مقالنا النهاردة عن مدينة دبي اللى تعتبر من البلاد العربية اللي ممكن تروحها وتستمتع بوقتك كويس جدا بتكلفة معقولة وكمان مصنفة عالمياً فى مجال السياحة العالمية .

ودبى مدينة عربية وصلت للعالمية بسرعة الصاروخ وفي كافة المجالات ، اعتمدها الأساسى حاليا هو على السياحة وخصوصا انهم فاهمين كويس اوى فى كيفية الترويج عن بلدهم ، تقريبا عندهم طوال السنة صيف أو شتاء فاعليات عالمية .

السفر الى دبي ومتوسط سعر الفيزا وكيفية استخراجها : 

 عشان تسافر دبي لازم أولا تأشيرة عن طريق شركات السياحة  وتكلفتها بتكون حوالي من 85 لــ 100 دولار حسب كل شركة سياحة أو ممكن لو هتحجز على طيران الإمارات تقدر  تقدم عن طريقهم على الفيزا ،و بتحمل على السايت بتاعهم صوره شخصيه و صوره من الباسبور وتكلفتها بتكون  على حسب المدة وممكن تتقدم بطلب تأشيرة دبي وتتعرف على الاسعار من خلال : خدمات التأشيرات من طيران الامارات 
 

تذكرة الطيران إلى دبي

طالما نويت السفر الى دبي يبقى لازم تبدأ تدور على تذكرة طيران كويسة ورخيصة لان هو ده اللي هيفرق معاك في تكلفة الرحلة

فى عروض كتير على طيران الإمارات أو مصر للطيران بس الأرخص طيران الخليج ترانزيت البحرين أو الطيران السعودى ترانزيت الرياض وبيكون متوسط سعر تذكرة الطيران لدبي في حدود 4000 جنية 

الفنادق واماكن الاقامة في دبي

الإقامة فى دبى وأسعارها مرتبطة بالفترة اللى أنت مسافر فيها لكن ممكن نقسم الفترات فى دبى لثلاث فترات : 

-  الهاي سيزون وتبدأ من منتصف شهر ديسمبر حتى منتصف فبراير ودة بيتزامن مع مهرجان السياحة والتسوق وبتكون الفنادق اسعارها عاليه جدا 

- الفترة الثانية جزئين : الجزءالأول من نهاية شهر أكتوبر حتى أوائل ديسمبر يتخللها فترة العيد الوطنى للإمارات ويوم الشهيد من 27/11 حتى 3/12 من كل عام و دى بالنسبة لنا أحسن فترة للسفر لدبي الجو بيكون ممتاز وأسعار الفنادق متوسطة والشوبينج ولا أروع وفي عروض فى كل مولات دبى بأسعار تصل للنصف وأكثر 

والجزء الثانى من منتصف فبراير حتى نهاية شهر أبريل وبيكون فيها أعياد الربيع وبرضة فيها تخفيضات وعروض كتيرة

- الفترة الأخيرة من شهر مايو حتى شهر أكتوبر نظراً لارتفاع حرارة الجو والرطوبة لكن أسعار الفنادق بتصل للربع حتى فى الفنادق الخمس نجوم وبرضو الشوبينج ممتاز لان بيكون فى عروض فى فترة ما بين الشتاء والصيف تقريبا بتبدأ فى 22/7 حتى 5/8 من كل عام 

أرخص مناطق السكن في دبي : 

 منطقة ديرة ودى تعتبر دبي القديمة - ومنطقة بر دبى والمنطقتين دول فيهم حوالى سبع محطات مترو ( محطة الفهيدي - محطة برجمان - محطة ديرة سيتى سنتر - محطة الرقة - محطة صلاح الدين - محطة أبو بكر الصديق - وأهم محطة محطة الاتحاد لانها محطة رئيسية تبادلية بين خطين المترو الأحمر والأخضر) 

وفى بعد كدة منطقة البرشاء متوسطة الأسعار وأغلى منطقة شارع الشيخ زايد وأغلب فنادقه خمس نجوم 


يعنى فى النهاية خلينا نتفق على انك وانت بتختار الفندق اللى هتحجزه هناك يفضل يكون قريب من محطة مترو لان دا هيسهل عليك كتير و هيوفرلك اكتر 

وسعر الليلة هناك في فندق محترم غرفة ثنائية او ثلاثية بيبدأ تقريبا من 200 درهم يعني 1000 مصري ، يعني لو انتو 3 مثلا الليلة كدة مش مكملة 350 جنيه للواحد.

 

الأكل في دبي

 
مش هنقدر نتكلم علية لأنة حسب ميزانية كل واحد بس اللي نحب نقوله أن كل أنواع الأكل موجودة فى دبى مصرى هندى تايلاندى صيني لبنانى باكستانى سى فود وممكن تاكل بعشرين درهم وبرضو ممكن تاكل بمائة درهم 

( ويفضل متحجزش أكل مع الفندق لانه مش حلو وغالي )

الأنتقالات فى دبى 

دبى فيها شبكة مواصلات عملاقة اولا مترو دبى ودة تقريبا بيغطى 90% من دبى وموجود في معظم المناطق اللى انت ممكن تروحها فى دبى و التذكرة ب ٥ درهم وميزة المترو  هناك انه بيعدي علي معظم الأماكن السياحية اللي هتحتاج تروح لها في دبي. 

والحلو كمان في المترو انه لي محطة جوة المطار تقدر لما تنزل تركبه تروح بيه الفندق وانت مسافر كذلك، وعاملك جوة عربية للي معاهم شنط زي عربيات السيدات كده، المهم تكون عارف اسم المحطة اللي هتروحها.

 


أهم المحطات في دبي 

 محطة مول الإمارات - محطة دبي مول- محطة ديرة سيتى سنتر - وطبعا محطة الأتحاد أو (Union Station) ودى فى منطقة ديرة اللى زى ما قولت محطة تبادلية هامة خلف محطة الاتحاد موقف الأتوبيسات ممكن تروحوا منه على القرية العالمية اللى هنتكلم عنها حالا 

كيفية استخدام المترو في دبي

عن طريق شراء كارت نول وبيتم شحنة واستخدامه سواء فى المترو أو الأتوبيس وكمان ممكن يستخدم لركوب ترام دبى 

الشوبينج في دبي 

 دبى فيها كم هائل من المولات اللى تقريبا فيها كل البراندات العالمية لكن أمتى بقى التخفيضات دي أنسب وقت للتخفيضات فترة العيد الوطنى والفترة ما بين الصيف والشتاء والفترتين دول فيهم ميزة أن أسعار الفنادق بتكون معقولة جدا خصوصا فترة الصيف اللى أسعار الفنادق فيها بتنزل للربع وبدون مبالغة بتكون أرخص من فنادق مصر بكتيير

أهم المولات في دبي وأرخصها

  1.  مول ديرة سيتي سنتر وده فى منطقة ديرة وامامه محطة المترو وفى براندات كتير اوى وبيعمل عروض محترمة 
  2.  برجمان مول وده إمامة محطة البرجمان 
  3.  الغرير مول وده فى شارع الرقة وأمامة محطة مترو الاتحاد 
  4.  مول الإمارات وله محطة مترو خاصة 
  5.  دبى مول وبرضه له محطة مترو خاصة ( بعد ما تخلص لف علي التوكيلات في مول دبي هتلاقيه مغرق البلد هناك أسواق مكتوب عليها من 1 درهم ل 10 درهم هتندم لو مدخلتش هناك ... فيها كل اللي نفسك فيه (لبس/احذية/اكسسوارات/برفانات/العاب..... الخ) واي حاجة جوة سعرها مش هيزيد عن 10 درهم.
  6. دبى أوتلت مول وده فى طريق العين أسعارة ممتازة خصوصا فى فترة التخفيضات وكمان كل يوم أثنين فى عروض خاصة وتخفيضات تصل ل 80%
  7.  مول أوتليت فيلدج ودة تقريبا من أحدث المولات هناك مول محترم واسعاره ممتازة برضة فى التخفيضات ودة جنب دبي باركس أند ريزورتس 
  8.  كارفور هناك ميتفوتش تقريبا فاتح فى كل خرم فى دبى بيعمل عروض وهمية فى فترة التخفيضات على كل حاجة
  9. ابن بطوطة مول ودة من المولات الجميلة جدا حاجة كدة شياكة وفى محطة مترو باسم المول 

أتمنى نكون ما نسيناش حاجة عن دبى ويارب يكون المقال دة فى استفادة لاى حد بيفكر يسافر لدبي