كلنا بنكون دايما محتاجين مكان مختلف نقضى فيه الويك إند  أو بندور عن خروجه جديدة شبابيه بعيدا عن الخروجات التقليدية المعتادة وكتير بيكون الحل إننا يا بنروح ناكل يا بنقعد فى كافيه عادى أو نروح مول نتمشي وندخل سينما ومن هنا فكرنا نجبلكم اماكن مختلف وجديد ومناسبه اوى لخروجات الشلة وجروبات الصحاب 

 

أفضل الخروجات الشبابية الغير تقليدية فى القاهرة واماكن العاب مناسبة للكبار

1- Sky Zone Egypt

ايه رايك تروح تتشقلب انت واصحابك على مساحة 650 متر وتطلع الكبت اللي جواك او تتزحلق وتلعب هوكي او اقولك تعالي جرب ألعاب ال VR وقضي ويك إندك مع الزومبي او في الفضاء

هتدفع 50 جنيه وتتنطط لمدة ساعة متواصلة فى واحدة من أكبر الترامبولين الموجودة فى مصر .. 

هتطير من الفرحة ودة مش كلام لا ده بجد ويا سلام لو كنتم مجموعه مع بعض وتلعبوا سلة أو تتنافسوا فى الترامبولين ...

هتسيب موبايللاتك واى حاجة معاك فى خزانة .. لازم تتنطط وانت حر تماما .. هتلبس الشراب اللى بيساعدك على التنطيط ( بتشتريه أول مره ب 20 جنية وبعد كدة بيفضل معاك علطول و تجيبه معاك كل مرة ) ..

مكان ألعاب للكبار أخيرا وحاجة حلوة اوى وخروجة مناسبه جدا للشباب وحاجة غير تقليدية ابدا.. (عرض ال50 جنية دة من الأحد للأربعاء ) بعد كدة السعر 100 جنية فى الساعة

العنوان : داخل داندى مول – الدور الاول – 6 أكتوبر قبل بوابات طريق الأسكندرية الصحراوى

 

sky zone egypt

 

2- حديقة الجيزة - سفارى بارك

اللي مش عارف ايه هي سفاري بارك واول مره يسمع عنها هنقولك على كل التفاصيل

دي مدينه كبيره فيها العاب هتعيش الحياة الريفية و هتقضي يوم جميل وسط أبراج الحمام والسواقي والبحيرة

سفاري بارك بتجمع بين الطبيعة والأماكن الريفية وكمان فيه ملاهي والعاب كثيرة هتستمتع بيها جدا فيه لعبة ( المقص - الارما - التاجادا- السيارات المتصادمة ) وألعاب كتيييير ولما تخلص خالص اركب جمل كمان يعنى مكان فيه كل حاجة جديدة ومختلفة

وفيه كمان ركن العائلات بالقرية الفرعونية وسط البحيرة الصناعية والسواقى والخضرة المكان مناسب جدا لكل الأفراد وخروجات الشلة والعائلات والاطفال ..وكمان الالعاب تنفع للكبار والاطفال

الحديقة مكانها بالضبط أسفل الطريق الدائري بجوار محور أحمد عرابى الجديد

ومواعيدها  يوميا من الساعة 9 صباحا حتى 11 مساء

سعر تذكرة الدخول 10 جنيه للفرد ويوجد العاب مجانية للاطفال , ويوجد العاب كهربائية بمتوسط اسعار 7 و 10 ج للعبة

العنوان : على ارض مطار امبابة -اسفل الطريق الدائري بجوار محور احمد عرابى الجديد

 

سفاري بارك - حديقة الجيزة

 

3- نادي الرماية في الهرم

مش لازم تكون عضو هناك و مش لازم تكون لعبت اللعبه ديه قبل كده او محترف.

اول ما تدخل المكان هتلاقي كباتن مصنفة عالميا و واخده تصنيف عالمي هتدربك علي مسك السلاح و الوقفه الصح.

هناك في نوعين سلاح: بندقية و مسدس طبعا كل ده ضغط هوا و رش مش رصاص حي.

ليك مطلق الحرية تدرب علي اي سلاح حتي لو علي الاتنين في نفس اليوم مفيش مشكله.

السن: متاح جميع الاعمار بدايه من 10 سنوات ممكن يدخل يتدرب عادي.

المكان متاح ولاد و بنات عادي جدا

المواعيد المتاحة: يومي السبت و التلات من الساعه 5 مساءا حتي 8 مساءا...لو انت جايب عدد لا يقل عن 10 اشخاص ممكن تتصل بالرقم اللى هنقولك عليه تحت شويه و هيرد عليك كابتن احمد مراد و هيظبطلك ايام ومواعيد أخرى خارج المواعيد التقليدية.

الأسعار: المكان مش ربحي و كل غرضه هو نشر اللعبة و تقديم لاعبين دوليين لو عندهم الموهبه فهنلاقي الاسعار رمزية:

لو هتروح بغرض الرفاهية فسعر الحصه ب 75 جنيه شامله السلاح و مش بس كده هتشتري ب 25 جنيه 100 رش ودول كمية كبيرة جدا يكفوك مرتين تدريب يعني الموضوع هيكلفك اقل من 100 جنيه في المره.

لو عايز تتمرن ممكن تعمل اشتراك شهري ب 300 جنيه مرتين في الاسبوع يعني 8 مرات في الشهر طبعا بتشتري رش ب 25 جنيه كل حصتين يعني تكلفة الشهر حوالي 400 جنيه.

ملحوظة
لو هتدرب هناك بالنظام الشهري فلازم تعمل فيش و تشبيه موجه لنادي الرماية.
لو هتلعب بالحصة فمش محتاج الفيش والتشبيه.

-كيفيه الحجز
بتتصل تحجز مع الكابتن أحمد مراد من خلال الرقم 01554916383 
مواعيد الحجز
ممكن تكلم الكابتن احمد من الساعة 9 صباحا الي 9 مساءا طوال الاسبوع ماعدا يوم (الجمعه) مفيش اتصال

 

نادي الرماية بالهرم


4- Immersive VR

المكان دة هتلاقي عندهم لعبة Pubg تقدروا تلعبوها VR و عندهم كمان لعبة جديدة اسمها zero caliber ودي زي call of duty وبتلعبها انت واصحابك مع بعض

مبدئيا المكان ده ادمان لو روحته مش هتبطل تروحه كل ويك اند 

المود بتاعه تنطيط و شبابي جدا بتروحوا تنبسطوا جداً و تطلعوا كل الطاقة السلبية انت والشلة 


المكان فيه أكتر من ١٠٠ لعبة تختار منهم اللى تحبه و عندهم ألعاب مش موجودة فى أى مكان تانى فى مصر

أحلى حاجة فى ال VR مش بس تجربة جديدة لا دة كمان بيعيشك فى الجو و المود اللى انت عايزه

فكرة المكان إن كل واحد فينا بيبقى جواه طاقة سلبية فقرروا يعملوا حاجة مختلفة و يتميزوا فيها عشان نفرغ الشحنات دى بفرفشة و هيبرة و تخرج من عندهم أخر روقان ودي خروجة فى حد ذاتها هتاخدك لجو وعالم تانى لازم تجربها 

يفضل الحجز قبل ما تروحوا اسعارهم كويسه وبتتحسب بالوقت مش على حسب اللعبة .ولما  يزيد عدد الأفراد سعر الفرد بيقل 


العنوان: مول سكاي بلازا الدور الأول بالقرب من الجامعة الأمريكية - شارع التسعين الجنوبى - التجمع الخامس
التليفون: ‭+20 120 1253335‬


وبما انك هتكون فى التجمع الخامس هنقترح عليك حاجة حلوة اوممكن تخلص لعب وتروح تجربها وهتكون دى المكان الخامس اللى هنتكلم عنه 

 

Immersive VR

 

5- Cinema Galaxy CFCM 

خلصت لعب ومحتاج تكمل يومك بمود جديد كله روقان و استجمام و استرخاء و تحس إنك برنس فى نفسك  
يبقى لازم تطلع على سينما جلاكسي وتطلب تذكرة vip وتفرد رجلك وتتفرج على الفيلم براحتك 

السينما دي لو مجربتهاش يبقى فاتك كتير بجد،  انت بتدخل السينما تقعد قاعدة رايقة تمدد رجليك تغطس فى الكرسى ( الكرسى كمان فيه زراير فى الجنب بتغير وضعيتك و انت قاعد ) و بين كل كرسى و التانى ترابيزة تحط عليها حاجتك و تاخد الفشار فى ايدك و تعيش مع الفيلم فى كل هدوء و تحس إنك VIP بجد

القاعدة هناك مبهجة جداً و ممكن تجيبوا سناكس تسليكوا في القاعدة

يعنى من الاخر دى من افضل الاماكن فى مصر اللى فاهمة يعنى إيه سينما و خدمة و راحة للعميل مش مجرد واحد جى يدفع فلوس و يتفرج على الفيلم و خلاص .. لأ انتوا بتاخدوا بحق فلوسكوا تالت و متلت و بيعيشكوا الجو المطلوب و بيعرفوا ازاى يخرجوكم مبسوطين
سعر التذكرة في الحفلات الصباحية 50 جنيه والحفلات المسائية 75جنيه

العنوان: كايرو فيستيفال سيتى - التجمع الخامس - البوابة الرئيسية جنب LC WAIKIKI
التليفون: ‭+20 2 2516 8241‬

 

Cinema Galaxy CFCM

 

6- المكان اسمه Dragon Island 

الخروجه اللى هتاخدك لجو جديد كله تنطيط ولعب وتقضي يوم حلو جدا مع اصحابك 

المكان في لعبة الــ Zip line ودي بتتعلق في حبل وتتزحلق في الهوا كأنك طاير

وفيه كمان لعبه  الــ High rope ودي بتعتمد علي ال Balance أكتر ومهمتك تعدي بسلام على خشبة عرضها 5 سم وتمشي علي براميل وكوتشات وتتعلق بحبال وحاجة أخر Adventure

ودول كنا اتكلمنا عنهم بالتفصيل فى مكان تانى متخصص فيهم بردو اسمه العاب دير سمعان الحراز ، 

 كمان فيه عندهم  Trampoline اللى هتتنطط عليه براحتك وترجع تكمل باقي الالعاب زي الSumo Bouncer وال Bouncer ودول كلهم عجن وضرب فهات صحابك اللي خانقين وفش غلك فيهم

 وفي ألعاب تانية زي ال Bungee run و Soccer وبلياردو و كيدز اريا كبيرة كمان 

كل الحاجات دي معمولة ب Safety عالي جدا تأكدوا انكوا هتطلعوا مبسوطين جدا ومفيش أي حاجة هتقلقكو ده غير ان اي حد يقدر يلعبها سواء كبار أو صغيرين ودي أكتر حاجة هتحبوها في المكان وهتعجبكم أكتر لو عيلة أو شلة صحاب أعمارهم مختلفة

*الأسعار: 350 جنيه شاملة كل الألعاب ما عدا ال Kids Area 

  • 300 جنيه شاملة Inflatable Games + Trampoline Park + Zip Line + High Rope 
  • 250 جنيه شاملة Inflatable Games + Trampoline Park + Zip Line + Bungee Run 
  • 200 جنيه شاملة Inflatable Games + Trampoline Park + Zip Line 
  • 150 جنيه شاملة Inflatable Games + Trampoline Park 
  • 75 جنيه Kids Area للأطفال من سنتين ل 4 سنين

العنوان: ميدان فيكتوريا - دجلة - المعادي
التليفون: 01200120015

 

dragon island


7- المكان اسمه SABE7

ايه رأيك تقضي مع صحابك يوم كامل فى جزيرة على النيل 

وسط الهواء وتركب مركب في  النيل وقعده عربى وتشوا لحمة للصبح 

بص يا سيدى أنت هتظبط مع الشلة بتاعتك وتطلعوا على الجزيرة فى منيل شيحة الناحية الثانية من كورنيش المعادى

ومن هنا تبدأ مغامرة السفاري على الجزيرة

اول ما بتوصل بتستلم ال area بتاعتكم بتكون قعدة عربى قدمها شواية فيها فحم وبتكون جايب معاك اللحمة أو الفراخ بتاعتك اللى هتشويها عشان تبدأها بشوى كده نيجى بقى للمراكب ودى بيكون في منها نوعين 

المركب الصغيرة لفرد واحد اسمها "كاياك" بتتأجر بالساعة بتلف فيها فى النيل لوحدك 

المركب الكبيرة  ودى وبتكون ل4 أشخاص بتطلع رحلة على النيل تلف لفة وبترجع على الكامب تانى فى ساعة تقريباً 

بالنسبة لهواة الصيد بيكون فى سنارات صيد السمك على النيل 

ولو سقعت بالليل بتستلم خشب بتحطه على الشواية بيعمل تدفيه حلوة اوى من بتاعة زمان

بيكون فى ألعاب ورقية زى "كوتشينة وطاولة ودومينو"

بيكون فى projector كبير بيتعرض عليه أفلام أو ماتشات مهمة حسب اليوم 

و فى kid area للأطفال

احسن حاجة تعملوها في يوم زى دة انكم تقفلوا الموبايل وتفصلوا عن العالم الخارجى تماماً عشان تركز ع الطبيعة الخلابة اللى حواليك والقعدة الحلوة مع صحابك قدام النيل والسماء والنجوم

 سعر تأجير الـ area شاملة الشواية بالفحم والقعدة العربى ومشروب مجانى (1200 جنية) " من الاحد إلى الأربعاء" اما فى الweekend بتكون (1700 جنية) "خميس وجمعة وسبت"

الarea بتكون ملكك 10 صباحاً لحد 12 بالليل، بحد أقصى 12 فرد ، يعنى كل واحد هيدفع 100 جنية بس لو عددكم 12 العنوان : منيل شيحة - الناحية التانية من المعادى

التليفون : 0237493173

 

saba7

وبكدة نكون خلصنا الاماكن بتاعتنا وقولنالك على افكار جديدة للخروجة هتوفر عليك حيرة وتدوير كتير وتأكد انك هتنبسط انت واصحابك وهتعيشوا يوم مبيتكررش كتير