أجمل مدن المغرب السياحية واشهر الاماكن التى يمكنك زيارتها أثناء رحلتك في المغرب :

اللى بيفكر يسافر المغرب هنكملك النهاردة عن شوية معلومات تخص السياحة فى المغرب وايه المدن اللى ممكن تزورها فى المغرب واشهر المعالم الموجودة فى كل مدينة لكن خلينا نتفق في البداية ان المغرب بلد جميلة فيها كل حاجة (طبيعة - تاريخ - فن - حر و تلج - شعب طيب -المصاريف فيها مش غالية .. )

عملة المغرب : هي الدرهم المغربي و يعادل 2 جنيه مصري

واغلى حاجة هناك المواصلات و عندهم في معظم المدن أتوبيس عام بس ده بطئ جدا وبيضيع الوقت لو في مدينة هتقضي فيها يوم وترجع، وفي كمان تاكسي كبير وتاكسي صغير ، التاكسي الكبير بتركب مع ناس وبيكون اجرته موحدة، التاكسي الصغير في معظم الاوقات بياخد معاك ناس بس كل واحد له عداد خاص بيه ، ودلؤقتى هنتعرف اكتر عن الوجهات السياحية في المغرب وايه اللى ممكن تزوره فيها خلال السطور القادمة 


1-السياحة في مراكش "المدينة الحمراء"

المدينة دي مينفعش تقعد فيها اقل من 3 ايام 

  • ممكن تزور هناك "جاردين ماجوريل" و دي جاردن فيها انواع نباتات تحفة مكان من الاخر عينك هتحبه كلها اصفر فى ازرق و بديزاين فرنسي وفيها متحف أمازيغي حلو جدا بيبين كل حاجة في حياة الأمازيغ 
  • وممكن تروح قصر الباهية (والقصر دة فيه كل جدار وسقف جواه تفاصيل وحكايات روعة) القصر ده كل ما عينك تروح في حتة تلاقي فن مليان تفاصيل 
  • جامع الكتبية : ويقال ان كان في كتُاب بيقعدوا يكتبوا في المكان ده فاتبنى مسجد فيه واتسمى الكتُبية
  • اوكميدان : ودة مكان فيه skiing على جبال الاطلس و هو بعيد عن مراكش حوالي 80 كيلو وبتروحه بتاكسي بحوالي 100 درهم رايح جاي

لو بتحب العجل أجر عجلة ولف بيها المدينة ممكن تأجرها اليوم كله ب 50 درهم تقريبا يعنى من الاخر مراكش وجهة سياحية رائعة من كل النواحي . 

السياحة فى مدينة مراكش المغربية

 

2- مدينة فاس واهم المزارات السياحية الموجودة بها

المدينة القديمة فيها كل الاماكن اللي ممكن تزورها في فاس وممكن تقعد هناك فى آى هوستل وبنرشحلك هوستل  اسمه دار ربحه الليلة ب 80 درهم بالافطار

  •  وفي المدينة ممكن تشوف جامعة القرويين "أول جامعة في العالم"
  •  دار الدباغة: ده مكان بيتاخد فيه الجلد من اول ما بيكون بالفرو اللي عليه لحد ما يتنضف تماما و يتصبغ ويتصنع (المغرب مشهورة جدا بالهاند ميد بس لما تشوف قد ايه الحاجة بيتعب فيها كده بتعلمك فعلا تقدر وتحترم سعر اي حاجة معمولة يدوي)
  • المدرسة البوعنانية: مدرسة قديمة جدا الطلاب كانوا عايشين فيها يدرسوا ويصلوا ويباتوا فيها المدرسة فيها فن اسلامي رائع جدا
  • باب بوجلود والقصر الملكي دول ابواب بس شكلها حلو وهتعدي عليهم

*الاسعار في فاس حلوة جدا لو هتشتري هدايا و الحاجات الجلد كويسه جدا وارخص بكتير من هنا في مصر لازم تشتروا من هناك حاجة فعلا 

السياحة فى مدينة فاس

3- مدينة مكناس

قريبة من فاس ساعة تقريبا بالباص وفيها فن اسلامي زي فاس بالظبط بس في مكان روماني قديم جدا ومختلف تماما عن اي حاجة اسمه "وليلي" volubilis
مكناس كفاية عليها يوم واحد مش بلد يتبات فيها 

مدينة مكناس المغربية

 

4- مدينة إفران

سويسرا المغرب حرفيا، المباني بطراز اوروبي ولو روحت في الشتاء هتلاقي تلج وهتحس انك برا افريقيا فعلا .. دي بردو كفاية عليها يوم وهي قريبة من فاس ومكناس

مدينة افران

 

5- السياحة فى مدينة شفشاون 

تقريبا كل الناس اللي بتسافر المغرب بتروح علشان شفشاون و هي تستاهل بصراحة لإنها وجهة سياحية ممتازة واهلها طيبين جدا و الأزرق اللي في كل مكان مريح للنفسية جدا جدا
شفشاون مفيهاش اماكن ممكن تزورها كتير بس الgetting lost في شوارعها tour في حد ذاتها و لازم تروح عند مكان اسمه "رأس الماء" علشان تطلع تشوف شفشاون من اعلى نقطة فيها و يفضل تروح في الشروق او الغروب

وطبعا لازم تزور اقشور اكتر مكان فيه طبيعة شلالات في المغرب بس علشان تشوف الشلال الكبير هتعمل hiking تقريبا 3 ساعات ونص ف سيب الشنط في الهوستيل احسن و البس شوز مريح وروح بدري عشان تمشي بدرى قبل ما الليل يحل عليك ومتلاقيش مواصلات ترجعك شفشاون 

مدينة شفشاون

 

6- مدينة طنجة

اللي لازم تزوره فيها الرميلات و تشرب شاي مغربي في كافيه الحافة وقت الغروب وتشوف اسبانيا من فوق والمراكب رايحة وجاية ليها وطبعا تتمشى في المدينة القديمة وممكن تزور ضريح ابن بطوطة

طنجة

 

7-مدينة أصيلة

بلد صغيرة جدا ممكن تخلصها في ساعتين و تروحها من طنجة وترجع في نفس اليوم

مدينة اصيلة

 

8- مدينة تطوان

تطوان تقريبا كانت مركز الاسبان وقت الاحتلال ف هتلاقي مباني كتير بطراز اسباني ولازم تدخل المركز الثقافي الإسباني فيه اوضة فيها بروجيكت بيتم فيها مقارنة حياة الناس في نيويورك وشفشاون و دي من احلى الحاجات اللي هتشوفها هناك 

مدينة تطوان

 

9- مدينة كازابلانكا

مفيهاش غير مسجد الحسن الثاني (أكبر مسجد في افريقيا) ويستحق الزيارة فعلا بس كفاية عليها يوم واحد تروح المسجد بس علشان البلد زحمة 

كازابلانكا

 

10- مدينة  الرباط

بردو مفيهاش حاجات كتير تتعمل بس هتحبها جدا وتعتبر اغلى مدينة في المغرب كلها تقريبا ف لو هتسافر وقت قصير مش لازم تروحها خالص بس الـ zoo هناك لطيفة جدا وفي مكان اسمه udaya فيه شوارع شبه شفشاون وبتشرب شاي مغربي على بحيرة صغيرة لطيفة جدا

مدينة الرباط

 

نصايح بسيطة جدا عن المغرب

  1. متسألش حد في الشوارع على عنوان لأنه يا هيفتي يا هيقولك تعالى اوصلك وياخد منك فلوس
  2. متركبش تاكسي بليل علشان بيبقى ضعف النهار ف حاول تشوف تاكسي كبير او تتمشى المشي رياضة
  3. لو هتركب الباص للسفر بين المدن فيه مكان اسمه المحطة الطرقية موجود في كل مدينة احجز باص من شركة CTM