 440 متر مكون من 3 ادوار " طابقين وروف" على شكل سفينة راسية على النيل والحديقة تضم نباتات وأشجار نادرة و حاليا فيها حوالي 35 شجرة مانجا، و من أشهر معالمها نافورة "فيلم نهر الحب" اللي فيه رقصة الحياة اللي قدمها الفنان عمر الشريف و الفنانة فاتن حمامة 

الدور الأرضي
أول ما بتدخل هتلاقي تمثال بالحجم الطبيعي لعازفة الهارب و اللي صممه الفنان الفرنسي تشارلز كوردييه اللي من أشهر أعماله تمثال إبراهيم باشا في ميدان الأوبرا

بعدها غرفة هي نسخة مطابقة لغرفة توت عنخ آمون بالظبط و فيها كرسي عرش مصر و الدفاية الخاصة بالاستراحة الشتوية، و امامها تمثال على شكل طاووس

في مقابلها سفرة الملك " الخاصة باستراحة الهرم" لان سفرة استراحة حلوان متهالكة، السفرة عليها بونبونيرة عبارة عن 11 كيلو "فضة" وعليها زخارف في منتهى الابداع، و في نفس المكان لوحة لمراسم الزواج الفرعوني و لوحة تانية للمحمل الخاص بسترة الكعبة المشرفة أثناء مرور الموكب من أمام الأهرامات ، لوحة قمة في الابداع

و في نهاية الدور الارضي 5 "بلكونات" تطل على النيل و فيها كراسي من جلد الغزال عليها خرطوشة "رمز مكتوب فيه اسم الملك فاروق" باللغة الهيروغليفية و تمثال للمرأة المصرية و السودانية لان وقتها كانت مصر و السودان مملكة واحدة، و بينهم طاولة مخصصة للعبة الشطرنج باستخدام رموز فرعونية مختلفة عن التقليدية

الدور الاول فيه 3 غرف نوم
غرفة نوم جلالة الملك فاروق و غرفة الملكة ناريمان "الزوجة الثانية للملك فاروق" و فيها سرير ولي العهد "أحمد فاروق - أمير الصعيد" و الغرفة الثالثة للأميرة فوزية أخت الملك فاروق و زوجة شاه إيران محمد رضا بهلوي، و اللي كانت مشهورة بأنها أجمل نساء الأرض

العامل المشترك في الغرف "البساطة" على عكس حياة القصور الفخمة، الغرف تشبه غرف الفنادق بطراز حديث و بسيط، و غرفة الملك فيها صورته و هو في عمر ١٢ سنة و الغرفة فيها حمام خاص و يقابله حمام الغرفة المقابلة بنفس التصميم كأنه مراية

و من العلامات المميزة في الدور الأول لوحة الموناليزا المصرية
موجودة في الصور (حتى الأن لم يتم التعرف على الفنان اللي رسمها) و غرفة حمام الشمس اللي كان يستخدمها الملك بعد الاستحمام

الدور الاخير عبارة عن رووف يكشف النيل كله يعنى تاخد صحابك وتروح تكتشف جمال المتحف وكمان تشوف النيل بدل ما تحتاروا وتدوروا عن اماكن خروج ، لكن برغم كل دة الملك زار الاستراحة مرتين فقط، و معظم المقتنيات نسخة طبق الاصل من الآثار الفرعونية الموجودة في المتحف المصري، و أغلب القطع الموجودة في الاستراحة خاصة باستراحة الهرم

الانشطة اللي بيقدمها المتحف ((مجانا)) واسعار تذاكر الدخول 

ورشة تدريبية للمصنوعات الجلدية - يوم الثلاثاء من كل أسبوع
ورشة كتابة الاسماء باللغة الهيروغليفية
و كل يوم بيكون في جولات إرشادية للشرح للزوار المصريين والعرب مجانا
التذكرة للطلبة 3 جنيه
للمصريين 5 جنيه
تصوير بالموبايل للمصريين 20 جنيه
تذكرة الزائر الاجنبي 50 جنيه
التصوير للأجنبي 50 جنيه
الطالب الاجنبي 25 جنيه
دخول كاميرا سيشن تصوير 300 جنيه

المتحف مفتوح كل يوم مفيش أجازات نهائي
المواعيد من 9 ل 4 داخل الاستراحة
5 خارجي - في الحديقة 

ودي بعد الصور لمتحف ركن فاروق من الداخل :