أجابة كل تساؤلاتك بخصوص رحلات الترانزيت وحالاتها

ما هو الترانزيت؟ مميزاته وعيوبه - هل مسموح الخروج من المطار فى بلد الترانزيت؟ حالات اعطاء شركة الطيران للمسافر قضاء ليلة فى فندق (الترانزيت اكثر من 12 ساعه )هل ترانزيت اوروبا بيمنعك من ركوب الطيارة ؟

لو انت متعرفش اي حاجة في حياتك عن الترانزيت (Connection) المقال دة احنا كتبناه عشانك

يعني ايه ترانزيت ؟

يعني بدل ما تسافر من بلد لبلد مباشره هتسافر عن طريق " كوبري " و الكوبري دة بيبقي بلد في النص بينهم

زي مثلا انت عايز تروح من العتبه ل الجيزة

هتركب من العتبه لــ السيدة زينب .. و من السيدة زينب للجيزة .. اهي السيدة زينب دي هي الترانزيت

----------------------------------------------------------

مميزات الترانزيت ؟

انك بتلف كل مطارات العالم وبتسيب ذكري في كل مطار والحاجة الاهم ان سعر تذكرة الطيران الترانزيت عادة ارخص بكثير من الدايركت

عيوب الترانزيت ؟

التعب و الارهاق .. انك بتاخد السفر وتعبه على مرتين بدل مرة واحدة
----------------------------------------------------------

بتسافر ازاي عن طريق الترانزيت ؟

وانت في مطار القاهرة هتاخد من كاونتر شركة الطيران 2 بوردينج باس .. واحد لرحلتك الأولي من القاهرة ل البلد الكوبري .. والتاني من البلد الكوبري لغاية البلد النهائيه اللي عايز توصلها ..

ولما بتوصل البلد الكوبري دي بيكون ليك مكان مخصص اسمه ترانزيت زون او ترانزيت ايريا بتقعد فيها
--------------------------------------------------------

هل اعرف اطلع من المطار في بلد الترانزيت ؟

اه ينفع في حاله واحدة رئيسية وفي 3 حالات فرعية ..

الحاله الرئيسيه هي : لو بلد الترانزيت دي بدون فيزا زي ماليزيا او اندونيسيا او الاردن الخ الخ

الحاله الفرعية هي :

1- لو مسافر امريكا على الطيران البريطاني والترانزيت أكثر من 8 ساعات ساعتها السلطات البريطانية بتديك فيزا لمدة 24 ساعه تدخل تلف في لندن شويه وترجع

بس بشروط :

يكون معاك بوردينج للرحلة الثانية. ترانزيت طويل ( لازم تكون قبل منتصف الليل لتاني يوم الوصول ).

هتغادر من مطار تاني في لندن .

نسبة الدخول 50%.

حسب مزاج ضابط الجوازات وشكلك العام

2- لو معاك فيزا امريكا ساريه او شنجن ساريه او انجلترا ساريه انك تخش تركيا بفيزا اونلاين

3- لو مسافر ترانزيت البحرين تقدر تاخد فيزا ترانزيت ب 25 ريال

غير الحالات دول يستحيل ابدا انك تخرج بره الترانزيت زون و هتفضل قاعد فى المطار
----------------------------------------------------------------

هل فعلا ممكن لو الترانزيت بتاعي اكثر من 12 ساعه اخذ فندق على حساب الشركه بتاعه الطيران ؟؟

ممكن في حالة واحدة فقط .. لو تم اثبات ان الرحله اللي انت اختارتها دي كانت هي الوحيدة المتاحة في نفس اليوم وكنت مضطر لحجزها ومكانش فيه رحلات طيران ابدا بعدد ساعات ترانزيت أقل في نفس اليوم ده .. ساعتها مضطرين يوفر لك فندق على حسابهم

انما لو تم اثبات انك حجزت الرحلة اللي بــ ترانزيت طويل بمزاجك و ارادتك دوناً عن باقي الرحلات القصيرة ساعتها ملكش اي حاجه لان ساعتها هيقولولك انت اللي اختارت الترانزيت الطويل بمزاجك استحمل بقي

----------------------------------------------------------

لو الترانزيت بتاعي 50 دقيقه او ساعه او ساعه ونص تفتكر هلحق الطياره الثانيه ؟؟

بنسبه 90% مش هتلحق الطياره الثانيه لان ممكن الطياره الاولانيه تتأخر لأي سبب من الأسباب .. هما طبعا مضطرين انهم يوفروا لك طياره تانيه بديلة طالما الغلط مش من عندك لكن ممكن الطياره البديله دي تبقي بعد 8 او 9 ساعات ساعتها يبقى يومك اتضرب

وضيعت وقت طويل جدا غير التعب طبعاً

الاحسن احجز الترانزيت اللي اقل حاجه فيه تكون 3 ساعات

---------------------------------------------------------------

هل ترانزيت اوروبا بيمنعونا من ركوب الطياره ؟؟

1- لو هتعمل ترانزيت واحد في اوروبا ماعدا التشيك .. ومش هتغير مطارات في بلد الشنجن دي .. ومش هتعمل ترانزيت في لندن .. ومش رايح لبلد وجهه نهائيه بدون فيزا .. ساعتها هتطلع بدون ادني مشكله

2- لو هتعمل اتنين ترانزيت في اوروبا أو هتغير مطارات في بلد من بلاد الشنجن أو هتعمل ترانزيت في لندن و مش معاك فيزا امريكا / كندا أو هتروح لبلد نهائيه بدون فيزا ساعتها مش هتركب الطيارة من مصر اصلا وهتتمنع من ركوب الطياره

------------------------------------------------------------