Travilio

دليلك السياحي للأستمتاع بأحلي اجازة في بورسعيد واماكن لازم تزورها في رحلتك

دليلك السياحي للأستمتاع بأحلي اجازة في بورسعيد واماكن لازم تزورها في رحلتك
تاريخ النشر :24-نوفمبر-2018 2018-12-15 المشاهدات :93

عايز تروح بورسعيد ومحتار تعمل ايه هناك او مش عارف اى حاجة عن البلد احنا في مقالنا هنعرفك كل حاجة عن بورسعيد وهنشجعك تسافرلها من غير ما تكون قلقان من حاجة 

دليل للسفر الى بورسعيد وازاى تقضي وقت مميز فيها

اولاً اسعار المواصلات داخل بورسعيد :

اغلى تاكسي من 8 : 10 جنية  - الميكروباص من اي مكان للتاني ب 2 جنية

 

ثانياً أماكن الأكل والمطاعم في بورسعيد  :

لو ملكش ف السمك : في عند اختيارين احلى من بعض 

- شارع طرح البحر امام الباتروس ( اولديز ) ناس محترمة بيعملوا برجر وبانية باشكال وانواع كتير جدا هيعجبك .

- (slice) امام امن الدولة بيعمل بيتزا ممكن تشترى بيتزا كاملة و ممكن تشتري بالقطعة و سعرة معقول جدا و محترم


اما بقي لو ليك ف السمك هنقولك تعمل ايه ؟ 

- هتنزل سوق السمك القديم  في بورسعيد  اشترى من البياعين ما يشتهي نفسك من كابوريا و شيكال و جمبري و سمك بانواعة بالكيلو ني وفاصل .

هتاخد السمك و تدخل شواية سمك محل اسمة لبلب أمام بلاستيكات الشربينى و شوف حضرتك عايز تقلي ايه و عايز تشوي اية و في حاجة اسمها ( سنجارى ) للسمك البوري هتعجبك اوووى وكمان عندة رز ابيض و احمر و سلطات و مخلل .

وممكن تقعد تاكل بقي عنده لكن انا انصحك تاخد الاكل و تركب تاكسي تقولة البحر من عند مجمع المطاعم دخول البحر مجانا بس الكرسى ب 5 : 10 جنية وفاصل خليه يوصلك القعدة ع الماية اللى حرفيا ممكن يكون بينك و بينها اتنين تلاتة متر و اتبسط

 

بورسعيد

 

ثالثاً : اماكن التمشية والتسوق في بورسعيد 

خلصت هتطلع على شارع الطرح و تتمشي مع سور الاستاد لحد ما توصل لمعصرة ( سلسبيلا ) اطلب من هناك كاساتا من الحاجات اللي بورسعيد مشهوره بيها القطعة ب  7.5 جنيه هتعجبك .

كلت و حليت ارجع ع الطرح و اتمشي في اتجاه ( دليسيبس ) كدة انت اتمشيت طرح البحر كله .

هتتطلع على ديليسبس و الممشى على قد ما الكلام مختصر الا انك هتتبسط جدا لانك هتبقي بتمشي على طول قناة السويس فى اخر الممشى المعدية اركب المعدية و سيبها تروح و تيجى بيك خمس ست مرات متتكسفش محدش اخد باله من حد و اصلا احنا ساعات بنعمل كدة ف بورسعيد او انزل لف في بورفؤاد شوية و ارجع .

هترجع تلاقي نفسك ف المنشية و اول التلاتينى تقدر تشوف بقى عايز تشترى اي هدوم اكسسوارات و لو عايز تروح البازار ( لعلوش ) اشهر محل بتاع شوكولاته مستوردة هيكون بينك وبينه  من المنشية دقيقتين مشي  .

ولو عاوز ترجع ع محفظتك اركب تاكسى وقولة عايز اركب بيجو (محافظتك) هيوديك الموقف الصح متقلقش .

* نصيحة متربطش نفسك بميعاد سوبر جيت الموقف بيحمل ركاب 24 ساعة .

* مستحيل تتوه في بورسعيد لو سئلت اي حد وميعرفش هيقول معرفش لو يعرف لو يطول يوصلك هيوصلك .

* سوق الباله في بورسعيد في منه اتنين واحد قريب من سوق السمك القديم والجديد وواحد جوا البلد خليك في القريب تنزل علية اول حاجة تلف فية و ترجع ع السوق عشان تتغدى ، هدوم الباله في منها الغالى اوووى و الرخيص اوووى و المعقول ، الباله فيها براندات عالمية المهم تعرف تلف كويس و تفاصل و تجيب اللي يعجبك .

ودة مقال تانى عن بورسعيد هيفيدك جدا لو رايح داي يوز : اشهر اماكن التسوق والخروج فى بورسعيد وازاى تقضي داي يوز هناك 

 

بورسعيد

 

 

أسعار رحلات شاملة الطيران و الإقامة