كل المعلومات التى تخص معرض القاهرة الدولي للكتاب 2019

المعرض السنة دي اُقيم  بمركز المعارض الدولية بالتجمع الخامس وسعر تذكرة دخول المعرض 3 جنيه .

مواعيد معرض الكتاب 

-المعرض بيفتح أبوابه للجمهور من يوم الأربعاء الموافق 23 يناير 2019 ومستمر حتى 5 فبراير 2019 والمواعيد بتكون من الساعة 10 صباحاً وحتى 8 مساءً والندوات بتستمر حتى الساعة 9 مساءً

المشاركين فى معرض الكتاب 

  •  مشاركة الهيئة العامة للكتاب بما يذيد عن 594 عنوان جديد
  •  مشاركة 35 دولة عربية وأجنبية.
  •  مشاركة 1273 ناشر مصرى وأجنبى.
  •  مشاركة 170 مبدع عربى واجنبى.
  •  الشيخ سلطان القاسمى والروائى إبراهيم الكوني، والجابونى جان ديفنسا نياما، أبرز الضيوف
  •  عدد حفلات التوقيع 600 حفلة. 
  •  مشاركة اكتر من 300 شاعر في قاعة الشعر 

نصائح ليك تعملها وانت فى معرض الكتاب

  •  يفضل الدخول من بوابات 3 و 4 لان الضغط عليهم بيبقى خفيف
  •  مهم جدا انك اول ما تدخل اي قاعة تروح الريسبشن تاخد خريطة بالمعرض مجانية 
  •  ولو انت مهتم بالثقافة اطلب منهم جدول البرنامج الثقافي 
  •  فيه كمان أفراد متطوعين لابسين جاكت اسمر هيساعدوك في اي معلومة عاوزها

 القاعات الموجودة داخل معرض القاهرة الدولى للكتاب 

المعرض كله عبارة عن  ٤ قاعات واتنين قاعة بلازا 1 و 2

القاعات الأربعة من جوه متقسمة A, B, C

 اما قاعة بلازا 1 مكانها ما بين قاعة 1 وقاعة 2 في الدور التاني ودي فيها الندوات الثقافية والمعارض الفنية واللي فيها أكثر من 300 شاعر

اما قاعة بلازا 2 مكانها ما بين قاعة 3 و قاعة 4 وفيها باقي الندوات الثقافية


قاعة 1 

فيها معظم دور النشر المصرية

  • المركز القومي للترجمة - تخفيضات 50 % لطلبة الجامعات الحكومية ولغير الطلبه تخفيض 30 %
  • الهيئة العامة لقصور الثقافة A72
  • صندوق التنمية الثقافية A51 
  • فرست بوك C29 + العبيكان C26 

قاعة 2

فيها معظم دور النشر للكتب الأجنبية 

  • الهيئة المصرية العامة للكتاب (كتب اجنبية فقط) B34
  • مكتبة الانجلو المصرية B29 + مكتبة الجامعة الأمريكية B30
  • المركز القومي للترجمة B6 + دار السلام B11

قاعة 3

ودي مليانة جدا فيها : 

  • جناح المؤسسات الصحفية ( الاخبار + الاهرام + دار الهلال + دار المعارف + روزاليوسف....) 
  • جناح الثقافة (وزارة الثقافة + مكتبة مصر + دار الأوبرا + القومي للمسرح ....)
  • وجناح الأزهر الشريف السنة دي تحفة : عرض حلو جدا لمقتنيات الشيخ / شلتوت شيخ الأزهر السابق , بالإضافة إلى نماذج من امهات الكتب والمخطوطات النادرة
  • ركن دار الافتاء وفيه متخصصين موجودين لاي فتوى او أي تساؤلات
  • جناح للدول المشاركة (الصين +ألمانيا +اليونان + قبرص + الأردن ...وغيرها)
  • جناح المملكة العربية السعودية 
  • جناح جامعة الدول العربية ضيفة الشرف

قاعه 4 

ودي فيها : 

  • كل دور النشر العربية والسورية واللبنانية
  • الهيئة العامة للكتاب - كتب مخفضة تبدأ من جنيه وانت طالع 
  • مؤسسة إبداع للترجمة - كتب مخفضة
  • عدد 3 محلات فقط من سور الأزبكية C34 ودة لان سور الازبكية مش موجود فى المعرض السنة دى لكن موجود فى مكانه الرئيسي فى العتبة 

متوفر أماكن للصلاة للرجال والسيدات،، ده غير محلات الاكل في الساحة الخارجية. ودي كانت كل التفاصيل اللى تخص معرض القاهرة للكتاب 2019 نيجى بقى لحاجة تانيه مهمه وهو ازاى توصل للمعرض ؟ 

 

مواصلات معرض القاهرة الدولى للكتاب و ازاى توصل للمعرض من اى مكان داخل القاهرة 

الطريق الدائري: 

لو أنت جاي من الأقاليم ممكن تنزل سلم الدائري اللي قبل شبرا .. وعند السلم هتلاقي ميكروباصات التجمع الخامس .. وتنزل مركز مصر للمعارض الدولية اللي فيه المعرض.

رمسيس: 

لو أنت جاي بالقطار أو لو قريب من وسط البلد .. ميكروباصات التجمع الخامس من عند مسجد الفتح .. وكمان أتوبيسات النقل العام رقم 1064 و1018 

موقف السلام:

لو أنت جاي من الأقاليم أو قريب من موقف السلام .. هتلاقي ميكروباصات وباصات التجمع الخامس باستمرار .. واتوبيسات النقل العام 505.

المنيب:

جنب محطة  مترو المنيب هتلاقي ميكروباصات التجمع الخامس دة فى حالة لو كنت جاى من الجيزة أو اكتوبر 

الحي العاشر

لو أنت جاي من مدينة نصر ممكن تركب اي عربية للحي العاشر.. هتلاقي موقف التجمع الخامس.

السيدة عائشة:

أو لو جاي من المعادي أو 6 اكتوبر أركب اي ميكروباص  يوديك السيدة عائشة وهناك هتلاقي حاجات بتنادي تجمع خامس أو ممكن تركب أتوبيس النقل العام رقم 716.

المواصلات اللي فوق دي موجودة طول السنة..

طيب دة فيه كمان حاجة جديدة السنة دي وهى خطوط حصرية تابعة لمواصلات مصر لزوار معرض الكتاب (هتلاقي على الأتوبيسات لوجو المعرض) .. وكمان هياخدوا خصم 35% على التذكرة لو دفعت بكارت دفع ذكي ودة ممكن تجيبه من أي سائق وبتشحن من فوري عادي جدا :

الخط رقم <1> بيبدأ من منطقة صقر قريش وصولا لــ معرض الكتاب:

وخط سيره بيكون :  صقر قريش >بكارفور المعادى > نادى وادى دجلة > بيطلع على الطريق الدائرى ومنه على محور المشير ثم معرض الكتاب.

الخط رقم <2> ودة بيبدأ من التحرير( عبد المنعم رياض ) وصولاً لــ معرض الكتاب:

وخط سير بيكون : ميدان عبد المنعم رياض > رمسيس > عباسية ثم جامعة الأزهر ومنه على محور المشير طنطاوى  ثم معرض الكتاب.

الخط رقم <3> بيبدأ من العباسية وصولاً لــ معرض الكتاب:

وخط سيره بيكون من العباسية ثم نادى السكة ومنه على جامعة الأزهر > محور المشير طنطاوي > معرض الكتاب.

الخط رقم <4> بيبدأ من ميدان الجيزة وصولاً لــ معرض الكتاب:

وخط سيره بيكون ميدان الجيزة > جامعة القاهرة ومنها إلى السيدة عائشة ثم طريق الاتوستراد > جامعة الأزهر > معرض الكتاب.

الخط رقم <5> بيبدأ من النزهة الجديدة وصولاً لــ معرض الكتاب:

وخط سيره بيكون : النزهة > ميدان الحجاز مروراً بالسبع عمارات ومنها علي مكرم عبيد ثم مصطفى النحاس > الوفاء والأمل واخيرا المعرض.

الخط رقم <6> بيبدأ من الأميرية وصولاً لــ معرض الكتاب:

وخط سيره بيكون : الأميرية > ميدان المطرية والحلمية مروراً بكلية البنات وميدان رابعة العدوية ومنها الى الحى السابع وحى السفارات ثم معرض الكتاب.

ولو جاي بعربيتك أو مجموعة وجايين بعربية واحد فيكم ..فيه موقف في المعرض يستوعب 3500 سيارة وجاري إنشاء موقف آخر ليستوعب 2500 سيارة يعنى مش هتشيل هم ركنة العربية .