لو فاكر التجمع الخامس صحرا ومفيش فيه خروجات ولا فسح تبقي غلطان ، أحنا هنثبتلك النهاردة ان التجمع الخامس مليان اماكن للخروج ومطاعم ومولات مش موجود زيها فى اى مكان تانى هنتكلم عن كل دة بالتفصيل ومش هننسي الناس اللى بتحب الاكل والشوبينج وكمان الشباب اللى بيحبوا يخرجوا فى اماكن غير تقليدية 

 

اماكن الخروج في التجمع الخامس ( شارع التسعين ) واشهر المولات به : 

- كايرو فيستيفال سيتى  : Cairo festival city mall

واحد من اهم المجمعات التجارية فى التجمع الخامس مكانه فى شارع التسعين مع تقاطع الدائري وقريب من اكاديمية الشرطة . 

المول فيه محلات كتير مناسبه للى بيحبوا الشوبينج لانه بيضم عدد كبير من براندات الملابس زي ( زارا - بيرشكا - دوتى وغيرهم ) 

وفيه كمان سينما و مجمع مطاعم عشان بعد ما تخلص الشوبينج أو تتمشي تروح تاكل اكله حلوة . 

دة غير ان موجود هناك فرع ايكيا وكارفور وكيدزانيا ودة مكان مخصص للاطفال تقدر تسيب فيه ولادك وانت متطمن 

واخيرا النافورة الراقصة اللى هتاخد عندها اجمل صور . 

 

cairo festival city


- داون تاون القطامية مول  Downtown Katameya Mall

مكانه فى اول شارع الــ 90 بعد كايرو فيستيفال مول - التجمع الخامس

وهو مول مفتوح فيه حوالي 130 محل وأكثر من 50 مطعم وكافيه دة غير انكم هتلاقوا فيه محلات كتير متنوعه تقدروا تجيبوا منها اللى يناسبكم . المول ينفع خروجه حلوة اوى وعائلية هتنبسطوا 

 

katameya down town

 

- امريكانا بلازا Americana Plaza 

ودة موجود بردو فى شارع التسعين ادام الجامعة الامريكية - التجمع الخامس 

المول فيه فرع كبير لــ " fish market "  للى بيحبوا السمك  ، دة غير طبعا اماكن الاكل والشوبينج.

وكمان ورا امريكانا بلازا هتلاقوا مول اسمه Maxim  هتلاقي هناك مطعم للاكل الايطالي اسمه " C HOUSE MILANO

ودة ننصحك تخلص جولتك وتروح تجرب الاكل بتاعه وتتمشي وتتصور براحتك 

 

amrecana plaza new cairo

 

مطاعم التجمع الخامس - شارع التسعين 

- كافيه فــ القهوة 

المكان دة موده شبابي جداً هتحس اكنك قاعد في شارع الحسين ، عندهم اكلات ومشاريب وحاجات حلوة كتير فى المنيو وبأسعار ممتازة وكواليتى عالية جدا 

ميزة المكان انه فاتح 24 ساعه يعنى لو روحتلهم فى اى وقت هتلاقيهم شغالين . وديكوراته حلوة جدا هتخليك تروح تانى وتالت 

عنوانه :  القاهرة الجديدة - التجمع الخامس - شارع التسعين الجنوبي - توليب النرجس

 

كافيه ف القهوة التجمع الخامس

 

- مطعم " Andrea Group " 

تخيلوا كدة وانتوا قاعدين بتفطروا فول وطعمية وجبن وفطير وعسل علي روف مول كونكورد بلازا وحواليك زرع وشايف شارع التسعين والهوا يرد الروح فيك مافيش احلى من كدا تبدأ يومك بيه ، لو انتوا اسرة هتنبسطوا جدا ودة لان كمان عندهم kids area 

كبيرة اولادكم مش هيبطلوا لعب .. 

المنيو بتاعه مش بس مقتصر على الفطار دة فيه حاجات كتيرة وبأسعار معقولة جداً وتنفع خروجه حلو جدا لو هتخلص اكل وتتمشي فى المول 

مكانهم : مول كونكورد بلازا - شارع التسعين الجنوبي 

 

andrea group


- مطعم ابو السيد " Abou El sid " 

لو عاوز ترجع بالزمن لورا فالمكان دة هيبسطك وهيحسسك أكنك فى زمن الستينات ، الاكل بتاعهم حلو جدا هتحس اكنك بتاكل اكل بيتى ، متخصصين فى الطواجن والمشاوي والمنيو فيه كل الاكل اللى ممكن يخطر علي بالك بخلطات وطعم حلو اوى 

دة غير ديكوراته والوانه روعه وهتلاقي صور فنانين زمان اكنك فعلا فى عصر تانى . 

مكانهم في كونكورد بلازا - شارع التسعين - التجمع الخامس 

 

abou el sid

 

خروجات شبابية مليانه مغامرة واثارة في قلب التجمع الخامس 

- المكان " Trapped Egypt " 

 المكان دة هيعيشك مغامرة هروب حقيقية لمدة 60 دقيقة ومش لوحدك دة انت واصحابك 

المكان مناسب جدا للخروجات الشبابية وخروجات الصحاب 

عبارة عن 4 غرف  ( زنزانة الموت - المدفن - الحجر الصحى - Bunker 38 ) 

كل غرفة ليها قصة مختلفة عن التانيه . ومهمتك انت وصحابك تهربوا قبل ال 60 دقيقة ما تخلص .

المكان صورة طبق الاصل من غرف الهروب الموجودة فى لندن مش هتحس اكنك فى لعبة من كتر ما الناس هناك حابكينها صح 

العنوان : 69 شارع التسعين - التجمع الخامس 

 

trapped egypt


- المكان " Breakout Egypt " 

هتعيش فى المكان دة اول تجربة خطف وهروب حقيقة ، تجربة ممتعة وغريبة ونفس فكرة المكان اللى قبله فيه 4 غرف ( سجن - مقبرة - حمام عام - معمل ) وبتتحبس انت واصحابك وتحاولوا تهربوا فى مدة معينة .. 

أصعب غرفة فى المكان هى غرفة المعمل 

مكانهم في مبنى رقم 311 شارع الـــ 90 بجوار سيراميكا كليوباترا - التجمع الخامس 

 

Breakout egypt


ولو تتعرف علي خروجات أكتر فى القاهرة وفى التجمع ممكن تشوف اللينك دة : خروجات غير تقليدية فى القاهرة