Travilio

تفاصيل كل شئ يخص السفر الى فيتنام ( الفيزا - تذاكر الطيران - الانتقالات -الاقامة )

تفاصيل كل شئ يخص السفر الى فيتنام ( الفيزا - تذاكر الطيران - الانتقالات -الاقامة )
تاريخ النشر :14-نوفمبر-2018 2018-12-15 المشاهدات :116

فيتنام بلد سياحيه جميله جدا ومميزتها كتير واهمها طبيعتها الساحره والمتنوعه اللي هتلاقي فيها البحيرات والجبال والغابات والشلالات  وتناسب كل الاذواق قريبه جدا من تايلاند وكمبوديا ولاوس يعني تقدر ترتب نفسك وتزورهم مع بعض ف رحله واحده وده بيكون شئ جميل وكمان البلد نفسها رخيصه جدا ودي حاجه مهمه لانك هتقدر تستمتع فيها وتنبسط بمبلغ صغير مش لازم تدفع كتير عشان تتبسط فيها (ارخص من مصر بكتير ) بما في ذلك اسعار الفنادق والهوستل 

دة غير ان فيتنام من البلاد اللي ممكن تزورها بدون تصريح امني وتأشيرتها اسهل ما يكون للمصريين ودول تانيه كتير كل اللي بتعمله اون لاين بتبعت بياناتك لشركة تعملك خطاب وبتاخد رسوم منك وتوصل فيتنام تقدم الخطاب ده مع صوره وباسبورك و ٢٥ دولار

وتاخد التأشيرة لمده شهر وهنتكلم عنها اكتر خلال المقال  بالتفصيل

 

فيتنام

 

السفر الي فيتنام واهم المعلومات التى تحتاج معرفتها قبل السفر 

 

اولا تأشيرة فيتنام وكيفية الحصول عليها :

مبدائياً فيزا فيتنام سهله جدا ومفيهاش أي مشاكل ولا اوراق كل اللي عليك بتخش علي موقع ده :  https://www.vietnam-visa.com وتعملها اونلاين

 وتختار نوع الفيزا اللي انت عايزها اذا كان دخول مره واحده لمده شهر ولا مالتي ولا ٣ شهور ، 

ودي أرخص طريقة للحصول على فيزا فيتنام :

فيزا فيتنام للمصريين ، و لمعظم جنسيات العالم ممكن تحصل عليها بالخطوات التالية :

1- بتعمل خطاب دعوة عن طريق أحد المكاتب المتخصصة في فيتنام

2- ولما توصل للمطار و قبل الجوازات، بتقدم خطاب الدعوة و الباسبور وصورتين شخصيتين و 25 دولار أمريكي لمكتب التأشيرات، و بيتم طباعة التأشيرة في الباسبور وبعدين بتروح  لمكتب الجوازات

الخطوة الثانية مفيش فيها أي مشكلة، لكن المشكلة في الخطوة الأولى... مكاتب الفيزا... فيه عشرات المواقع على الإنترنت بتعمل خطاب الدعوة... بأسعار مختلفة لكل مكتب... و أحيانا أسعار مختلفة على حسب الجنسية للمكتب الواحد

معظم المواقع المعروفة بتعمل خطاب الدعوة للمصريين بسعر من 20 - 30 دولار لكن بعد بحث طويل جبنالك أرخص مكتب بيعمل خطاب الدعوة ب 6 دولار فقط حتى للمصريين... هو الموقع دة :

http://www.vietnamvisapro.com/

بيتم الدفع على الموقع باستخدام كريديت كارد والباي بال كمان. و بيتم استلام خطاب الدعوة على الايميل في خلال يومين عمل و لازم تطبعه قبل ما تسافر.

 

فيتنام


ثانيا سعر تذاكر الطيران الى فيتنام من مصر

حاول تحجز بدري شوية عشان تعرف تجيب سعر معقول والسعر المتوسط للتذكرة ١٠,٠٠٠ جنيه ودايما التذكرة للجنوب ارخص من الشمال الف جنيه تقريبا

والسفر مباشر من الشرق الأوسط بيتم لمدينتين فقط في فيتنام : هانوي العاصمة السياسية و سايجون العاصمة الاقتصادية.

الطيران مباشر لهانوي : أرخص طيران غالبا هيكون ايروفلوت الروسية ، و فيه الاماراتية و القطرية والتركية 
الطيران مباشر لسايجون : أرخص طيران غالبا هيكون ايروفلوت الروسية

ملحوظة : في حالة السفر من مصر ، فيه اختيار أغلى - أغلى جدا جدا - و أطول : مصر للطيران + طيران الصين لكن الاختيار دا يسمح لك بالسفر المباشر ل 3 مدن اضافية داخل فيتنام بالاضافة لهانوي و سايجون

في حالة السفر من بعض الدول العربية الأخرى ، فيه اختيار ترانزيت بانكوك + طيران تايلندي أو فيتنامي ... لكن بردو اختيار هيكون غالبا أغلى من الروسية و الاماراتية و القطرية و التركية 

( الأسعار تختلف جدا و تعتمد على مكان سفرك و ميعاد سفرك و وقت الحجز ، لكن بصفة عامة السفر لسايجون أرخص من السفر لهانوي) ، لمعرفة سعر الرحلة من بلدك استخدم موقع سكاي سكانر او مواقع حجز الطيران عمتاً  أو استخدم موقع أحد الشركات المذكورة مباشرة

 

فيتنام

 

ثالثاً بالنسبة للإقامة في فيتنام

فيتنام رخيصه جدا وتقدر تنزل في فنادق خمس نجوم السعر لا يتعدي الالف جنيه في الليله وتقدر تنزل ف هوستل تحفه ب ١٠٠ جنيه في الليله يعني هتدفع سعر  رخيص في مقابل شئ جيد جدا 


رابعاً افضل اوقات السفر الي فيتنام 

تقدر تزور فيتنام اي وقت طول السنه وعندهم موسم المطر شهر اغسطس وسبتمبر وده لا يمنع الزياره ومش هايأثر في شئ معاك اوي لكن عمتا من شهر ديسمبر لشهر فبراير الجو هناك بيكون معتدل وحلو جدا 

 

خامساً وسائل التنقل داخل فيتنام 

لو عايز توفر فلوس المواصلات و تلف فيتنام كلها يبقي عليك و علي الموتوسيكل، تقريبا الموتوسيكلات هناك اكتر من البني ادمين و دي ارخص وسيلة للتنقل انك ممكن تاجر سكوتر أو موتوسيكل من ٣ ل ٥ دولار في اليوم 

ولازم تبقي محمل ابليكشن grab ده زي اوبر كده بس شغال في اسيا هينفعك جدا 

كمان ممكن تتنقل عن طريق القطار او عن طريق شركة أتوبيسات كدا عندها زي جو باصا للي في مصر  اسمها " The sinh Tourist " والشركة دي ليها اتوبيسات بتطلع من فيتنام و بيروحوا لدول لاوس و كمبوديا بري والدول دي تاشيرتها عند الوصول هي

كمان 

يعني تروح تحجز تذكرة الأتوبيس و تركب و تسافر من دولة للتانية في اتوبيس و الاتوبيس عبارة عن سراير نوم و نضيفة جدا و سعر التذكرة بيعمل من ١٥ ل ٣٠ دولار

 

فيتنام

 

سادساً عملة فيتنام 

عملتها الدونج الفيتنامي والدولار الامريكي تقريبا = ٢٣ الف دونج ( ٢٣،٠٠٠ دونج )

يعني ممكن تقدر تقول الجنيه عندهم هو ال ١٠.٠٠٠ دونج 

 

سابعا واخيراً الاتصالات والانترنت في فيتنام 

فيه واي فاي في المطار ،وفيه واي فاي في الفنادق و كثير من الكافيهات و المطاعم ، لكن لو بتتحرك كثير ، لازم تشتري سيم كارد بباقة انترنت علشان صديقك الأهم و الأغلى : جوجل مابس 

فيه 4 شركات موبايل في فيتنام : فيتيل و 3 شركات ثانيين ، الشركات الثانية أرخص ، لكن لو هتخرج برا المدن الرئيسية يبقى لازم تشتري فيتيل لان باقي الشركات تغطيتها محدودة جدا

هتشتري سيم كارد من المطار شامل الانترنت 4g بحوالي 8 دولار تقريبا ، دا صالح لمدة 10 أيام و فيه 2 جيجا انترنت و 20 دقيقة اتصالات دولية لــ 25 دولة فقط مش من ضمنهم مصر و 40 دقيقة اتصالات محلية  

و لو انت مش ناوي تستخدم خاصية الاتصال خالص ، فيه اختيار شراء خط داتا فقط و هيكون أرخص حاجة بسيطة لكن باقة انترنت أكبر 
 

في مقالات قادمة هنتكلم اكتر عن مدن فيتنام واللي ممكن تعمله في كل مدينة وكمان هنقولك ازاى تتنقل بين مدن فيتنام بالتفصيل 

 

فيتنام

 

أسعار رحلات شاملة الطيران و الإقامة