Travilio

اجمل الاماكن السياحية في فيتنام وكل ما تريد معرفته عن وسائل المواصلات والاقامة بها

 اجمل الاماكن السياحية في فيتنام وكل ما تريد معرفته عن وسائل المواصلات والاقامة بها
تاريخ النشر :20-نوفمبر-2018 2018-12-15 المشاهدات :95

 فيتنام وجهة  سياحية رائعة وتعتبر من الوجهات السياحية الجديدة بيتوافد عليها الزائرين من جميع انحاء العالم بنسبه سنوية كبيرة جدا ، حيث تتواجد على قائمة الدول المفضلة لدي السياح لقضاء الاجازات لما فيها من مناخ معتدل والطبيعة الخلابة بالاضافه الى انها

تعتبر من ارخص الوجهات السياحية من حيث التكاليف ،  كمان السفر الى فيتنام  مناسب جدا للأجازات الشبابية او العائلية ودة لان فيها لتنوع كبير من حيث الانشطة الترفيهية  والوجهات الرائعه الي جانب تكاليف الاقامة بها تعد رخيصه تماما . 

واتكلمنا فى مقالنا اللى فات عن كل ما يخص السفر الى فيتنام من حيث الفيزا - اسعار تذكرة الطيران - الاقامة - افضل اوقات السفر - وسائل التنقل - العملة - الاتصالات والانترنت فى فيتنام 

 

فيتنام

 

وهنستكمل معاكم باقي المعلومات اللى هتفيدك لو بتخطط للسفر الى فيتنام وهنتكلم بشكل مفصل اكتر عن : 

- الانتقالات و وسائل المواصلات داخل فيتنام انواعها واسعارها 

1- الانتقال من مطار هانوي لوسط البلد و العكس : 

اختيارين رئيسيين : 

أوتوبيسات : أتوبيس 86 من المطار أو أتوبيس شركة طيران VIETJET ( أقل من 2 دولار ) 

تاكسي أو جراب (15- 20 دولار)

 

2-الانتقال من مطار سايجون لوسط البلد أو العكس :

نفس الاختيارات أتوبيس المطار أو التاكسي أو جراب

 

3- الانتقالات الداخلية في مدن فيتنام : ( جوجل مابس هو صديقك الأهم في الرحلة )

فيه أتوبيسات مكيفة كويسة جدا بتربط كل أجزاء المدينة ، التذكرة ( أقل من نصف دولار) ، و فيه أبليكشن جراب و مش غالي و أفضل من التاكسي ، و طبعا هواة المغامرة فيه وسيلة الانتقالات الأولى في فيتنام : الموتوسيكل

مهم جدا : استخدم جوجل مابس لتحديد المكان اللي أنت عايز تروحه من النقطة اللي أنت واقف فيها ، هيظهر لك أرقام الأتوبيسات اللي ممكن تستخدمها

 

4- الانتقالات بين المدن الرئيسية :

على حسب برنامج رحلتك ، فيه طيران داخلي بأسعار رخيصة بيربط معظم المدن الرئيسية في فيتنام ، باستثناء سابا ،و فيه القطارات والأتوبيسات و لو أنت قاعد فترة طويلة ، ممكن تشتري موتورسيكل و تسافر بيه 

 

فيتنام

 

5- الانتقالات إلى و من مدينة سابا : 

أقرب مطار لمدينة سابا ، هو مطار هانوي و بعد كدا فيه 3 اختيارات و كلها كويسة :

1- أتوبيسات النوم ( أقل من 20 دولار ) - 8 ساعات سفر تقريبا

2- القطر إلى مدينة لاو كاي و بعد كدا أتوبيس أو ميكروباص إلى سابا : قطر عادي ( أقل من 10 دولار ) ، قطر نوم ( 20 - 25 دولار) هو نفس القطر لكن فيه في كل قطر بعض العربيات اللي بتشغلها شركات خاصة و ساعات بتوصل التذكرة ل 100 دولار -

لكن مفيش فرق يستحق خالص ! - 7 ساعات سفر + ساعة من لاو كاي إلى سابا 

3-الاختيار الأفضل في رأينا لو أوقاته مناسبة لك: ليموزين ، و دا عبارة عن ميكروباص فورد كبير مجهز تجهيز عالي جدا و تكلفته ( حوالي 25 دولار ) : 7-8 ساعات سفر

ممكن تحجز مواصلاتك من هانوي أو من موقع https://12go.asia أو موقع https://www.baolau.com و في جميع الأحوال ، استخدم المواقع لمعرفة الأوقات و التواريخ 

مهم جدا : لازم تحجز مواصلاتك قبل ميعاد السفر بكام يوم ، خاصة لو بتستخدم القطر 

مهم جدا جدا : القطر نفسه كويس ، لكن بيمشي في مناطق زراعية بالليل ، استخدام طارد للناموس - زي بخاخ أوف- حيكون مفيد جدا

 

فيتنام


- أشهر المدن والمعالم السياحية في فيتنام


1- مدينة هانوي (محطتكم الأولى)

2- خليج هالونج

3- منطقة سابا (الفردوس المفقود)

4- مدينة هو تشي منه (أكبر مدن فيتنام)

5- مدينة هوي أن (عبق الماضي الأصيل)

6- مدينة هيو (موطن الأباطرة)

7- دالات (مدينة الشلالات)

8- مدينة نها ترانج (لؤلؤة الجنوب)

9- منطقة فان ثيت (عالم من الكثبان الرملية)

10- مدينة دا نانج (ديزني لاند بعيون فيتنامية)

11- جزيرة فو كوك (الجميلة النائمة)

 

فيتنام


- الإقامة والسكن في فيتنام وافضل الفنادق بها :

هنتكلم على مدينتين فقط هم هانوي و سابا ، مدينة سايجون (هو تشي منه) متفرقش كثير عن هانوي 

1- الاقامة في مدينة هانوي

من أكثر الحاجات المميزة في فيتنام ، الفنادق ودي أسعارها رخيصة جدا مقارنه بأن الخدمة كويسة جدا 

 بشرط : لازم تحجز بدري علشان تقدر تحجز بسعر كويس 

هننقلكم تجربة شخصية مع بوكينج و هنوريكم صور الفندق بعد ما نتكلم عنه :

 

- الحجز قبل السفر بشهرين ، كان فيه اختيارات كثير بأسعار ممتازة ، نفس الفنادق اللي ممكن تحجزها قبل شهرين لما هتشوف أسعارها قبل السفر بأسبوع هتلاقي الاتي : يا اما مفيش حجز أصلا ، يا إما نفس الغرفة بضعف السعر 

 

الأسعار : هوستلز من أول 2 دولار شامل الافطار ( في هوستلز تقييمها أكبر من 7 و في وسط البلد ) ، الفنادق الكويسة تبدأ اسعارها من 15 دولار / الليلة لغاية فنادق 5 نجوم بمئات الدولارات في الليلة .

اما بقي التجربة الشخصية في هانوي :

 

كانت في فندق Ibiz Hotel ، فندق تقييمه 8.9 على بوكينج ، موقع ممتاز على شارع رئيسي في Old Quarter و دي المنطقة القديمة اللي في هانوي و فيها معظم الفنادق و معظم "الأنشطة" ، أقرب فندق للمسجد الوحيد تقريبا في هانوي ، , قريب للسوق الليلي

، على مسافة 10 دقائق مشي من مطاعم حلال كثير و من ميادين رئيسية في هانوي .

على مسافة 10 دقائق مشي من سوق محلات الدهب ، و دا أفضل مكان تغير منه عملة أجنبية في هانوي

 

سعر غرفة دوبل شامل الافطار و فيها كل الاوبشن : تكييف، ثلاجة ، خزنة، واي فاي ، تليفزيون سمارت ، كيتيل، حمام خاص ، خدمة هاوس كيبينج يومية ، لمدة 3 ليالي فقط 55 دولار بالضريبة 

تقييم شخصي للفندق هو : 10/10

 

2- الاقامة في مدينة سابا 

 

نفس الكلام المذكور في هانوي ، احرص على الحجز بدري ، الأسعار في الهوستلز تبدأ من 2 دولار / الليلة شاملة الافطار و الفنادق الكويسة تبدأ من 15 دولار / الليلة

والتجربة الشخصية في سابا :
 

فندق Phuong Nam Hotel : فندق تقييمه 8.1 على موقع بوكينج ، موقع متميز جدا في سابا و قريب من المطعم الحلال الوحيد في سابا ( مطعم فندق Cosiana )

وقت الحجز (قبل السفر بشهرين ) كان فيه غرف دوبل تبدأ من 17 دولار / الليلة و لغاية (الأوضة البانوراما ) 37 دولار /الليلة شامل الافطار ، اللي هي الغرفة اللي في الصور . 

وكالعادة  فيها كل الاوبشن : تكييف، ثلاجة ، خزنة، واي فاي ، تليفزيون ، كيتيل، حمام خاص ، خدمة هاوس كيبينج يومية .

تقييم شخصي للفندق بعد انتهاء الاقامة : 10/10

وبكدة يكون المقال خلص ونسيبكم مع صور الفندق 

فيتنام

فيتنام

فيتنام

فيتنام

 

 

أسعار رحلات شاملة الطيران و الإقامة