المقال ده خاص بشرم الشيخ بس وده طبعا للناس اللي بتحب تسافر شرم فى اى وقت فى السنة

لو عاوز عروض وخصومات كبيرة على الفنادق والرحلات السياحية أحجز دلؤقتى مكانك فى رحلة شرم الشيخ من هنا : قضى 4 ايام / 3 ليال فى أجمل منتجعات  شرم الشيخ " فندق ال ميركاتو " شاملة الانتقالات من القاهرة بأقامة كاملة داخل الفندق 

المقال طويل شوية بس في معلومات كويسة عن شرم الشيخ ومزاراتها وايه اللى ممكن تعمله هناك

شرم الشيخ  بلد السحر والجمال والأمان بمعنى الكلمة فى أى وقت فى السنة والبلد لسه محافظة على جمالها .. طب ايه اللى ممكن الناس تعمله لما تروح شرم الشيخ 

اولاً : الإقامة في شرم الشيخ

- فى فنادق بيبقى الحجز من booking أو من خلال اى موقع لحجز الفنادق  وطبعا بتختلف من فندق لفندق حسب ال rate والمكان والأكل والشرب أو حتى الviews 

- فى كمان منتجعات سياحية واسعارها كويسة بس كل مشكلتها فى الأكل والشرب 

 -لكن افضل الاماكن واشهرها طبعا دلتا شرم واللي يميزها اكثر انها تعتبر فى وسط المدينة و حواليك كل الخدمات ده غير ان اسعارها مش عالية اوي وفي كمان بورتو شرم الشيخ المكان تحفة بس بعيد،  من الاخر لو مفيش

عربية يبقى بلاش وفى كمان منتجع اسمه حدائق السلطان المكان ممتاز وسعره معقول ومناسب جدا .

 

فنادق شرم الشيخ

 

ثانيا : اماكن الخروج بالنهار في شرم الشيخ

- طبعا البحر بمختلف مجالاته سواء سباحة او قاعدة علي الشط أو ألعاب مائية و diving & snorkeling 

اهم الاماكن و الشواطئ دي تراسينا بيتش وفى الخيمة وكمان فيه بيت القرش من افضل اماكن ال snorkeling في شرم الشيخ وعلى فكرة بيت القرش كمان فى غرف علي البحر والمنظر تحفة بس هو تسويقياً مظلوم شوية 

-كمان فى محميات طبيعية مرتبطة بالبحر وال relaxation جميلة ممكن تقضي فيها النهار بطولة زي رأس محمد ومحمية نبق 

 

شرم الشيخ

 

ثالثاً الرحلات البحرية والسفاري في شرم الشيخ : 

- فى رحلات مركب بيبقى شامل الغذاء وده بيتحرك من كذا مكان في شرم وبيروح يا اما راس محمد يا اما جزيرة تيران

 برده الاسعار بتختلف على حسب ال rate وبيبقى ليه وقفتين للي عايز يعمل diving بس ليها حساب لوحده ولو هتعملوا snorkeling الافضل يبقى معاكم الماسكات بتاعتكوا عشان اجارها وسعرها غالى على المركب لو مش

معاكم عادي بقى اتعاملوا من المركب 

-اكوا بارك ودي مينفعش جروب يجي ميدخلهاش لانها ممتعة بمعنى الكلمة وبرده الاسعار جوه غالية شوية فحاول تعمل حسابك علي الكلام ده قبل ما تدخل 

-فى طبعا السفاري اي حد ييجي شرم الشيخ غالباً بيجربها بس لو فى اطفال يستحسن بلاش.

 كمان فى سفارى بعشاء جبلي يبدأ من الساعة 4 مثلا لحد 10 ده لو فى عشا ولو مفيش هم ساعتين بالكتير وطبعا فى سفاري الشروق والغروب

 

رحلات السفاري بشرم الشيخ

 

رابعاً أما عن أماكن السهر والترفيه وخروجات بليل فى شرم الشيخ :

فى اماكن ترفيهية كتيره طبعا تنفع للاطفال وفيه اماكن الاطفال وجودهم مش هيبقى حلو خليني اقولكم على الأماكن الاسرية اكتر وبرده تنفع لشهر عسل او حتى اصحاب مع بعض

- ألف ليلة وليلة من أشهر وأقدم الأماكن اللى في شرم الشيخ  خروجتها خفيفة ولذيذة 

- جنينة سيتي مكان جميل وفى kids corner و كافيهات قعدتها حلوة جدا وبيبقى فالغالب في 2 shows واحد بيبدأ 9 والتاني بيبدأ 10.30 

-هوليود شرم الشيخ  مكان جميل التيكت فيه ب 75 جنيه للفرد وتطلب مشاريب بقيمة التيكت ده يعني الـ75 يشربوك فنجان قهوة محترم وازازة مياه مثلا بس ميزة المكان فى روعته وفى نافورة راقصة جميلة جدا وهي من اجمل

واكبر النافورات فى الشرق الاوسط كمان فى show بيبدأ الساعة 9 وفى كمان kids corner وفى زيارة الديناصورات أو جولة ببدال الميه حول القرية بس دول ليهم سعر تاني ومش غالية اوي 

- ال old market أقدم مكان في شرم الشيخ جميل وبسيط وكله كافيهات وبزارات لو حد فكر يعمل shopping واسعاره كويسة وفيها كافيهات حلوة فى الجبل وكمان فى show بيبدأ من الساعة 9 برده 

- سوهو سكوير منطقة عبارة عن حتة كده من اوربا ومشاية جميلة ولازم كاميرا عشان هتتصوروا يعنى هتتصوروا 

-وطبعا احلى جو واحلى قعدة لدرجة انها متتوصفش فعلا هي بدويه كافيه في بيت القرش ، مكان هادي ورايق تقعد علي البحر كده والجو غالبا بيبقى دافئ حتى في الشتا 

-فى بقى منطقة الفنار ودي قاعدة مجانية علي البحر ومنظر تحفة بس مفيش فيه اي خدمات ولا أكل ولا شرب

 

هوليود شرم الشيخ

 

ودي تقريبا اغلب الاماكن اللى ممكن شرم الشيخ فى شوية سطور . 

ولو عاوز برنامج رحلة لشرم الشيخ ممكن تشوف المقال دة : برنامج سياحى 4 ايام في شرم الشيخ بالاسعار