تفاصيل انترفيو السفاره الامريكية للفيزا السياحيه
دي تجربة وخلاصه كل اسئلة الانترفيو اللي ممكن تتسألها في السفارة احنا بننقلهالكم بالظبط عشان تعرفوا التفاصيل كلها من قلب الحدث
اولا انا قبل ما أقدم لما سألت ناس كتير عن الفيزا كله قالى متقدمش لان انا مسافرتش قبل كده بره مصر او زى ما بيقولو باسبورى ابيض وكله بيترفض بس انا قولت اجرب حظى واشوف كدة الوضع ايه وعادى جت ولا مجتش مش هتفرق
اجراءات المقابلة الشخصية وما قبلها للحصول علي التأشيرة الامريكية
قررت اقدم و عملت الابلكيشن بنفسى و دفعت مصاريف الفيزا فى بنك ال CIB وال كانت 2960 ج وبعد كدة لقيت اول ميعاد متاح فى السفاره بعد 35 يوم تقريبا بس قلت مش مشكله اكون جهزت ورقى براحتى
يوم الانترفيو كان ميعادى الساعة 8:30 وكنت هناك حوالى الساعه 8 تقريبا وكان فيه طابورين واحد كبير للسياحه وواحد تانى لتأشيرات الهجرة
وكان في ناس بتطلع من طابور السياحة لما كان الموظف المصرى بره السفارة بيراجع الورق المطلوب معاهم وبيطلب منهم يروحو يتصوروا تانى لان الصور ال معاهم مش مظبوطه وفيه استديو جنب السفاره الناس بتروح تتصور فيه
المهم دخلت وخدت رقم وكان رقمى 47 واتنده على رقمى بعد ربع ساعه والموظفة خدت منى الابلكيشن والباسبور وقلتلى استريح وهنادي على رقمك تانى وبعدها بشويه ناديتني تانى وعملت الفنجر برينت والموظف سلمني الباسبور بتاعى بس من غير الابلكيشن
وقالى استريح وهننده على رقمك تانى
كان قاعد جنبى شخص اترفض 4 مرات قبل كدة و عمال يحكيلى التجارب بتاعته وقاعد يقولى هتترفض وكله بيترفض وكميه negative energy انتشرت فى المكان كله .
انترفيوهات فيزا السياحه لأمريكا كانت فى شبابيك بعيده عن اماكن الاستراحه يعنى مش بتشوف الناس وهى بتعمل الانترفيو
لكن ممكن تشوفهم وهما خارجين وشوفت ناس كتير خارجين بورقة زرقاء وعرفت من اللي قاعد جنبى دى ورقة الرفض
والانترفيوهات كانت مش بتعدى ال 3 دقائق تقريبا
المهم اتنده على رقمى أخيرا وكان بعد تلت ساعه تقريبا من وقت لما عملت الفنجر برينت
وكان الانترفيو بتاعى فى شباك رقم 10 مع اوفيسر امريكى ابيض لابس نظاره و مش كبير فى التلاتينات تقريبا
وكان الانترفيو بالانجليش :
الاسئلة اللي هتتسألها في السفارة الامريكية بغرض السفر كــ سياحة
الاوفيسر : صباح الخير
انا : صباح الخير
الاوفيسر : الباسبور
انا : اتفضل
الاوفيسر : مستر احمد انت عايز ليه تسافر امريكا ؟
انا : سياحه
الاوفيسر : حتروح فين فى امريكا ؟
انا : نيويورك وواشطن و لويزيانا
الاوفيسر : لويزيانا ؟ ليه لويزيانا ؟
انا : عايز اروح New Orleans كنت شوفت ليها صور وفيديوهات كتير وعجبتنى جدا قررت احطها فى بلان الرحلة بتاعتى واروح ال Bourbon Street هناك
الاوفيسر : OK ,انت بتشتغل ايه ؟
انا : انا مهندس وشغال فى شركه -----
الاوفيسر : شغال فى الشركه من امتى ؟
انا : من 2012 ومعايا ال H.R letter لو محتاج تشوفه
الاوفيسر : لا
الاوفيسر : انت سافرت فين قبل كده ؟
انا : دى اول مره افكر اسافر فيها خارج مصر
الاوفيسر : مين هيصرف على الرحلة ؟
انا : انا اللي هصرف على الرحلة ومعايا كشف الحساب بتاعى لو عايز تشوفه
الاوفيسر ( شاورلى بايده وقالى يمعنى لا لما لقانى بطلع كشف الحساب ) : لا مش محتاجه
الاوفيسر : انت والدك سافر امريكا قبل كده ؟
انا : اه بس دة من حوالى 12 سنه و مرة واحدة
الاوفيسر : والدك حاليا فى أمريكا ؟
انا : لا
الاوفيسر : عندك قرايب اصدقاء فى امريكا ؟
انا : لا
الاوفيسر : انت ناوى تسافر امتى أمريكا ؟
انا : فى ديسمبر
الاوفيسر : هتقعد كام يوم
انا : 14 يوم
الاوفيسر (وكان ادانى ورقة خضراء ) : OK انا وافقت على الفيزا بتاعتك وهتستلم الباسبور خلال أسبوع
انا : شكرا ( بعد لحظات صمت لثواني من المفاجأة )
دة كله جميل جدا والكلام دة اللى كان بيتم دايما فى السفارة قبل كدة لكن الجديد ان بقى فيه اجراءات في مقابله السفارة الامريكية لازم تاخد بالك منها لان مكانتش بتحصل قبل كدا وهنشرحهملك بالتفصيل دلؤقتى :
3 اجراءات جديدة فى مقابلة السفارة الامريكية 2019 بالتفصيل
1- بقي يطلعلك موظف امريكى او قنصل معاه اجندة ويقعد معاك في مكان الانتظار بره وانت مستنى دورك ويبدأ يعمل معاك انترفيو ويسالك اسئلة اكنك بتعمل الانترفيو بجد
زى مسافر فين .. اسمك ايه .. هتقعد هناك اد ايه .. بتشتغل ايه واسئلة من اللى اتكلمنا عنها فى اول المقال وكل دة بيسجله عنده فى الاجندة وبعد كدة هينادوا عليك فى الشباك وتخش تعمل الانترفيو اللى انت رايحله اصلا
طب هما بيعملوا ليه كدا ؟ اعتقد انه لسبب من اتنين
- يأما دة بقى نظام جديد فى السفارة انه يتعمل معاك انترفيو
- او دي ناس بتتمرن انها تعمل انترفيو مع الناس فيما بعد وعشان كدة بيطلعوا يقعدوا مع الناس فى الاستراحة بره
- يأما فيه سبب تالت هو لسه مش واضح لحد دلؤقتى
2- تانى اجراء جديد بقي يتم فى السفارة وهو انه كان فيه ابلكيشن كان بيبقى مضمونه انه بيتكلم عن اسم الاقارب بتاعتك في امريكا .. اسم اخواتك .. اشتغلت فين قبل كدة .. اراقام تليفوناتك .. ايميلاتك والفيس بوك .. ودة ابلكيشن
بيتكلم عن حاجات كتيرة جدا ، والاسئلة دى مش موجودة فى ابلكيشن ال Ds160 ( الابلكيشن الاساسي بتاع فيزا السياحة ) اللى اتلكمنا عنه فوق . والابلكيشن دة كانوا الاول يختارو ناس معينه قليلة تملاه لسبب ما يمكن بيبقوا قلقانين منه فبيطالبوه انه يملئ الابلكيشن دة
لكن الجديد ان كل الناس اللى بتخش السفارة بقت تملئ الابلكيشن دة ، وممكن تملاه في السفارة قبل المقابلة او سواء اترفضت او اتقبلت يقولك تملاه وتبعته على ايميل السفارة .
وعمتاً كلها اسئلة سهلة واغلبها هتعرف تجاوب عليها واللى متعرفش تجاوب عليه او معندكش اجابة لي أكتب no answer
3- بعد ما بتخلص المقابلة يأما بتتقبل او بتترفض او بتخش اجراءات ادارية .. ( اللى هو انت متقبلتش ومترفضتش او ان السفارة فيها بيانات عاوزة تستعلم عنها او هتطلب منك ورق ذيادة او فى حاجة ناقصة فى ورقك فهيعطلوا الفيزا بتاعتك شوية لحد ما يراجعوا بياناتك )
والمراجعه دى كانت من الطبيعى بتقعد من ايام او اسابيع لحد اقصى 60 او 90 يوم ..
لكن الجديد ان الاجراءات الادارية دي بقت احيانا ممكن تستمر لسنه واكثر وهما لسه مردوش عليك حتى لو جربت تروح او تبعت ايميلات او تعمل اى حاجة مش هتفيد لان بقى الموضوع يتأخر ومضطر تستنى ..
ودي كانت التلات اجراءات الجديدة اللى خاصة بالمقابله حبينا نعرفهالك عشان تبقى رايح وعامل حسابك ومفيش حاجة توترك او متكونش عارفها
واخيرا دي شوية نصائح ومعلومات لازم تعرفها قبل عمل مقابلة السفارة الامريكية
الفيزا نصيب ياجماعه واقتناع من الاوفيسر اللي هيعمل معاك الإنترفيو وملهاش مقياس خالص بس من واقع التجربة الاوفيسر مبيبصش في ورق حاول تجاوب علي اد السؤال وتكون هادي وواثق في نفسك ومتكذبش في اى معلومه عنك لانهم عارفين كل حاجة
وخد بالك عشان وانت قاعد مستني دورك انت متراقب خليك ثابت ماتبصش كل شويه شمال ويمين
حط رجل علي رجل وخليك قليط ممكن تقرا في كتاب مش كل شويه تبص تشوف الرقم والدور استغل ودنك
وانت بتتكلم مع القنصل في المقابله عينك في عينه وهو بيكلمك ماتشاورش وماترفعش ايدك وانت بتشرح او بتتكلم معاه ايدك ثابته علي الرخامه اللي قدامك
حظ سعيد للناس اللي هتقدم
تجربة الاستاذ / أحمد مازن
