Travilio

استمتع بمغامرة الذهاب الي سانت كاترين ودليل رحلتك من الالف للياء

استمتع بمغامرة الذهاب الي سانت كاترين ودليل رحلتك من الالف للياء
تاريخ النشر :26-نوفمبر-2018 2018-12-16 المشاهدات :103


رحلة سانت كاترين وجبل موسى والوديان

شركات سياحة كتير بيطلعو رحلات يوم واحد او يومين لسانت كاترين، اتوبيس يطلع من القاهرة او إسكندرية ياخدك لغاية راس شيطان تقضى اليوم وتطلع بعد كده على سانت كاترين تطلع الجبل بالليل وتنزل الصبح تروح القلعة او دهب وترجع تانى .. ده فى رأينا

الشخصى فرهدة ، مبتلحقش تستمتع بحاجة او تستريح، لو عايز فعلا تستمتع برحلة جميلة تفصل فيها عن الدنيا كلها، روح مدينة سانت كاترين نفسها مش الجبل وبس.

 

معلومات ونصائح عن السفر الي سانت كاترين 

سانت كاترين مدينة صغيرة جدا اهلها ناس طيبين وفى منتهى الاحترام، المدينة حواليها جبال زى جبل موسى وده اللى بتطلع عليه ومجهز باستراحات، وزى جبل سانت كاترين وده اعلى جبل ونادرا حد بيطلعه عشان الجبل مش مجهز بخدمات.

- متروحش تطلع الجبل على طول استريح واستمتع بالطبيعة هناك قضى يوم فى كامب بدوى اسمه المسعودى لودج صاحبه اسمه محمد خضر، راجل فى منتهى الاحترام والذوق، الدنيا هناك أمان جدا، وفيه اجانب وعائلات بتروح تقضى أيام هناك،الكامب عبارة

عن اوض بسيطة بحمام فى كل اوضة ونضيفة جدا.

والمطعم البدوى بتاعهم اكله بسيط ورائع، المكان كله فيه راحة نفسيه رهيبة هدوء ومنظر رائع وسط الجبال والسما، والشاى البدوى بالنعناع.

لما تحب تطلع الجبل فى اى وقت قولهم بس وهم هيظبطولك كل حاجة وبالاسعار الحقيقية مش اسعار شركات السياحة سيب حاجتك فى الكامب ، امان جدا، وهيوصلوك لغاية بوابة الجبل هناك هتاخد دليل بدوى تطلع معاه، هو نفس السعر سواء واحد او عشرة طالعين، 

ممكن تاخد جمل او تطلع على رجلك هو الموضوع مشى (هايكينج) مش اكتر يعنى مش تسلق ولا حاجة، اطلع على مهلك جدا محدش بيستعجلك، وريح فى كل استراحة تقابلك، لو مش متعود تمشي كتير فى العادى اول نص ساعة مشى هتحس انك تعبان جدا ومش

قادر بعديها جسمك هيتعود ويضبط تنفسك وهتلاقى بقى الموضوع سهل، لو طلعت فى ليلة القمر بدر حتبقى الرؤية اوضح طبعا، وفى كل الأحوال خلى معاك كشاف.

 

سانت كاترين وجبل موسي

 

افضل وقت لزيارة سانت كاترين وأهم المستلزمات الشخصية لطلوع الجبل

طبعا احسن تطلع الجبل فى الربيع او الخريف، لكن تقدر تزور المدينة نفسها اى وقت فى السنة لو بتدور على الهدوء والاسترخاء.

في اساسيات تكون معاك لو هتطلع فى الربيع او الخريف وطبعا تقل فى اللبس لو فى الشتا : كشاف، كوتشي مريح فى المشى بس مش خفيف يكون نعله قوى، شراب مبطن، شراب تانى احتياطى معاك فى الشنطة، مناديل طبعا، مياه لتر ونص، لو احتاجت اكتر هات

من اى استراحة تقابلك على الجبل، اكل خفيف جدا، بطاقة، فلوس عشان تحاسب الدليل وتشترى اى حاجة من الاستراحة، نضارة شمس عشان وانت نازل من الجبل الصبح، كاب، شال او كوفية، جاكت خفيف تحتيه تى شيرت، الكلام ده كله عشان الليل اول ما الشمس

بتطلع الجو بيرجع حر، اهم حاجة متشيلش كتير حتى لو حاسس ان شنطتك خفيفة وتقدر تشيل اكتر، لما تمشى شوية حتحس بتقلها، فيه بطاطين بتأجرها من اخر استراحة الدليل بيجبهالك وتطلع بيها على قمة الجبل تستنى الشروق.

اطلع على القمة واستمتع بمنظر الشروق المبهر والدليل بتاعك هيفضل مستنيك لغاية ماتقوله انك عايز تنزل، يا هتنزل من نفس الطريق، يا اما تنزل من طريق السلالم لو حابب تتفرج على حاجات اكتر وبرضه انزل براحتك متستعجلش وريح كل شوية.

اوصل لدير سانت كاترين اقدم دير فى العالم، ادخل واتفرج على تاريخ وآثار بلدك، كل ده الدليل معاك، بعد كده حاسب الدليل واطلب منه ترجع على المسعودى لودج، ارجع و افطر ونام واستريح واصحى قضى الليلة فى وسط هدوء الجبل.

 

جبل موسي

 

يوم مخصص لزيارة منطقة الوديان بسانت كاترين 

تانى يوم اطلب منهم انك تروح الوديان، دى بتبقى احسن وقت من آخر مارس لاول مايو، الجبال بتتغطى بالزرع والشجر بعد موسم السيول و بيبقى منظرها جميل جدا، اطلع رحلة مع دليل فى وسط الوديان، وارجع اخر اليوم استريح ونام واصحى تانى يوم ارجع مدينتك او روح على شرم الشيخ  او راس شيطان لو عايز تكمل الرحلة.

طيب تروح وترجع ازاى؟ أحسن حاجة طبعا لو معاكو عربية، هتاخد الطريق اكنك رايح شرم الشيخ وبعد راس ابو رديس هتدخل طريق سانت كاترين وهو طريق واحد يعنى مفيش توهان، لو مش معاكو عربية كلم الكامب وهم بيظبطولك عربية، فيه اتوبيس يومى

بيطلع من القاهرة الساعة 11 الصبح بيوصل سانت كاترين الساعة 6 او 7 مساء، الاتوبيس قديم جدا ومنصحش بيه خالص لغاية ما يشغلوا خط جديد أو يجددوا الاتوبيس خليك فى العربية احسن خصوصا لو معاك عيلة.

اخر حاجة الجبل مش لاى حد، فيه ناس راحت وانبسطت جدا وفيه ناس فرهدت بس فى الاغلب عشان طالعين مع رحلة او شركة سياحة فمبيلحقوش يستريحو، نصيحة أخيرة اطلعو تانى وروحو سانت كاترين مش شرط تطلع الجبل روح استمتع بالهدوء والطبيعه 

 

جبل موسي - سانت كاترين

 

ودول مقالين مختلفين عن سانت كاترين : 

1- ارشادات السلامه قبل السفر الي سانت كاترين واهم النصائح التى تحتاج معرفتها 

2-  اشهر معالم سانت كاترين ومستلزمات الشخصيه لمغامرة طلوع الجبل بالصور 

 

أسعار رحلات شاملة الطيران و الإقامة