المقال دة تجميع لأفضل الحدائق اللى موجودة ومتفاوتة فى الأسعار وكل صورة تحتها المعلومات بتاعتها 

 

حديقة الأندلس

مكان رائع علي النيل يستحق الزياره، أنشئت سنة 1935! وهي عباره عن جزئين، جزء جنوبي عربي أندلسي، وجزء شمالى فرعوني، بس الجزء الأندلسي أجمل، عباره عن نافوره كبيره وحواليها مدرجات من الجناين وكلها مزينه بالرخام والقيشاني والفسيفساء المستورد من ايطاليا وتركيا! امام النافوره مبني كبير وسطه تمثال لأحمد شوقي. حديقه تاريخيه جميله وفخمه جدا تبرز العز الي كنا عايشين فيه زمان، واتعمل فيها حفلات لعبد الحليم حافظ وفريد الأطرش وفيروز وغيرهم، وشفناها كلنا في أغنية أنغام الشهيره في بداياتها وغيرها من الأفلام والكليبات.
مكانها في الزمالك آخر كوبري قصر النيل يمين، أقرب محطة مترو أنفاق هي محطة الأوبرا او لو رايح بالعربيه الأفضل تركن في جراج التحرير وتتمشي علي كوبري قصر النيل او تركب كارته، او ممكن فى جراج التحرير
وتذكرة الدخول لحديقة الاندلس ب5ج للمصريين و10ج للأجانب والكاميرا ب50ج (تصوير بالموبايل مسموح مجانا) والفوتو سيشن للعرايس ب400ج. والمواعيد يوميا من 9ص ل10م وفي الصيف والعطلات ب12م.
مافيش جوه أنشطه كتير غير التجول والاستمتاع بالحديقه وبالنيل والتصوير، وفي كافيه متواضع بيقدم مشروبات، انا شربت شاي وزجاجة مايه دفعت 20ج. ومافيش مطاعم ولا ألعاب أطفال للأسف بس ممكن بعد جولتك تاخد مركب في النيل او فلوكه ودي فسحه تانيه لوحدها 


 حديقة الأزهر --- Al-Azhar Park

حدائق

الحديقة بقى دى يظهر جمالها فى الشتاء ولما المدارس تدخل كدة ،، يعنى اللى بيروح فى الأعياد أو فى أجازات الصيف يناسها
عاوز تروحها وتستمتع روح اول ما المدارس تبدأ والجو يبقى حلو صباحا
سعر تذكرة دخول حديقة الازهر : 25 جنية للكبار و  15للاطفال طول ايام الاسبوع
المواعيد : من 9 صباحا ل 11 مساء
 
 

حديقة دمياط الجديدة المركزية

تخيلوا المكان والجمال دة والتذكرة بجنية وبس
55 فداناً 60% من مساحتها أراضي خضراء مزروعة بالنجيل والورود والأشجار المثمرة و النخيل المثمر وغير المثمر..تخيل أن سعتها ممكن تشيل يوميا حوالى 30 الف زائر 
فيها برجولات ودكك متنوعة تناسب كافة الاحتياجات والمراحل العمرية
.
بها منطقة خاصة للأطفال مجهزة بالعديد من الألعاب وكلها مجانية تماماً.( يعنى بالجنية اللى أنت دفعتة وبس ) 
بها مدينة ملاهي كهربائية بأسعار بسيطة وفي متناول الجميع.
بها مطعم وكافتيريا.
بها مسرح روماني مفتوح يستوعب ما يربو على 3000 مشاهد ويستعمل احياناً كسينما صيفي مفتوح.
تقام بها صلوات الأعياد حيث تستوعب ساحاتها أعداد كبيرة من المصلين تترواح ما بين 20000 إلى 35000 مصلِ في المرة.
مؤمنة وتدار بحرفية عالية ... كل الشكر للقائمين عليها.
حديقة  دمياط الجديدة المركزية ... فعلا حاجة تستحق التقدير
 
 

حديقة الجزيرة - بجوار كوبري قصر النيل


تقع حديقة الجزيرة، جوة النيل امام الفورسيزون بالظبط على كورنيش النيل مباشرة
هى جنينة محندقة صغيرة بس جوها ممتاز
سعر تذكرة الدخول لحديقة الجزيرة : 5 جنية
مناسبة جدا ساعة المغربية فى الوقت دة
 

 
سفارى بارك او حديقة الجيزه

حدائق


مناسبة للأسرة أو الشلة 
فيها مطاعم وملاهي وسينما ومساحة خضراء واسعة
على مساحة 40 فدان تأسست حديقة الجيزة،
وهى تانى أكبر حديقة في مصر بعد حديقة الأزهر.
هي معمولة على الطراز الريفي 
ومكانها بالضبط أسفل الطريق الدائري بجوار محور أحمد عرابي الجديد
فيها مسرح روماني ومسرح عرائس وشوية مطاعم وكافيتريات
وبحيرة صناعية كبيرة
وفيهما كمان السواقي والبحيرة الصناعية 
سعر تذكرة دخول حديقة الجيزة فى الاعياد 15 جنيه
العنوان : علي ارض مطار امبابة -اسفل الطريق الدائري بجوار محور احمد عرابي الجديد
 
 

حديقة الأورمان


الحديقه دى من الاماكن الحلوه جدا واللى مش واخده حقها ومحدش بيفتكرها غير فى معرض زهور الربيع مع أن فيها أماكن للتمشيه كتير وممكن اللعب فيها كمان ....
الجو فيها جميل وحتة أنك تقعد فى أماكن ضله واللى مضلل عليك الشجر دى فى حد ذاتها حاجه ممتعه
وفى هناك كافيتريا محندق صغير وأغلى حاجه عندهم ب 20 جنيه وفى مكان بيعمل بيتزا الواحده ب 15 جنيه
سعر تذكرة الدخول حديقة الاورمان ب 10 جنيه فى الأعياد  فى الايام العادية التذكرة ب 2 جنيه دة غير ان كل ربيع بيتعمل فيها معرض الزهور اللى بيستمر حوالى شهرين وبيكون حاجة مميزة جداا 
حديقة الاورمان أمام حديقة الحيوان بالظبط
 
 

الحديقة الدوليه

حدائق


حديقة بمدينة نصر
المكان كويس واللون الاخضر فيه كتير ومش ممنوع القعده ع النجيله ( يعنى حافظوا عليها )
الحديقه كويسه أوى للعب الاطفال والكافتيريات جوه مش أجباريه براحتكم
سعر تذكره دخول الحديقة الدوليه  : 10 جنيه 
العنوان : ش د. محمود ابراهيم متفرع من ش عباس العقاد الحى السابع , مدينة نصر, القاهرة
 
 

 حديقة الفنون 


هي تحديداً في شارع عبد العزيز آل سعود
يعني لو جاي من اتجاه الجيزة 
فهي بعد كوبري الجامعه بتدخل يمين
وتوجد داخل الحديقة العديد من المقاعد،
و ممكن تاخد اكلك و شوربك معاك 
ومسموح انك تدخل بهم
و يوجد بالحديقة مراكب نيلية
ممكن من خلالها انك تأجر مركب صغيرة
وتاخد جوله سريعه في النيل
وتفتح "الفنون" أبوابها،
من الساعة الـ ٨ صباحًا، وحتى ١٢ مساءً
سعر تذكره دخول حديقة الفنون : 5 جنيه


 

حديقة ام كلثوم 


للأسف ناس كتير جدا ماتعرفش عنها حاجة
رغم انها من اجمل الحدائق الموجودة عـ النيل 
عنوانها بالظبط ،، لو جاي من اتجاه الجيزة 
فهي بعد كوبري الجامعه بتدخل شمال
في اتجاهك لمدخل استقبال
مستشفى القصر العيني القديم
مواعيد العمل : من الـ 9 صباحًا وحتى الـ11 مساءً 
وطبعاً بيسمح بدخول المأكولات و المشروبات 
اكثر ما يميز حديقة ام كلثوم هو موقعها و هدوئها
وجمال الوان الأشجار و الطبيعه الجميله بها
سعر التذكره : 5 جنيه