فاميلى بارك خروجة تناسب افراد اسرتك على مستوى متميز من الاهتمام والنظافة

جديد : ابعد عن الخروجات التقليدية، احجز وادفع أونلاين كل اللي نفسك فيه وانت قاعد مكانك . 

1. اكتشف جمال النيل و احجز من هنا  فلوكة بتكفي لحد 5 افراد بــ 300 جنيه بس في الساعة .
2. استمتع بالموتور بوت واللي بتكفي لحد 20 فرد بأسعار تبدأ من 555 جنيه للساعة للحجز اضغط هنا . 
3. بــ 99 جنيه بس هتشوف القاهرة بمنظور تاني علي قارب كاياك في قلب النيل احجز دلوقتى من هنا . 

ولمزيد من الخروجات والمغامرات في القاهرة اضغط هنــــا عشان تشوف كل جديد 

الناس ال عاوزين مكان مناسب للاسرة ومميز يقضو فيه يوم ظريف المقال دا هيعجبكم

المكان دا اسمه family park

عبارة عن حديقة كبيرة جدا على مساحة 80 فدان تابعة للقوات المسلحة المصرية الحديقة فيها مجموعة من المتاحف الصغيرة وحديقة حيوان صغيرة وبحيرات صناعية ومكان مطاعم وكافيه ومطعم على البحيرة وطفطف للتنزه بالحديقة وطبعا فى هناك عدة انشطة للاطفال ممكن تتعمل بالاضافة لمنطقة العاب للاطفال وجزء للكبار

الحديقة مكانها جمب فندق توليب فى الكيلو 26 طريق القاهرة السويس مدخل مدينة الرحاب 2 وطبعا لو هتروح مواصلات منصحكش ابدا خصوصا لو معاك الاسرة لان الطريق بعيد ومواصلاته قليلة وهتتعب جدا وانت خارج من الحديقة لانك على طريق السويس ونادرا لما عربية هتقف او تلاقى مواصلة بسهولة ..

ولكن لو عاوز تركب مواصلات فى الذهاب سهلة (فى عربيات ميكروباص بتروح القاهرة الجديدة والرحاب بتطلع من موقف كوبرى الدائرى ال فى المنيب هتركب العربية الفرد ب 11 جنيه وتقوله ينزلك مدخل الرحاب 2 هينزلك عند فندق توليب وهتلاقى ادامك الحديقة بس فى الحالة دى هتتعب فى طريق العودة عن تجربة لانك فى الصحرا ومافيش مواصلات ولا حتى تاكسى هناك . وممكن كمان تركب مترو وتنزل محطة سراي القبة - تركب باص الرحاب من امام المحطة لحد الرحاب وتنزل عند بوابة الرحاب 2 بجانب فندق توليب.

مواعيد الحديقة :

شغالة يوميا من 9 ص الى 12 م

اسعار تذاكر الدخول للبارك

ليها سعرين حسب انت هتروح فى يوم عادى ولا يوم اجازة
اولا : من الاحد الي الخميس سعر التذكرة 40 جنيه ويشمل( دخول الحديقة – حديقة الحيوان السفاري – المتحف المفتوح – ثلاث مناطق العاب للاطفال بالحديقة )
ثانيا : ايام الجمعة والسبت من كل اسبوع والاعياد سعر التذكرة 50 جنية يشمل ( دخول الحديقة – حديقة الحيوان والسفاري – المتحف المفتوح – عرض النافورة الراقصة ) وبيكون فى حفل فى مسرح الحديقة.. :( دي جي_  شو عرايس _ مزمار بلدي – تنورة  قبقاب _ شو بكار)
وخلى بالك الاطفال من اول 4 سنين بيتحسب فرد كامل من على البوابة
ثالثا : لو معاك كاميرا ديجيتال صغيرة هتدفع تكت تصوير على البوابة 50 ج للكاميرا (بس التصوير بالتليفون متاح وببلاش بدون تكت)
رابعا : لو معاك كاميرا بروفيشنال كبيرة او كاميرات تصوير احترافى دى لها رسم دخول خاص 750 جنيه للكاميرا ودا برضو نفس سعر سيشن التصوير سواء للشباب او للعروسين .

جوا البارك فى عندك عدة انشطة تعملها ودى خارج التكت وهى كالاتى :

* ركوب طفطف بيلف الحديقة فى ربع ساعة تقريبا بتكت 20 للفرد .
* دخول المركز الاستكشافى ودا عبارة عن مركز للاطفال فيه مجموعة تجارب علمية من ال بيدرسوها فى المواد الدراسية ولكنها تجارب على ارض الواقع ودا مناسب للاطفال بتكت دخول 20 جنيه للفرد او الطفل من سن 3 سنوات .
* دخول مركز الحواس الخمس ودا برضو مركز ثقافى علمى مناسب للاطفال بيتكلم عن الحواس الخمس وتركيب اجزاء جسم الانسان بتكت دخول 15 جنيه للطفل .
* دخول متحف الحضارات المصرية ودا عبارة عن متحف صغير بيتكلم ويعرض قطع نسخة من الاثار المصرية وبيحكى 4 عصور لمصر القديمة الى الحديثة وكمان بتحضر عرض فيديو فى قاعة العرض عن حرب اكتوبر وعن الثورات المصرية ودا بتكت دخول 20 ج للفرد .
* ركوب النهر السحرى ودا عبارة عن مراكب مطاطية بتمشى فى البحيرة ومناطق شلالات صغيرة ودا بتكت 50 جنيه للفرد .
* دخول سينما 3d ومشاهدة فيلم وثائقى او ثقافى بتكت 20 جنيه للفرد .
* فى كمان ورش تعليم للاطفال فى الحديقة زى ورشة تعليم الخزف / ورشة تعليم الرسم على الزجاج / ورشة تعليم صناعات الجلود / ورشة رسم .. وهكذا ودى كل ورشة بسعر منفصل من 20 جنيه الى 40 جنيه حسب نوع الورشة .
* فى كمان عدة العاب فى الحديقة بتكت منفصل ما بين 10 و 15 و 20 ج حسب كل لعبة .
* بالنسبة للاكل والمشروبات عندك جوا منطقة مجمع مطاعم FOOD COURT تابعة للقرية بتقدم وجبات وبيتزا ومشروبات باسعار متوسطة ابتداء من 40 ج الى 150 ج مثلا حسب انت هتطلب ايه .
وفى عندك مطعم جميل جدا على البحيرة بس دا مطعم خاص .
* الحاجات المجانية ال ليك على تيكت دخول الحديقة هى دخول البارك ودخول حديقة الحيوان الصغيرة ومناطق الالعاب المجانية فقط (بالاضافة لحفلات الاطفال والفلكلور يوم الجمعة فقط) غير كدا اى حاجة تانية جوا لها تكت منفصل .

شوية ملاحظات على المكان من زيارتنا ليه :
اولا المكان دا ممكن تكون اسعاره غالية بالنسبة لبعض الاسر والناس بس هو بيقدملك مستوى نظافة عالى جدا وراقى ومميز .. وكمان المكان كان مميز بانه هادى جدا وفيه قعدات كتيرة على البحيرة مجانية وظريفة.
ثانيا خلى بالك من موضوع التصوير دا لان على البوابة بيفتش بدقة جدا وبيسالك على الكاميرا (بس للامانة التعامل فى المكان من العاملين هناك راقى جدا ومهذب ومبتسمين دايما ) وكمان خلى بالك لو معاك كاميرا كبيرة بروفيشنال احترافية هتدفع 750 ج (التصوير بالتليفون ببلاش بدون تكت)
ثالثا وانت هناك لف واتمشى فى الحديقة ومتنساش تروح تتصور فى احلى مكان للتصوير هناك وهو مبنى الجنجل ودا مبنى فى اخر الحديقة على شكل اشجار وفيه مجسم لحيوانات ومناظر جميلة جدا .
رابعا فى هناك فى الحديقة برج المفروض بتطلعه وتتفرج منه على الفيو من فوق بس غالبا هتلاقيه مقفول وممنوع الطلوع ودا ال حصل معايا .
خامسا لو مش فارق معاك الاسعار ومعاك عربية وبتدور على الرقي والنظافة والهدوء لمكان تقضى فيه يوم ظريف مع اسرتك يبقى الحديقة دى المكان الامثل ليك وهتنبسط فيها جدا .
سادسا التكت ال انت هتقطعه على البوابة دا سواء كان ب 40 ج او ب 50 ج حسب اليوم ال هتروح فيه بيكون شامل دخول البارك ودخول حديقة الحيوان الصغيرة ومناطق الالعاب المجانية فقط (بالاضافة لحفلات الاطفال واالفلكلور يوم الجمعة فقط)
سابعا حديقة الحيوان ال هناك صغيرة جدا بس الحقيقة جميلة ونظيفة والحيوانات نظيفة وبحالة صحية جيدة واحلى حاجة هناك هتعجبك اوى هو ملك الغابة (قفص الاسد وزوجته رائع)
ثامنا خلى بالك ان ممنوع دخول المأكولات ولا العجلة ولا الكورة
تاسعا لو عاوز تروح وتنبسط وتوفر ممكن تروح تقطع تكت الدخول بس وتستمتع بالحديقة وحديقة الحيوان والالعاب من غير ما تقطع اى وسائل ترفيه جوا وكدا مش هتكون مكلفة اوى للاسرة