اهو المكان ده الناس بتسافره فى الصيف فى الزحمة ويرجعوا يقولك مش حلوة ومستمتعناش

طب جربت تروح رأس البر فى الشتا ؟

تعرف ان البلد شغاله عادى بقوتها وبتبقى جميلة جدا ونضيفة فوق ما تتخيل

السفر الى راس البر

ناس كتير مارحتش راس البر عشان متخيلين انها مدينه مفيهاش خدمات و شوارعها مكسره و غير كده ناس بتاخدها انها عار عليهم انهم يقولوا لحد انهم مسافرين راس البر عشان محدش يسخر منهم .

لكن تعرفوا ان هناك بيتبني فندق Steigenberger الفندق العالمي ذو الــ 5 نجوم و اللي بانتهائه راس البر هتتحول لمنطقه سياحيه عالميه.

طيب تعالوا نكتشف راس البر و نشوف هل فعلا الناس عندها حق و لا احنا ظالمين المدينة ديه.

 

راس البر

 

المواصلات لراس البر من القاهرة

- ممكن تركب القطار الي دمياط و من هناك تركب ميكروباص 

- ممكن تركب ميكروباص من عبود الى محافظة دمياط ومن هناك تركب ميكروباص الي راس البر

 

راس البر

 

الإقامة في راس البر وانواعها

1) الشقق

خد بالك العمارات والشقق هناك اسمها عشه فا متتخضش اما حد يقولك عايز عشه 

شكل العمارات راقي جدا و ده باين في الصور لدرجه من كتر جمال النقوش الي عليها خصوصا ان ملاك العمارات ديه كبار التجار الدمياطيه اللي معروفين بارقي الموبيليات عشان كده تلاقي زي ما بيهتموا بالنقوش في النجارة

هتلاقي نفس النقوش على العمارات بتاعتهم و علي فكره العمارات ديه ارقي من عمارات التجمع الخامس و الليله ممكن توصل الي 1500 جنيه.

هتلاقي سماسرة هناك ممكن تاجر منهم او اعلانات على العمارات انها للإيجار

2) الفندق

هناك في فنادق و لوكندات كتيره جدا وفي منها الي من ايام الملك فاروق و لسه نضيفه.

احنا بنقترح عليك فندق اسمه Abo Table و ده نجمتين بس تصنيف 3 نجوم عشان من غير بار وحمام سباحة.

الفندق مريح و امان جدا و سعر الغرفه الدبل حوالي  200 جنيه و التريبل 300 و في غرف رباعي ب 400 جنيه.

رقم التليفون للحجز 0572554168 او 05725544463 

ميزة الفندق ده انه في قلب المدينة و قريب جدا من البحر 8 دقائق تمشيه و من اللسان حوالي 15 دقيقه تمشيه و كمان حواليك كل المطاعم و السوبر ماركت يعني منطقه حيويه.

 

راس البر

 

المطاعم ومحلات الحلويات فى راس البر

-اشهر مطاعم راس البر هو محل فطير اسمه فتوح و من اجمل الفطاير اللي ممكن تاكلها في حياتك عشان الفطير مخدوم بس نصيحه خد فطيرة مشكل جبن و فطيرة سجق 

اول ما هتشوف الاسعار هتلاقي بتبدا ب 60 جنيه و ناس هتقول غاليه جدا بس علي فكرة الفطيرة الصغيرة بالنسبة للقاهريين هي لارج يعني تكفي 3 اشخاص أكيله

ملحوظة 

مينفعش تروح فتوح و متاكلش فطيرة راس البر اللي معروف بيها و ديه بتكون محشيه مهلبيه و عليها كميه مكسرات رهيبه مش هتشوف الفطيرة من كترها.

-حلقات السمك في رأس البر

طبعا بما ان راس البر ملتقى النهر والبحر هتلاقي حلقات السمك بتبيع الاسماك النهريه والبحريه و كلها طازه و هتلاقي مطابخ تسوي الاكل فخدها و اقعد علي البحر او النهر و استمتع بالجمال و انت بتاكل

*ملحوظة

فاصل في الاسعار عشان هو بيرمي اسعار عاليه جدا و يقولك مكسبي 5 جنيه فسيبك من العاطفة 

 

راس البر

 

-نيجي لمحلات الحلويات

طبعا راس البر تابعة لمحافظة دمياط فاشهر حلويات دمياط هي المشبك عشان كده ركز معايا:

اشهر تلات محلات في راس البر:

بلبول: و ده بعتبره تصنيف شعبي عشان كده رخيص

البدري: بعتبره من المحلات المتوسطة في الخامة

الجمل: نعتبره من المحلات الاعلي جوده عشان كده هتلاقيه اغلي بس لو انت اكيل مشبك هتحس بالطعم إذا كان خامه عاليه او لا.

*ملحوظة

انسي اي مشبك في حياتك اكلته و روح اطلب من محل الجمل مشبك بعسل النحل هتلاقيه لونه بني مش عسلي و الكيلو ب 55 جنيه بس في البدري ب 50 جنيه.

 

راس البر

 

المزارات و اماكن الخروج في راس البر

أهم مزارات راس البر هو منطقه اللسان واللى هتلاقي هناك زي ما قلتلك فندق شتاينبرجر و قصاده نصب تذكاري مكتوب عليه ان هنا آخر مصب نهر النيل اطول انهار العالم و في نفس الوقت ملتقى البحر بالنهر.

تخيل انك واقف في المكان ده قصاد الآية القرآنية اللي بتقول ( مرج البحرين يلتقيان بينهما برزخ لا يبغيان).

هتلاقي هناك الفنار الاحمر

شكل الكورنيش يفتح النفس من جماله بس مشكلته ان الناس اللي بتسهر فيه بليل بترمي القمامة على الأرض بس البلديه بتيجي تنضف الكورنيش الصبح.

بليل اقعد في الكافيهات اللي علي البحر و استمتع بيها.

رحله راس البر مش مكلفه و تعتبر من الاماكن الي ممكن تقضي فيها ويك اند حلو و تنبسط فيها.

اكتشفوا بلادكم قبل ما تكتشفوا العالم.

راس البر