Travilio

انسب الاماكن لعمل سربرايس بارتي علي النيل وافضل اماكن اقامة اعياد الميلاد في القاهرة

انسب الاماكن لعمل سربرايس بارتي علي النيل وافضل اماكن اقامة اعياد الميلاد في القاهرة
تاريخ النشر :08-نوفمبر-2018 2018-12-16 المشاهدات :334


عيد ميلادك قرب ومش عارف تعمله فين او عندك عيد ميلاد حد من اصحابك او خطيبك ونفسك تعمل مفاجأه حلوة وفي جو جديد بعيدا عن احتفالات البيت احنا وفرنا عليك انك تدور علي اماكن لعمل عيد الميلاد في القاهرة وجبنالك مجموعه مختلفه من الاماكن اللي هترضي جميع الاذواق 


اولاً اماكن لعمل عيد ميلاد على النيل 

غالبا الخروجات بتاعت القعدة علي النيل بتحتاج منا ندور ونجهز لها قبلها بفترة وخصوصا لو بندور علي اماكن مناسبة نعمل فيها عيد ميلاد لشخص عزيز علينا ،  علشان كدا  جبنالكم مجموعه اماكن حلوة علي النيل تقدر تروح تنبسط وتحتفل بعيد ميلادك وترجع في غاية الانتعاش والانبساط


1- المركب Almarkeb 

 المركب في الاصل عبارة عن مجموعة مراكب بمود وستايل حلو جدا والفيو بتاعهم تحفه وكمان عملوا قاعدة تحفة على النيل والتزموا بكل قواعد البساطة والبهجة في نفس الوقت فطلعوا حاجة ملونة رايقة جدا

الفكرة كلها انك لو عاوز تعمل عيد ميلاد انك تعمل حاجة مختلفة في مكان موده حلو على النيل

"وكمان ممكن تعمل  Surprise party لخطيبتك في المكان ده؟ يعني ممكن مثلا تكون هي واصحابها واقفين في المركب وانت داخل عليها بالخاتم بلانش " 

المركب عبارة عن 4 مراكب : 

المركب الأول الـ Classic Show مناسبة أكتر للـ Couples و دي بتبقى رومانسيه أوي و ألوانها هادية و فيها بقا ورد كتير و شموع و و عزف مزيكا

المركب التاني الـ Castle و دي بتحسوا انكوا في قصر جوه المركب بيتحرك في النيل 

المركب التالت الـ Oriental و دي مركب شرقيه هتحسوا انكم قاعدين في شارع المعز أو في زينب خاتون بس في النيل

المركب الرابع الـ Modern Show  و دي مناسبة أكتر للشباب فيها DJ وPlaystation و Estimation أو حتي طاولة و شطرنج 
 

المركب


طيب إيه اللي بيحصل ؟

المكان بيقدم رحلات في النيل كل رحلة ساعتين علي أي مركب من الأربعه دول بتبقي شاملة وجبة فطار أو غدا أو عشا علي حسب المعاد ومعاهم Drink و Dessert بيبقوا من ضمن تكلفة الرحلة

العنوان : 33 كورنيش النيل - المعادي جنب Grand cafe و قصاد بنك QNB 
التليفون : 01019686822 - 01069692457

 

المركب

 


2- المكان Le Mix

المكان  دة  مستواه أعلي من النيل شوية وده مخلي الفيو بتاعه أحلى من لما تكون قاعد والمايه جنبك فبتبقي كاشف حاجات كتير بيعملوا أعياد ميلاد في المكان لو كنتوا ١٠ أفراد بيظبطوا لكم Indoor Area ليكو لوحدكوا بس ولو ١٥ أو اكتر بتاخدوا الــ Outdoor

كله وبيبقي بتاعكوا انتوا وبس وبيجيب لكم سماعات علشان اغانيكم اللي علي مزاجكم

العنوان: Nile Lounge - ٥٥ شارع عبد العزيز أل سعود - المنيل 

التليفون: 01286205996

 

le mix

 

ثانيا اماكن لعمل عيد ميلاد مميز واكثر خصوصية 


لو بتفكر تعمل عيد ميلاد في مكان مختلف وبعيد عن قعدت البيت وكمان بتكلفه قليله  وبتحب تشغل المزيكا اللي بتحبها عشان تنسي الضغوط و وتستمتع باللحظة ، جبنالك أكثر الاماكن المناسبة للشباب والبنات اللي بيحبوا جو القعدات العربية و القعدات علي الكراسي الملونة ومريح للاعصاب و كمان ممكن تخلص احتفالك  وتكمل باقي اليوم في الــ game room حاجة كدا صغيرة فيها PS4 و Foosball table 

 

1- المكان Stage ستيدج 
 

المكان الامثل لاعياد الميلاد كل حد بيتمنى يعمل عيد ميلاد ميتنسيش

المكان بيديك خصوصية في room كبيرة مكيفة مجهزة بـ stage و mic علشان الكاريوكي والنشاذ وفقرة الاعترافات والبروجرام اللي هيعلّي عيد الميلاد جدا يعني من ضمن الفقرات "الاجبارية" ان كل واحد فيكم يقول لصاحب عيد الميلاد جملة مفيش حد غيرهم هما الاتنين بس يفهموها ويقولوا انتوا عرفتوا بعض امتى فين وتتمنوا توصلوا مع بعص لفين

ده غير انكم ممكن تعملوا Movie Night بعد عيد الميلاد علشان تقفلوا اليوم صح 

نظام عيد الميلاد بيكون ساعتين والسعر 400 جنيه لو اقل من 16 فرد ولو اكتر كل فرد بيكون 25 جنيه ومفيش سيرفس والتورتة والذي منه بتجبوه انتم علشان تختاروا براحتكم

وعمتا ستيدج هو بوك كافيه هادي و رايق و جواه قاعه كبيرة مناسبة جدا لحفلات التوقيع و الندوات اللي بتحتاج مكان يكفي من فرد ل١٠٠ ، و حفلات الكاريوكي و الميكروفون المفتوح و الامسيات الشعرية

العنوان: شارع عبدالعزيز ال سعود - تاني ناصية من ناحية كوبري الجامعة أمام بلو بلو - المنيل 

وفي كمان فرع في الزمالك موجود في :  15 شارع احمد حشمت- الزمالك

التليفون: 01020781095

 

 


2- المكان  CAVE - Play Station 

ودة كهف جواه بحر و فضاء و غابة  و مناسب جدا لاعياد الميلاد و لو حابب تعمل Movie Night هتلاقي فيه هارد 2 تيرا افلام للـ Movie Night 

ممكن تحجز روم خاصه بيكو تظبطوها بالشكل اللى نفسكوا فيه وتعملوا فيها عيد الميلاد وتحتفلوا وتنبسطوا وبعدها تخلصوا وتكملوا قعدتكم لعب وتصوير
الكهف جواه 4 Rooms كل واحدة ليها مودها الخاص الاولي Ocean و التانية Jungle و التالتة Space والرابعة الكهف العادي  

الـ Rooms كلها برايفت كده جواها شاشات كبيرة و PlayStation و Xbox و عندهم معظم العاب الجهازين عموما

يفضل الحجز قبلها من التليفون : 01119226088

العنوان : 14 عبد الحميد شومان , عباس العقاد .مدينة نصر 

 

cave

 

ثالثاً مطاعم وكافيهات مناسبة لعمل عيد ميلاد بدون مينيمم تشارج

1- المكان مطعم بردورة 

المکان دة کله الوان مبهجه جداتفتح النفس علی الاکل لو هتعمل فيه عيد الميلاد هتلاقي الناس اللى شغالين في المحل شباب متعاون ولطيف جدا جداا والمكان نفسه ديكوره مختلف ومبهج اوي عندهم الکراسی و الكنب عبارة عن براميل

ازاي كدة ؟ هما بيجيبوا البرميل ينيموه يبقي كنبه يوقفوه يبقی کرسی و بیشیلوا منه اجزاء و بیحطوا مخدات عشان القعده تکون مریحه 

و عندهم كراسي القهوه اللي بتبقي خشب دي بس هما مغيرنها تماما وملوننها الوان جميلة جدا

مفيش minimum charge عندهم واسعارهم رخيصه والاكل كمان حلو جدا

المكان هادي ومناسب اوي اعياد الميلاد بتاعت الصحاب 

ممكن تتواصلوا معاهم من خلال الارقام دي : 01063356888 أو 01063376888

 ودة عنوانهم : 5 شارع جعفر الصادق متفرع من عبد الله العربي أمام مطعم البرج مدينة نصر - الحي السابع

 

بردورة

 

2- المكان pizza club 

المكان دة جميل جدا  واسع ومكيف ومتقسم لدورين وديكوراته حلوه جدا هتحس انك جوا نادي فعلا للــ pizza وال pasta وقعدته حلوه دا غير انه ممكن طبعا  يتعمل فيه عيد ميلاد وبيبقي حلو جدا ، احلي ميزة فيه ان مفيش مصاريف خدمه او ضريبه عندهم  دة

مش كدة وبس دة الاستاف اللي في المحل بيعملولك شوو عيد الميلاد بنفسهم وبيشغلو لك الاغانى وبيدخلوا هما التورته وبيكون الجو رائع في المحل 
 
العنوان : 8 ش السيد المرغيني، المنتزة، مصر الجديدة 

التليفون :20224504051

بيتزا كلوب

 

 

أسعار رحلات شاملة الطيران و الإقامة