ما تحتاج معرفته عن برنامج رحلات وزارة الشباب والرياضة الي الاقصر واسوان وطريقة التقديم عليها

تقرير مفصل عن رحلة وزارة الشباب والرياضة الى الاقصر واسوان

 
وزارة الشباب والرياضه عملت حاجة جميله جدا السنة دي وخلت التقديم على الرحلات اللى بتطلعها اونلاين بعد ما كنت لازم تروح تقدم فى الوزارة نفسها ، والتقديم بيكون من خلال اللينك دة : 

http://mobgis.youth.gov.eg/youth/trip_public

قبل ما نبدأ مقالنا ممكن تتابع أفضل عروض الرحلات السياحية للأقصر واسوان بأرخص الاسعار من خلال اللينك دة : أجمل رحلة بالنايل كروز الى الاقصر واسوان أقامة كاملة 4 ايام / 3 ليالى ب 2300 جنيه بس

 طيب دلؤقتى خلينا نقولك على معلومات سريعه واهم شروط التقديم  لرحلة الاقصر واسوان التابعه لوزارة الشباب والرياضه قبل ما نعرفكم بالبرنامج اللى هتعملوه هناك 

- مبدأياً الفوج بيبقى عباره عن 250 بنت بينزلوا الاقصر و 250 شاب بينزلوا أسوان والعكس بعد 3 ليالى 

بتزور فيهم جميع مزارات اسوان وجميع مزارات الاقصر 

- السن من 24 : 35 سنه

- الرحله بتبقى كل اسبوع ولو قدمت هتطلع واخر فوج بيكون في شهر 4 يعنى ومش هتحتاج تصرف مليم هناك 

- اكلهم معقول جدا اتوبيسات مكيفه للانتقالات الداخليه 

- كل دة و سعر الرحلة ٦٠٠ جنية شاملة ( الانتقالات بالقطر.. الانتقالات الداخلية بالاتوبيس.. جميع المزارات الموجوده بجدول الرحلة.. الاكل فطار وغدا وعشا) يعني شامله كل حاجه

- طبعاً الرحلة مش هتكون مناسبة للمتزوجين لانها مش مشتركه وكمان مش مسموح بالأطفال

- السفر بيكون من محطة مصر.. القطر مكيف ومريح جدا.. الطريق من القاهرة للاقصر بياخد حوالي ١١ ساعة

- البنات بتنزل ف الاقصر والشباب بتفضل ف القطر تنزل ف اسوان.. بتنزلوا من القطر بتلاقوا الباصات مستنياكوا بره قدام المحطة علي طول.. بتركبوا الباصات وتروحوا علي المدينة الشبابية

- المدينة الشبابية ف الاقصر بعيدة عن مركز المدينة بحوالي نص ساعة بالباص.. بتنزلوا تستلموا الغرف بتاعتكوا.. الغرف نضيفة جدا وكل واحدة فيها ٦ سراير.. بتختاروا بعض ف القطر ولما توصلوا بتستلموا الاوضه علي طول.. كل اوضة فيها حمام منفصل وفيها دولابين وتكييف وشاشة وتلاجة.. الاوضه نضيفة جداا  

ودي تقريبا كل المعلومات اللى هتحتاج تعرفها عن الرحلة اما بالنسبه للبرنامج فبيكون كالتالى 

برنامج تفصيلي لرحلة الأقصر وأسوان التابع لوزارة الشباب والرياضة 2019 :

اليوم الاول

- بترتاحوا ساعتين تقريبا او ٣ ساعات وبعدين تنزلوا تتغدوا في المطعم
 الغدا بيكون اول يوم (طبق رز. طبق بطاطس. قطعتين لحمة. رغيفين عيش. طبق سلطة. ثمرة فاكهة. ازازة مياه معدنية )

- بعد ما بتخلصوا الغدا بتروحوا تستلموا وجبة العشا اللي هي ( رغيفين عيش. ثمرة او اتنين فاكهة. جبنة كيري او رومي او فيتا. علبة صغيرة عسل ابيض او مربي او حلاوة. علبة زبادي. كيس شيبسي ) 

- بعد كده تطلعوا الاوضه تقعدوا شويه بعدين تلبسوا وتنزلوا الباصات في الميعاد المحدد وتروحوا الصوت والضوء في الكرنك 

- بعد ما بتخلصوا بتتجمعوا في الباصات وتنزلوا جولة حرة في وسط البلد براحتكوا تشتروا اللي انتوا عاوزينه.. ومع معاد انتهاء الجولة بتتجمعوا تاني في الباصات وبترجعوا المدينة الشبابية

 
اليوم التاني

- هتصحوا الصبح للفطار الساعه ٧ ونص الصبح (الفطار معاده من ٧ ونص لحد ٨ ونص)
 والفطار بيكون ( رغيفين عيش. ازازة مياه معدنية. ثمرة فاكهة. نوع جبنة. كوباية شاي. علبة مربي. فول)

- بعد كده تتوجهوا للباصات وبتطلع ٩ وبتروحوا معبد الكرنك تاخدوا فيه جوله

- بعد كده بتروحوا معبد الاقصر تاخدوا فيه بردو جوله (المدة في كل معبد بتكون من ساعه لساعتين حسب الجدول)

- بعدين ترجعوا المدينه ترتاحوا نص ساعه بعدين تنزلوا للغدا (نفس غدا اليوم الاول مع تغيير اللحمة بقطعتين بانية) 

- وبعد الغدا بتاخدوا وجبة العشا بعدين تطلعوا ترتاحوا شويه وتتجمعوا تاني في الباصات الساعة ٦ تاخدوا جولة تاني ف وسط البلدو بعدين ترجعوا المدينة الشبابية حوالي الساعه ٩ ونص او ١٠

 
اليوم التالت

- نفس الفطار الصبح بعدين تتجمعوا في الباصات وتروحوا معبد حتشبسوت

-  وبعده بتروحوا علي معبد هابو 

- بتخلصوا بعدين بتروحوا جزيرة الموز (عبارة عن جزيرة كلها زرع وخضره.. مكان هادي بس مريح للاعصاب) 

- وتتجمعوا في الباصات الساعه ١ ونص او ٢ وتروحوا تتغدوا وترتاحوا شويه وتنزلوا الجولة الحرة بالليل

 اليوم الرابع (الاول في اسوان)

-الصبح بدري بتفطروا بعدين بتتحركوا بالباصات الساعه ٨ تقريبا او ٨ ونص وتروحوا لأسوان

- بتتسكنوا ف الغرف وكل غرفه بيكون فيها من ٧ ل ٩ سراير

- بعد استلام الغرف بتريحوا ساعتين وبعدين تنزلوا للغدا المعتاد وبعد الغدا بتستسلموا وجبة العشا وتطلعوا الغرف تاني 

- علي الساعه ٦ بتتجمعوا للباصات و بتروحوا متحف النوبة

-  وبعده بتروحوا جوله حره وبتحددوا ميعاد الرجوع

( السوق ف اسوان كبيير وفي محلات كتيرا.. قبل ما تشتروا حاجه اسألوا ف اكتر من محل وبعد كده اشتروا.. المشهور ف اسوان التوابل والسوداني والملوحه )

- بعد الجوله بتتجمعوا ف الباصات وبترجعوا المدينه الشبابية

اليوم الخامس (التاني في اسوان)

- بتصحوا بدري تنزلوا للفطار المعتاد 

- بعدين تتحركوا بالباصات لحد ما تواصلوا وبتركبوا لانشات توصلكم لجزيرة النباتات 

- بعد كده بتتجهوا للقرية النوبية باللانشات بردو ( انتوا فجأة هتلاقوا نفسكوا ف الجنه مش علي الارض )
ملحوظة : الوقت اللي متحدد للنوبة قليل جدا واحنا مكنش نعرف انها حلوة وتستاهل وقت اكتر  ف اتفقوا مع المشرفين علي وقت زياده عشان تلفوها كلها وتتصوروا في كل مكان 

- وانتوا رايحين باللانشات هتشوفوا الاماكن اللي اتصور فيها فيلم مافيا وبيت الفنان محمد منير.. وطبعا وبدون نقاش (old cataract) 

- بعد ما بتخلصوا بترجعوا تاني للباصات وتروحوا المدينه الشبابيه تتغدوا وترتاحوا شويه وتنزلوا تاني الساعه ٦ تروحوا متحف النيل 

- وبعدين تخرجوا للجوله الحره في السوق وبعد كده ترجعوا المدينه الشبابيه علي الساعه ١١ او ١١ ونص

اليوم السادس (يوم الرحيل واخر يوم في اسوان)

- بتصحوا تفطروا وتروحوا السد العالي و رمز الصداقه.

- بعد كده بتروحوا لمعبد فيله 

- بتخلصوا وترجعوا المدينة الشبابية تحضروا الشنط وتنزلوا تحطوها في الباصات بعدين تتغدوا وتاخدوا وجبة المغادرة وتروحوا محطة القطر وتكون كدا انتهت الرحلة 

واخيرا ممكن تتابع مواعيد الافواج وكل الرحلات الخاصه بوزارة الشباب والرياضة من خلال الاتي : وزارة الشباب والرياضة - مصر 

ملاحظات : 

الواي فاي في اسوان نفس باسورد اسم الشبكه
في اسوان مفيش مايه سخنه 
في الاتنين في كل غرفه تكييف 
في لاقصر في حمام في الغرفه لكن في اسوان الحمامات مشتركة 
في اسوان بتقعدوا من ٧ : ٩ بنات في الغرفه
في للاقصر من ٤:٦ بنات في الغرفه
هيبقي معاكم مرشد مع كل جروب في كل مكان اثري