الناس اللى بتحب الرحلات اللى فيها مغامرة ونفسها تجرب حاجة جديدة بعيد عن المعالم والمناطق التقليدية واللى اغلب شركات السياحة بيطلعوها ، لو انت من الناس دي فالمرة دي جبنالكم برنامج سياحي مختلف ممكن تجرب تعمله لوحدك أو مع صحابك أو حتى لو لاقيت شركة سياحة بتطلعه جرب تروح معاهم .
فى أنسب وقت في السنة ممكن تعمل رحلة جديدة تماماً ومختلفة وتزور فيها مثلث حلايب وشلاتين وتشوف سلسلة جبال علبة علي ساحل البحر الأحمر وجبال الصحرا الشرقية و تتعرف علي محمية أبرق ووادي أبو سعفة وخليج القلعان وشاطئ حنكوراب ومحمية وادى الجمال وقرية أبو الحسن الشاذلى كل دة ممكن تشوفه فى رحلة واحدة لكن خلينا نعرفكم قبل ما ندخل فى التفاصيل ان برنامج الرحلة دى دسم وشاق للرحالة والمغامرين و المصورين وهواة الاستكشاف والبرنامج مجرد اقتراح منا ليكم عشان زى ما قولنالك لو انت حابب تنفذ الرحلة لوحدك أو مع شركة سياحة والرحلة هتكون لمدة 5 أيام 4 ليالى.
برنامج رحلة لحلايب وشلاتين وجبل علبة في 5 ايام / 4 ليال
اليوم الأول : زيارة (محمية وادى الجمال - شاطئ حنكوراب - التخييم في خليج القلعان )
- التحرك من القاهرة حتى رأس غارب حوالى ( 300 كم )
- هتقف فى أستراحة وبعدها تستكمل الطريق حتى القصير ( 290 كم )
- هتقضي هناك بعض الوقت على البحر وتاخد فطارك على البحر مباشرة.
- استكمال الطريق حتى محمية وادى الجمال وهتزور أجمل مكانين فيها .... شاطئ رأس حنكوراب ( أحد أجمل 10 شواطئ فى العالم )
- ( 140 كم ) .
- ثم الوصول إلى مخيم خليج القلعان وغابات المانجروف ( 30 كم ) أحد أجمل مناطق ساحل البحر الأحمر والتخييم وتناول الغداء والشاى البدوى والجبَنَة ( مشروب القهوة بالجنزبيل تشتهر به قبائل البجا فى منطقة جنوب البحر الأحمر ) مع غروب الشمس .
اليوم الثانى : زيارة (منطقة ابرق ووادي أبو سعفة )
- هتاخد وجبة فطارك وتتحرك بدري نحو محمية أبرق وأبو سعفة 130 كم
- التجهيز للتحرك بسيارات ربع نقل للدخول لمنطقة منطقة أبرق وبئر الجاهلية ووادي أبو سعفة والتجول فى وديانه ومشاهدة قرى وقبائل العبابدة (البجا) ورسوم ما قبل التاريخ وبوابة المياه الرومانية والعودة لمدينة الشلاتين ( 130 كم ) وتاخد وجبة الغداء بأحد المطاعم اللى من اختيارك فى سوق الشلاتين الشهير ثم المبيت
- وبنقترح عليك فندق اسمه د. برغوت ( 1 نجمة ) فيه حجرات ثنائية وثلاثية مكيفة بحمام خاص.
اليوم الثالث : زيارة (مدينة ابو رماد - جبل علبة )
- تناول وجبة الأفطار فى سوق مدينة الشلاتين ثم التحرك لزيارة مدينة أبو رماد ( 130 كم ) والحصول على تصريح دخول جبل علبة من مكتب المخابرات
- التحرك فى سيارات ربع نقل لدخول منطقة جبل علبة والتجول فى وديانه ومشاهدة قرى قبائل البشارية (البجا) وحياتهم اليومية
- الاستمتاع بمشروب الجَبَنة والعودة لمدينة الشلاتين لتناول وجبة الغداء فى سوق الشلاتين الشعبى
- ثم زيارة متحف الشلاتين التراثى لقبائل العبابدة والبشارية.
اليوم الرابع : زيارة ( قرية ابو الحسن الشاذلى - جبل حميثرة - غابات المانجروف )
- تناول وجبة الأفطار ثم التحرك نحو قرية أبو الحسن الشاذلى وجولة فى القرية
- صعود جبل حميثرة
- التوجه نحو خليج القلعان والتسكين فى المخيم مرة أخرى
- قضاء باقي اليوم فى البحر وعلى الشاطئ ووسط غابات المانجروف.
اليوم الخامس: زيارة ( خلجان مرسي علم - قلعة القصير بمدينة القصير )
- تناول الأفطار والتحرك نحو مدينة القصير
- ثم استكمال الطريق لدخول أحد الخلجان الساحرة المجهولة على طريق مرسى علم - القصير وقضاء بعض الوقت للاستراحة والتصوير.
- ثم الوصول لمدينة القصير ( 240 كم ) وتناول وجبة الغداء على البحر ومشاهدة المدينة وزيارة قلعة القصير الشهيرة وتناول وجبة الغداء ( أسماك ) على البحر
- التحرك فى اتجاه القاهرة والأستراحة فى راس غارب وبكدة تكون الرحلة انتهت
تكلفة الرحلة دي ممكن تكون في المتوسط بــ 2500 لــ 3000 جنيه علي حسب كل شخص :
بالإقامة 5 أيام 4 ليالى والاكل والانتقالات والتصاريح وهكذا
*اقامة ليلتين في مخيم القلعان ( أجمل خلجان مصر ) فى عشش ( كل 6 فى عشة ) وخيم على البحر ( كل فرد فى خيمة ) وفيه هناك حمامات جيدة جداً.
* الأقامة ليلتين في فندق د. برغوت بالشلاتين ( 1 نجمة ) غرف ثنائية وثلاثية مكيفة بحمام.
هتحتاج تطلع تصريح حرس الحدود + تصريح المبيت فى محمية وادى الجمال + تصريح دخول جبل علبة ( 150 جنيه )
معلومات ليك قبل ما تطلع رحلة حلايب وشلاتين
الرحلة دي غير مناسبة لكبار السن أو اللى بيعانوا من مشاكل فى الظهر والعمود الفقرى لطول مسافات السفر وكثرة الوقوف فى مزارات والاستراحات.
الرحلة بالكامل فى جنوب مصر ومثلث حلايب والشلاتين والصحراء الشرقية وجبالها ووديانها والحمامات فى معظم الأوقات بدائية جدا.
الرحلة شاقة نوعاً ما لكنها مناسبة جدا لهواة الاستكشاف و الرحالة والمغامرين ولا تناسب تماماً هواة الرحلات والفنادق الـ 5 نجوم.
لأنك ببساطة هنركب عربيات ربع نقل وبتنام على الأرض فى عشش على البحر فنادق نجمة واحدة ( ده المتاح هناك ) وهتاكل فى مطاعم شعبية وهنقعد على الأرض فى القهاوى البدوية .
لو حابب تتعرف على معلومات تخص السفر الى جبل علبة وازاى تسافر لهناك يبقى لازم تقرا المقال دة : معلومات تهم كل مسافر الى محمية جبال علبة بحلايب
ودلؤقتى نسيبكم مع باقي الصور
.jpg)
.jpg)
