رحلة تركيا.. اسعار ، تكاليف السفر والاقامة بالتفصيل وبأرخص سعر

لو عايز تسافر تركيا وشايل هم تكاليف السفر ومش قادر تحسب السفر الى تركيا هيكلفك كام ؟ 

أحنا ها ننقلك تجربة فعلية لرحلة تركيا شاملة كل المصاريف وبأقل من ١٠٠٠٠ جنيه وقبل ما نبدأ مقالنا هنقولك كل شئ عن الفيزا والتصريح الأمني لتركيا من خلال المقال دة :  كيفية استخراج التصريح الامني وتأشيرة تركيا بالتفصيل .

حساب تكاليف السفر الى تركيا لمدة اسبوع بالتفصيل 

تركيا في الوقت ده و لظروف اقتصادية مناسبة جداً للسياحة و الشوبينج وخصوصا ان الليرة التركية سعرها في المتوسط ٣،٣٥ بالنسبة للجنيه المصرى .

بس قبل ما ندخل في تفاصيل السفرية ، لازم نشرح لك القيمة لليرة - عشان نسهل الحسابات ، هنعتبر الليرة  بــ ٣ جنيه بدل ٣،٣٥

- تذكرة المترو حوالي ٢ ليرة .. يعنى ٦ جنيه

- ممكن تجيب ساندوتش سمك ب ٧ ليرة.. يعنى ٢١ جنيه

- الفرخة كاملة المشوية - ممكن تكفى فردين لو معاها رز مثلا ب ١٠ ليرة .. ٣٠ جنيه

▪️ أول حاجة و اللي دايماً بتكون أغلى حاجة.. تذاكر الطيران الى تركيا واسعارها

عشان المقال ده دلع.. فهتسافر على ايجبت اير (٢ شنطة عشان الشوبينج ) و من غير اى ترانزيت ( القاهرة - اسطنبول) مباشرةً  

سعر الطيران حوالى ٦،٠٠٠ جنيه 

لو هتوفر أكثر في سعر الطيران السفر الترانزيت ب حوالى ٤،٠٠٠ جنيه... و لو هتسافر من شرم الشيخ أو الغردقة بحوالى ٤،٠٠٠ جنيه دايركت.

▪️ ثانيا الإقامات واماكن السكن  في تركيا

 أهم حاجة المكان اللي تكون فيه يكون قريب من المواصلات.. في مكان قريب من السنتر.. و حواليك كل حاجة.

أسعار الإقامات للفرد في الغرفة الدبل في فندق ٣ نجوم ممكن تكون من ١٠٠ ل ٢٠٠ جنيه في الليلة بالافطار 

 يعنى لو سبع أيام ٢٠٠ x ٧ يساوي تقريبا ١،٤٠٠ جنيه إقامات لمدة اسبوع. متخيل السعر

ناس كتير بتفضل تختار الفندق في ميدان تقسيم Taksim Square او قريب منه.. بس احنا بنرشحلك مكان احسن منه من وجهة نظرنا وهو  Fatih district.

المكان ده قريب من المحلات و المزارات... و بعيد عن زحمة ميدان تقسيم.. غير أن أسعار الأكل فيه أرخص من ميدان تقسيم

▪️ الأكل في تركيا ومتوسط اسعاره 

تركيا زى ما هى بلد سياحية في المزارات.. هى برده بلد سياحة للأكل.. و أسعاره حلوه جداً.. مش بتحرم نفسك من حاجة

تقريباً في اليوم ١٠٠ جنيه أكل .. يعنى من ٧٠٠ ل ١٠٠٠ جنيه أكل

يبقي كده بالجنيه المصرى :

٦،٠٠٠ طيران + ١،٤٠٠ أقامات + ١،٠٠٠ أكل وممكن ٥٠٠ موصلات و ده كتير جداً

ليك ١،٠٠٠ جنيه فسح و دلع زياده ... و الشوبينج عليك مش هنعرف نعملك حسبة لي بس مش هتعرف تمسك نفسك.. الشوبينج مغرى أوى هناك 

ملحوظة : 

المقال عن الاقامات في تركيا.. بدون رحلات خارج اسطنبول.

الأسعار ممكن تختلف حسب معاد السفر.