تقرير عن الاسكندريه وتكلفته بالمليم نقلا عن برنامج مجرب

مين فينا مش نفسه يروح اسكندرية ويا سلام لما تخطف الوقت المثالى بتاع قبل رمضان او حتى فى رمضان هتبقى متعه والله أكيد بتبقى مرتبط بذكريات جميلة معاها أو لم تسمح ظروفه بزيارتها من قبل ونفسه يروح 
يالا نتحرك بسرعه واحكيلكم عن رحله سريعه ثلاث أو أربع أيام للأسكندرية .


أولاً المواصلات ، ثانياً الإقامة ، ثالثاً أماكن الفسح والأكل


1-المواصلات : 

الأفضل تتحرك بدون سيارتك... الوسيلة المثالية هي القطار - وإحنا اخدنا القطر الفرنساوي... طب لية ؟ أولاً القطار فسحة لوحدة لأن الكراسي كبيرة جدا ومريحة جدأ وواسعة وممكن تتلف ويبقى اربع كراسي مواجهين لبعض لو انتم أسرة أو شلة صحاب ، ثانيا الطريق اللي القطار بيمر بيه الطريق الزراعي، فاطول الطريق انت بتتفرج على أراضي زراعية ومساحات خضراء شاسعة وفلاحين وحيوانات مرتبطة بالأرض من خلال شباك القطار وكمان حاول تاخد كتاب معاك ، استكمالا لحالة السمو والاسترخاء ثالثاً سعر تذكرة الدرجة الأولى في الفرنساوي حاجة وسبعون جنيهاً 
تمام وصلنا كدة.... قطار التاسعه صباحاً وصل الحادية عشر والنصف 

 

2- الإقامة :

حجزنا غرفة ثنائية في فندق اسمة كريون والإقامة كانت بالافطار ٣٦٠ جنيهاً في الليلة ( ملحوظة، السعر متغير أثناء الموسم) 
الفندق دة كان ممتع للغاية... غرفة بسيطة نظيفة لها بلكونة ترى منظر رائع للبحر مباشرة - تكفي الغرفة كرحلة من جمال المنظر و روعتة الفندق ذو طراز قديم ولكنة مميز بالنظافة والهدوء والراحة النفسية..... وجبة الإفطار بسيطة ولذيذة.... تمام فطرنا ؟ ياللا نتفسح 

3- اماكن الفسح والخرزج 

أول يوم روحنا فية على طول على قصر المنتزة (يوم رائع) على فكرة الفندق في محطة الرمل - طيب ركبنا إيه من محطة الرمل لقصر المنتزة ؟ الباص ابو دورين الجميل وطبعاً قعدنا في الدور العلوي من أمام الفندق إلى داخل القصر... سعر تذكرة الباص عشرة جنيهات للفرد والأطفال بدون تذاكر - الباص بيمشي مسافة من عشرين إلى ثلاثون دقيقة ودي فسحة لوحدها برضو لأن الطريق كلة على الكورنيش - وصلنا القصر ؟ تمام، القصر بقى غير إن له بلاج لوحدة فيوجد الحدائق المنتشرة حول البحر من ثلاث جهات - البلاج رائع.. رائع جداً..... آه نسيت، سعر تذكرة دخول القصر ٢٥ جنيها للفرد والأطفال بدون... وثمن الكرسين والترابيزة والشمسية ٦٠ جنيه وعشرين تاني للعودة في الباص اللي جيت فيه يعني حوالي ١٥٠ جنيه لكن اليوم لن ينسى حقيقي.... غير أن الشاطئ جميل وهادي ونظيف ممكن تستمتع بعد البحر بالحدائق هناك فهي رائعه أيضا فعلاً نزهه نفسية كأنك بتفسح روحك..... ناقص اية كدة ؟ عايزين ناكل طبعاً.... الاختيارات كثيرة لكن لابد من وضع مطعم سمك على القائمة... مطاعم السمك كتير واللي ممكن يعجب واحد ممكن مايعجبش التاني.... مثلاً إحنا أكلنا سمك في مطعم اسمة شعبان (هو دة شعبان اللي بيقولوا علية) اسمة كدة..... ممكن مطعم الكاتعة (برضو اسمة كدة) وممكن قدورة... وممكن في بحري مطعم فرج.... وممكن حودا جوندل 
بالنسبة للاكلات الأخرى فيه الفلاح بتاع الكبدة (عيبة الزحام الشديد) وفية مطعم أبو ناصر خلف الفندق على الترام ودة عندة أنواع أكل كتير أوي وجيدة، من اول الكشري لحد اللحوم... وله طابع مميز 
الآيس كريم هناك المشاهير زي عزة والجوكر ولكن حتى عربية الآيس كريم اللي على الكورنيش جيدة 

صباح الخير، هانروح فين بعد الإفطار في اليوم الثاني ؟ 
حوالي العاشرة صباحاً ( الميكروباص اتنين جنيه /الباص اتنين جنية /التاكسي عشرة جنية /الحنطور ١٥ جنية) من أمام الفندق وعلى مكتبة الإسكندرية دوغري.... حتى لو انك مش قارئ ومالكش في الكتب إلا أننا ننصح بزيارة مكتبة الإسكندرية لأنها متحف عالمي مش للكتب فقط ولكنها البقعة التي جذبت عيون العالم منذ قرون وإلى الآن....... التذكرة خمسة جنيهات للدخول وأيضا بالداخل يوجد مرشدين للجمهور للشرح ولاجابة الأسئلة 
بعد المكتبة ممكن تجهز نفسك للذهاب لأحد الشواطئ المعروفة زي ميامي، سيدي بشر ، الشاطبي ، رشدي ، العصافرة...... 
لابد في اليوم التالي من زيارة قلعة قايتباي وكمان يستحسن ركوب الحنطور ( ذهاب وعودة بالحنطور خمسين جنيها) وقبل دخول القلعه في المدخل يوجد متحف الأحياء المائية وجهز نفسك بشوية اندهاش لما سوف تراه في هذا المتحف برضو تذكرتة خمسة جنيه 
القلعة بقى الانبهار هي الكلمة المناسبة والتصوير هناك لن يضاهية اي مكان آخر وتشعر أنك على لقاء مع التاريخ 

 

 

المصدر : صفحة افضل اماكن الفسحة والخروج فى مصر